Sri Sri Jagannath’s wedding in Nalbari :
এমাহজোৰা নাম প্ৰসংগৰ অন্তত বৃহস্পতিবাৰে ৰাজহুৱা ভাবে অনুষ্ঠিত হয় এখন বিয়া ৷ বিয়াখন আকৌ সাধাৰণ বিয়া নহয়,মহাপ্ৰভু শ্ৰীশ্ৰী জগন্নাথৰ বিয়া ৷ বৰভাগ ৰাজহচক্ৰ অন্তৰ্গত ছমাৰকুছি নামৰ গাওঁখনত যুগ যুগ ধৰি উদযাপিত হৈ আছে বিয়াখন ৷
উল্লেখ্য যে গাওঁখনৰ জীয়ৰী-বোৱাৰীৰ লগতে একাংশ নেতৃস্থানীয় লোক এমাহ ধৰি ভীষণ ব্যস্ত হৈ পৰা দেখা গৈছে বিয়াখনকলৈ৷ ৷ বহাগ বিহুৰ পহিলা দিনটোত অৰ্থাৎ গৰুবিহুৰ দিনাৰ গাওঁ খনৰ যুৱতী কিশোৰী সকলে দুই ঠাইত দুটা কলপুলি পুটি উক্ত ঠাইত এমাহজুৰি নাম- প্ৰসংগ অনুষ্ঠিত কৰে ৷ এনেদৰে এমাহ পাল পাতি নাম ধৰাৰ অন্তত বহাগ আৰু জেঠ মাহৰ দোমাহীৰ দিনা পৰম্পৰা ৰীতি অনুযায়ী অনুষ্ঠিত কৰে বিয়াখন৷ ৷
সম্পূৰ্ণ বৈদিক পদ্ধতিত মানুহৰ বিয়াৰ নিছিনাকৈ অনুষ্ঠিত কৰে বিয়াখন ৷ দুই ঠাইৰ দুয়োটা কলপুলিক দৰা কইনা সজোৱা হয় ৷ আনহাতে দুজনী অকুমাৰী ছোৱালীৰ ভিতৰত এজনী দৰাৰ মাক আৰু এজনী কইনাৰ মাক হয় ৷ দুয়োজনীয়ে বিয়াৰ দিনা উপবাসে থাকে ৷ বিয়াৰ আগদিনা দৰা পক্ষৰৰ পৰা কইনা পক্ষলৈ জোৰণ পঠিয়াই ৷ জোৰণৰ সামগ্ৰী ভিতৰত সকলো ফুলৰ মালাহে থাকে ৷ কইনা পক্ষই দৰা মতাৰ বাবে এদাল ফুলৰ মালা ব্যৱহাৰ কৰে ৷
ঠিক তেনেদৰে বিয়াৰ দিনাখন দৰা কইনাৰ লগ্ন গাঠি দিয়াৰ বাবে এডাল দীঘল ফুলৰ মালা ব্যবহাৰ কৰে ৷ ঢোলতাল,বেণ্ডপাৰ্টি,আদি মাংগলিক বাদ্য বজাই নিশা কইনা পক্ষলৈ দৰা আহে ৷ দৰা প্ৰভু জগন্নাথ এটা সৰু কলপুলি ঠিক তেনেদৰে কইনা ঘুনুচাও এটা সৰু কলপুলি ৷ দুয়োটাকে ৰঙীন কাগজ কাপোৰ আৰু ফুলৰ মালাৰে সুন্দৰকৈ একোটা মুকুট বনাই সজাই পৰাই তোলে ৷
হোম যজ্ঞ আৰু আয়তীৰ উৰুলিৰ মাজতে জাক জাক বিয়াগীতৰ ধ্বনিত ৰজনজনাই যায় সমগ্ৰ অঞ্চলটো ৷ বিয়াৰ অন্তত দৰা -কইনাক গাৱঁৰ ৰাজহুৱা পুখুৰীত ধৰ্মীয় ৰীতিনীতি অনুযায়ী বিসৰ্জন দিয়ে ৷ প্ৰবাদ অনুযায়ী জানিব পৰা গৈছে যে অতীতত গাওঁখনত মহামাৰীয়ে গ্ৰাস কৰিছিল ৷ ইটোৰ পিচত সিটো পতিত হৈছিল মহামাৰীৰ গ্ৰাসত ৷ এনেকুৱা অৱস্থাতে কোনোবা এজনক মহাপ্ৰভু জগন্নাথে সপোন দেখুৱাই কৈছিল যে গাওঁবাসীয়ে যদি বছৰি উল্লেখিত দিনত মোৰ বিয়াখন পাতে তেতিয়া মহামাৰী আতৰিব ৷ সেইমতে তেতিয়াৰে পৰা গাওঁখনত জগন্নাথৰ বিয়াখন অনুষ্ঠিত হৈ আহিছে ৷