CM Visit Silchar: বান পৰিস্থিতিৰ বুজ ল’বলৈ বৰাকত উপস্থিত মুখ্যমন্ত্ৰী

CM Visit Silchar:

ৰাজ্যত অব্যাহত থকা নেৰানেপেৰা বৰষুণ আৰু চুবুৰীয়া পাৰ্বত্য ৰাজ্য কেইখনত হোৱা মুষলধাৰ বৰষুনৰ ফলত ব্ৰক্ষ্মপুত্ৰ আৰু বৰাক উপত্যকাত বানে লৈছে সংহাৰী ৰূপ ৷ উত্তৰ অসম আৰু বৰাক উপত্যকাৰ হাইলাকান্দি, কাছাৰ আৰু শ্ৰীভূমিত হোৱা বাঢ়নী পানীৰে ভয়ংকৰ ৰূপ লোৱাৰ পিছত মুখ্যমন্ত্ৰী ড:হিমন্ত বিশ্ব শৰ্মাই সোমবাৰে মুখ্যমন্ত্ৰী ড:হিমন্ত বিশ্ব শৰ্মাই লখিমপুৰৰ বান পৰিস্থিতিৰ বুজ লোৱাৰ পিছত মঙলবাৰে উপস্থিত হয় বৰাক উপত্যকাত ৷ কাছাৰ জিলাৰ সদৰ শিলচৰত উপস্থিত হৈ মুখ্যমন্ত্ৰী গৰাকীয়ে শিলচৰৰ গভৰ্নমেণ্ট বয়জ হায়াৰ ছেকেণ্ডেৰী স্কুল,শিলচৰ কেন্দ্ৰীয় বিদ্যালয়ৰ আশ্ৰয় শিৱিৰৰ লগতে আন চাৰিটা আশ্ৰয় শিৱিৰত বাহৰ পাতি থকা বানাক্ৰান্তক সাক্ষাৎ কৰি তেওঁলোকৰে মতবিনিময় কৰে ৷

আনহাতে ইয়াৰ পূৰ্বে কৃত্ৰিম বানৰ কবলত থকা শিলচৰৰ কছমিক মাৰ্কেটতো উপস্থিত হয় মুখ্যমন্ত্ৰী গৰাকী ৷ ইয়াৰ পিছতে কাছাৰ জিলা আয়ুক্ত কাৰ্যালয়ত আয়ুক্ত সহ বিভিন্ন বিভাগৰ বিষয়া সকলৰ স’তে এক বৈঠকত মিলিত হৈ বানাক্ৰান্ত অঞ্চলৰ লোকসকলৰ সকলো ধৰণৰ সহায়- সহযোগ কৰিবলৈ নিৰ্দেশ দিয়ে ৷

মুখ্যমন্ত্ৰী গৰাকীয়ে ইয়াৰ পিছতে এক সংবাদমেল সম্বোধন কৰি কয় যে,বৰাক উপত্যকাৰ বানাক্ৰান্ত অঞ্চলৰ বুজ লোৱাৰ বাবে আজি তেওঁ শিলচৰত উপস্থিত হৈছিল ৷ইতিমধ্যে তেওঁ শিলচৰৰ ছয়টা আশ্ৰয় শিৱিৰ পৰিদৰ্শন কৰি ১,৭৫০গৰাকী বানপীড়িত লোকৰ সৈতে মতবিনিময় কৰে বুলি উল্লেখ কৰাৰ লগতে সকলোৰে সুৰক্ষাজনিত দিশটো নিশ্চিত কৰি ঔষধ, পৰিষ্কাৰ পানী যোগান আদি উপলভ্য কৰাৰ বাবেও বিষয়াসকলক নিৰ্দেশ দিয়ে। তদুপৰি আশ্ৰয় শিবিৰত থকা লোকসকলক সকলো সহায় আগবঢ়াবলৈ প্ৰশাসন তৎপৰ বুলিও সদৰি কৰে মুখ্যমন্ত্ৰীয়ে ৷

ইতিমধ্যে দেশৰ প্ৰধানমন্ত্ৰী নৰেন্দ্ৰ মোদীয়ে তেওঁৰ স’তে ৰাজ্যৰ বান পৰিস্থিতিৰ বুজ লয় আৰু সাহায্য অভিযানৰ ক্ষেত্ৰত কেন্দ্ৰীয় চৰকাৰৰ পৰা সকলোখিনি সহযোগ আগবঢ়োৱাৰ প্ৰতিশ্ৰুতি প্ৰধানমন্ত্ৰীয়ে দিয়ে বুলি মুখ্যমন্ত্ৰীয়ে সদৰি কৰে ৷ আনহাতে আগন্তুক দুই-তিনিদিনৰ ভিতৰত পুনৰ বৰাকলৈ আহি শ্ৰীভূমিৰ বানাক্ৰান্তৰ বুজ ল’ব বুলি উল্লেখ কৰে মুখ্যমন্ত্ৰীয়ে ৷

উল্লেখ্য যে, কাছাৰ জিলা আয়ুক্তৰ সভাগৃহত মুখ্যমন্ত্ৰীৰ হাতত শিলচৰৰ কে’বা গৰাকী লোকে মুখ্যমন্ত্ৰীৰ সাহায্য পুঁজিলৈ ধন আগবঢ়াই ৷ উল্লেখযোগ্য বৰ্তমান বিপদসীমাৰ ওপৰেৰে বৈছে বৰাক নৈ ৷