USA: সন্তানক নাগৰিকত্ব নিয়া নহ’ব ট্রাম্পৰ আমেৰিকাত !
চিন্তা বাঢ়িছে অনুপ্ৰৱেশকাৰী ভাৰতীয় হ’বলগীয়া পিতৃ-মাতৃৰ
যদি আমেৰিকা যুক্তৰাষ্ট্ৰত নাগৰিকত্ব আইন বাতিল কৰা হয় তেন্তে হাজাৰ হাজাৰ ভাৰতীয় বিপদত পৰিব! বহুলোকে ভাবে যে আমেৰিকাত প্ৰবাসী ভাৰতীয় দম্পতী, যিসকলে সন্তান জন্ম দিয়াৰ কথা ভাবি আছে, তেওঁলোক সমস্যাত পৰিব পাৰে ।
কিন্তু জন্মগত নাগৰিকত্ব আইন বাতিল কৰাৰ ড’নাল্ড ট্ৰাম্পৰ ধাৰণা আইনী জটিলতাত আবদ্ধ হৈ আছে। যদিহে ট্ৰাম্পৰ এই ঘোষণাই আদালতৰ সেউজ সংকেত পায় তেন্তে বহুতে চাপত পৰিব।
বহুতো ভাৰতীয়ই কামৰ সূত্ৰে আমেৰিকাত বসবাস কৰে । তেওঁলোকে এইচ-১বি ভিছাত আমেৰিকা যুক্তৰাষ্ট্ৰত বাস কৰে।
আনকি বিয়াৰ পাছত তাতেই স্থায়ীভাৱে থকাৰো পৰিকল্পনাও কৰে। সেই দেশৰ আইন অনুসৰি, যদি আমেৰিকাত সন্তান জন্ম হয়, তেন্তে তেওঁ জন্মগতভাৱে তাৰে নাগৰিকত্ব লাভ কৰে!
কিন্তু ট্ৰাম্পে দ্বিতীয় কাৰ্যকালৰ বাবে হোৱাইট হাউচত প্ৰৱেশ কৰাৰ ২৪ ঘণ্টাৰ ভিতৰতে তেওঁ ১৫৬ বছৰ পুৰণি নাগৰিকত্ব আইন সলনি কৰাৰ প্ৰক্ৰিয়া আৰম্ভ কৰে।
ট্ৰাম্পে বিগত ২১ জানুৱাৰীত এই সন্দৰ্ভত এখন চৰকাৰী নিৰ্দেশনাত স্বাক্ষৰ কৰিছে। কিন্তু তাৰ পাছতে বিষয়টো আদালতলৈ যায়।
অক্ষয় পাইছ নামৰ এজন ভাৰতীয় অভিযন্তা তেওঁৰ পত্নী নেহাৰ স’তে কেলিফৰ্ণিয়াত বাস কৰে। তেওঁৰ পত্নী গৰ্ভৱতী। কিন্তু ট্ৰাম্পৰ ঘোষণাৰ পাছৰে পৰা, তেওঁলোক চিন্তিত হৈ পৰিছে।
বিবিচিৰ স’তে হোৱা এক সাক্ষাৎকাৰত অক্ষয়ে কয়, “ই আমাৰ ওপৰত পোনপটীয়া প্ৰভাৱ পেলাব। যদি নতুন নিয়মবোৰ কাৰ্যকৰী হয়, আমি নাজানো আমি কি কৰিম। মই বৰ চিন্তিত। ”
নতুন নিয়মবোৰ কাৰ্যকৰী হোৱাৰ আগতে বহুতো দম্পতীয়ে সন্তান জন্ম দিব বিচাৰে। গৰ্ভৱতী মহিলাসকলে অস্ত্ৰোপচাৰৰ জৰিয়তে সন্তান জন্ম দিয়াৰ প্ৰতি আগ্ৰহী। জন্মগত অধিকাৰ নাগৰিকত্বৰ উপৰিও, এইচ-1বি ভিছা ধাৰণ কৰা শিশুৱেও আইনী অনিশ্চয়তাৰ সন্মুখীন হ’ব পাৰে।
ভাৰতীয়সকল আমেৰিকা যুক্তৰাষ্ট্ৰৰ দ্বিতীয় সৰ্ববৃহৎ অনুপ্ৰৱেশকাৰী গোট। আমেৰিকা যুক্তৰাষ্ট্ৰত পাঁচ লাখৰো অধিক লোকৰ অনা-অভিবাসী ভিছা আছে।
যদি নতুন নিয়মবোৰ কাৰ্যকৰী হয়,এইসকলো বিপদত পৰিব পাৰে। নতুন নিয়মৰ অধীনত, অনা-অভিবাসী ভিছা ধাৰকসকলৰ সন্তান আমেৰিকাত জন্ম গ্ৰহন কৰিলেও নাগৰিকত্ব নাপায় ।
প্ৰসংগত, আমেৰিকা যুক্তৰাষ্ট্ৰত জন্মগতভাৱে নাগৰিকত্বক ‘ জুছ চোলি’ বুলি কোৱা হয়। এইটো প্ৰকৃততে এটা লেটিন শব্দ। ইয়াৰ অৰ্থ হৈছে “মাটিৰ অধিকাৰ।” আমেৰিকা যুক্তৰাষ্ট্ৰৰ সংবিধানত কোৱা হৈছে যে তাত জন্ম হোৱা প্ৰতিটো শিশুক স্বাভাৱিক নাগৰিকত্ব প্ৰদান কৰা হ’ব।
আনকি শিশুটোৰ পিতৃ-মাতৃ আন এখন দেশৰ নাগৰিক হ’লেও, তেওঁ জন্মগতভাৱে আমেৰিকা যুক্তৰাষ্ট্ৰৰ নাগৰিক হ’ব। ১৮৬৮ চনত, চতুৰ্দশ সংশোধনীয়ে আমেৰিকা যুক্তৰাষ্ট্ৰৰ সংবিধানত জন্মগত অধিকাৰ নাগৰিকত্ব প্ৰৱৰ্তন কৰে।
