Elon Musk
ভাৰতত ভোটাৰক উৎসাহিত কৰিবলৈ দিয়া অনুদান বন্ধ!
মোডীক লগ পোৱাৰ পাছত “বন্ধু” ট্ৰাম্পৰ পদক্ষেপ
ভাৰতীয় ভোটাৰসকলক উৎসাহিত কৰিবলৈ দিয়া অনুদান বন্ধ কৰিলে আমেৰিকাই । বিশ্বৰ বিভিন্ন প্ৰান্তত নিৰ্বাচন প্ৰক্ৰিয়া শক্তিশালী কৰিবলৈ ৪৮৬ নিযুত ডলাৰ আৱণ্টন কৰিছিল জো বাইডেনৰ প্ৰশাসনে।
তাৰ ভিতৰত দুই কোটি ১০ লাখ ডলাৰ ভাৰতৰ বাবে আবণ্টন দিয়া হৈছিল। সেই অনুদান বন্ধ কৰি দিছে আমেৰিকা প্ৰশাসনে।
উল্লেখ্য যে, আমেৰিকাত প্ৰধামন্ত্ৰী ভ্ৰমণৰ পাছতে প্ৰকাশ্যেত আহিলে মাৰ্কিন প্ৰশাসনৰ এই পদক্ষেপ ।
সঠিক বিষয়টো কি ? ড’নাল্ড ট্ৰাম্প প্ৰশাসনৰ চৰকাৰী দক্ষতা বিভাগে দেওবাৰে এক্স হেণ্ডেলত এটা প’ষ্ট কৰে । উল্লেখ্য যে, এই কাৰ্যালয়ৰ শীৰ্ষত আছে আমেৰিকাৰ কোটিপতি ইলন মাস্ক। পোষ্টটোত কোৱা হৈছে যে আমেৰিকা চৰকাৰৰ খৰচ কমাবলৈ কেইবাটাও অনুদান কৰ্তন কৰা হৈছে।
বিশ্বৰ বিভিন্ন দেশত কোনবোৰ প্ৰকল্প বন্ধ হ’ব তাৰ তালিকাও সেই প’ষ্টটোত দিয়া হৈছে। তাত দেখা যায়, আমেৰিকাই ভাৰতীয়ক ভোট দিবলৈ উৎসাহিত কৰিবলৈ ২ কোটি ১০ লাখ ডলাৰ খৰচ কৰিছিল। ভাৰতীয় মুদ্ৰাত এই সংখ্যা প্ৰায় ১৮২ কোটি টকা।
কেৱল ভাৰতেই নহয়, মাস্কৰ কাৰ্যালয়ে বাংলাদেশ আৰু নেপালৰ দৰে আন বহুতো দেশৰ পৰা অনুদান বন্ধ কৰি দিছে।
লিংগ সমতা, গণতন্ত্ৰ, মহিলা সবলীকৰণৰ ক্ষেত্ৰতো সমগ্ৰ বিশ্বতে আবণ্টন কৰ্তন কৰা হৈছে। লক্ষণীয় যে কাৰ্যালয়ৰ দায়িত্ব লোৱাৰ পাছত, মাস্কে স্পষ্ট কৰি দিয়ে যে যদি ব্যয় হ্ৰাস কৰা নহয় তেন্তে আমেৰিকা সোনকালেই দেউলিয়া হৈ যাব।
