Jharkhand: ঝাৰখণ্ডত মাওবাদী বিৰোধী অভিযানত আন এক সফলতা। নিৰাপত্তাৰক্ষীৰ স’তে বন্দুকৰ যুঁজত নিহত শীৰ্ষ মাওবাদী নেতা। মঙলবাৰে পুৱা এই তথ্য প্ৰকাশ কৰে আৰক্ষীয়ে।
এই অভিযানত আহত হয় আন এজন মাওবাদী নেতা। যাৰ মূৰৰ দাম ১৫ লাখ টকা।
তথ্য অনুসৰি, সোমবাৰে নিশা আৰক্ষীয়ে গোপন সূত্ৰৰ পৰা পালামৌ জিলাৰ সীটাচুনা অঞ্চলত একাংশ মাওবাদী আত্মগোপন কৰি থকাৰ তথ্য লাভ কৰে। ইয়াৰ পাছতে নিৰাপত্তাৰক্ষীয়ে অভিযান চলায়। ঘন বনাঞ্চলত অনুসন্ধান আৰম্ভ হোৱাৰ লগে লগে মাওবাদীয়ে নিৰ্বিচাৰে নিৰাপত্তাৰক্ষীৰ ওপৰত গুলীচালনা আৰম্ভ কৰে।
দীৰ্ঘসময় ধৰি বন্দুকৰ যুঁজৰ অন্তত অৱশেষত নিহত হ’ল মাওবাদীৰ এগৰাকী শীৰ্ষ নেতা তুলসী ভূঞা। আহত আন এজন মাওবাদী নেতা। তেওঁৰ নাম নিতেশ যাদৱ। আৰক্ষীৰ সূত্ৰ অনুসৰি এই অভিযানত এটা ৰাইফলসহ কেবাটাও আগ্নেয়াস্ত্ৰ উদ্ধাৰ কৰা হৈছে।
উল্লেখযোগ্য যে,বিগত চাৰি দিনত ঝাৰখণ্ডত তিনিগৰাকী শীৰ্ষ মাওবাদী নেতাৰ মৃত্যু হৈছে। এই তালিকাত আছে মাওবাদী নেতা পাপ্পু লোহৰা। এই পাপ্পু ঝাৰখণ্ডৰ জনমুক্তি পৰিষদৰ মুৰব্বী। যাৰ মূৰৰ দাম আছিল ১০ লাখ টকা।
ঝাৰখণ্ডৰ সমান্তৰালকৈ নিৰাপত্তা বাহিনীয়েও চত্তীশগড়ত ৰঙা সন্ত্ৰাসবাদৰ অন্ত পেলাবলৈ ব্যাপক অভিযান আৰম্ভ কৰিছে।
উল্লেখ্য যে ,২০২৬ চনৰ মাৰ্চ মাহৰ ভিতৰত মাওবাদী মুক্ত ভাৰত গঢ়ি তোলাৰ বাৰ্তা দিছে গৃহমন্ত্ৰী অমিত শ্বাহে।
তেতিয়াৰ পৰাই চত্তীশগড়, ঝাৰখণ্ডৰ দৰে মাওবাদী আক্রান্ত ৰাজ্যত মাওবাদী বিৰোধী অভিযানে গতি লাভ কৰিছে।