Vitamin D : শিক্ষিতসকলে জানে যে শৰীৰে ঘাইকৈ সূৰ্যৰ পোহৰৰ পৰা ‘ডি’ ভিটামিন আহৰণ কৰে। ‘ডি’ ভিটামিনে শৰীৰৰ হাড়ৰ গঠন শক্তিশালী কৰাৰ কথাও বহুতৰে অৱগত।
কেৱল হাড়ৰ গঠনেই শক্তিশালী কৰা নহয়, ‘ডি’ ভিটামিনে আন কেতবোৰ গুৰুত্বপূৰ্ণ কাম কৰে। ইয়াৰ ভিতৰত ৰোগ প্ৰতিৰোধ, বার্ধক্য আগমনত বাধা দিয়া আদিও আছে।
এইসমূহ তথ্য শেহতীয়া এক গৱেষণাত পোহৰলৈ আহিছে। আমেৰিকা যুক্তৰাষ্ট্ৰৰ জর্জিয়া চিকিৎসা মহাবিদ্যালয় আৰু মাছ জেনেৰেল ব্রিগহামৰ বিজ্ঞানীসকলৰ গৱেষণাত পোহৰলৈ অহা অনুসৰি, শৰীৰত পৰ্যাপ্ত পৰিমাণৰ ‘ডি’ ভিটামিন থাকিলে ই বার্ধক্যৰ আগমনো পলম কৰে।
কাৰণ এই ভিটামিনৰ ‘এন্টি এজিং’ বা বার্ধক্য প্ৰতিৰোধৰ গুণ আছে। কোৱা বাহুল্য যে অধিকাংশ মানুহেই বার্ধক্যক আদৰি ল’ব নিবিচাৰে। সম্প্রতি এনে লোকসকললৈ স্বস্তিৰ বাৰ্তা প্ৰেৰণ কৰিছে উক্ত গৱেষকসকলে।
তেওঁলোকৰ গৱেষণাত পোহৰলৈ অহা মতে, বার্ধক্য প্রতিৰোধ একমাত্র ‘ডি’ ভিটামিনেহে কৰিব পাৰে। এই গৱেষণাৰ তথ্য আমেৰিকান জাৰ্ণেল অব ক্লিনিকেল নিউট্রিছনত প্রকাশ পাইছে।
কেনেদৰে ‘ডি’ ভিটামিনে বার্ধক্য প্ৰতিৰোধ কৰে!উক্ত গৱেষণাৰ স’তে জড়িত বিজ্ঞানীসকলৰ অন্যতম ডাঃ জোৱান মেন্সনে সাংবাদিকৰ আগত কয় যে শৰীৰত ভিটামিন ‘ডি’ ছাপ্লিমেন্ট বা পৰিপূৰকৰূপে থাকে। ইয়ে বার্ধক্য আগমন পলম কৰে।
শৰীৰৰ অভ্যন্তৰত প্রদাহ হ্রাস কৰি আৰু ৰোগ প্ৰতিৰোধী কোষসমূহক সক্রিয় ৰাখি তথা জটিল ৰোগৰ মাত্রা হ্রাস কৰি এই ভিটামিনে বাৰ্ধক্যৰ আগতীয়া আগমন প্রতিৰোধ কৰে। নতুন কোষৰ সৃষ্টিতো এই ভিটামিনে ভূমিকা পালন কৰে।
কেবল সেয়াই নহয় অস্থিমজ্জাত বীজ কোষত অবস্থান কৰি এই ভিটামিনে অনেক গুৰুত্বপূৰ্ণ কোষৰ সৃষ্টি কৰে। চিকিৎসা বিজ্ঞানীসকলৰ মতে, ৩০ বছৰ বয়সৰ পাছত মানৱ শৰীৰত প্ৰতি ১০ বছৰত হৃদযন্ত্র, যকৃত, বৃক্ক আৰু শ্ৰৱণশক্তিৰ কাৰ্যক্ষমতা পাঁচ-১০ শতাংশকৈ হাস পায়।
গতিকে ৫০ বছৰলৈ মানৱ শৰীৰৰ গুৰুত্বপূর্ণ অংগসমূহৰ ক্ষমতা প্রায় ২০ শতাংশ হ্রাস পায়। এই হিচাপত ৮০ বছৰত এজন ব্যক্তিৰ এনে অংগসমূহৰ ক্ষমতা ৫০ শতাংশ অথবা ততোধিক হ্রাস পায়।
ইয়াৰ কাৰণ হৈছে বয়স বৃদ্ধিৰ লগে লগে কোষৰ ক্ষয় আৰম্ভ হয়। সম্প্রতি গৱেষকসকলে প্রকাশ কৰিছে যে ‘ডি’ ভিটামিনে কোষৰ এই ক্ষয় হ্রাস কৰিব পাৰে। তেওঁলোকৰ মতে, কোষৰ মূল জিনগত উপাদান হ’ল ক্রম’জম।
ক্রম’জমসমূহ দেখাত ‘এক্স’ আখৰৰ নিচিনা। ইয়াৰ দুটা বাহুৰ সৰুটোৰ শেষ প্রান্তক টেল’মিয়াৰ বুলি কোৱা হয়। বয়স বৃদ্ধিৰ লগে লগে এই টেল’মিয়াৰতে ক্ষয় আৰম্ভ হয়। কোষৰ যিমানবাৰ বিভাজন ঘটে, তাৰ হিচাপো লিপিবদ্ধ থাকে।
যেতিয়া কোষৰ বিভাজন প্রক্রিয়া সম্পূর্ণরূপে বন্ধ হয় তেতিয়াই কোষৰ মৃত্যু হয়। সম্প্রতি গৱেষকসকলে দাবী কৰিছে যে ‘ডি’ ভিটামিনে এই প্রক্রিয়াক পিছুৱাব পাৰে।
গতিকে মানৱ শৰীৰত উপযুক্ত পৰিমাণৰ ‘ডি’ ভিটামিন বা ভিটামিন ‘ডি-৩’ থকাৰ প্ৰয়োজন। ইয়ে বয়স বৃদ্ধিৰ পাছতো শৰীৰৰ সকলো অংগ-প্রত্যংগ কার্যক্ষম কৰি বাখে। দৰাচলতে শৰীৰৰ বয়স বৃদ্ধি এই ভিটামিনে প্ৰতিৰোধ কৰে। এই সম্পর্কত অধিক গৱেষণা অব্যাহত আছে।