তালাচি চলাই থকা অৱস্থাতে ট্ৰাকে মহটিয়াই নিলে কৰ্তব্যৰত আৰক্ষী কনিষ্টবলক ৷ আৰক্ষী বাহনে খেদি খেদি ধৰে ট্ৰাক সহ চালক- হেণ্ডিমেনক ৷
এই শোকাৱহ ঘটনা সংঘটিত হয় শ্ৰীভূমি জিলাৰ চুৰাইবাৰী আৰক্ষী থানাৰ সন্মুখত ৷ প্ৰাপ্ত খবৰ অনুসৰি থানা খনৰ সন্মুখত শনিবাৰে নিয়মীয়া তালাচি সময়ত এখন ট্ৰাকক ৰখাবলৈ সংকেত দিয়া হৈছিল যদিও আৰক্ষী সংকেতক আওকাণ কৰি দ্ৰুতবেগী ট্ৰাকখনে সেই সময়ত কৰ্তব্যৰত আৰক্ষী কনিষ্টবল উজ্জ্বল বৰাক মহটিয়াই পলায়ন কৰে ৷ কিন্ত আৰক্ষী বাহনে ট্ৰাকখন খেদি খেদি নি কিছু নিলগত কৰায়ত্ত কৰে ৷ এই ঘটনাত ট্ৰাক খন পথৰ কাষত বাগৰি পৰে ৷ আৰক্ষীয়ে ট্ৰাকখনত তালাচি চলাই বুজন পৰিমাণৰ ড্ৰাগছ জব্দ কৰাৰ লগতে আটক কৰে বাহন খনৰ চালক- হেণ্ডিমেনক ৷
আনহাতে ড্ৰাগছ সৰবৰাহকাৰী বাহন খনৰ খুন্দাত থিতাতে নিহত হয় কনিষ্টবল উজ্জ্বল বৰা ৷ ইতিমধ্যে ঘটনাস্থলীত উচ্চপদস্থ আৰক্ষী বিষয়া ঘটনাস্থলীত উপস্থিত হৈ পৰিস্থিতিৰ বুজ লোৱাৰ লগতে আৰক্ষী কনিষ্টবলজনৰ নশ্বৰদেহ মৰনোত্তৰ পৰীক্ষাৰ বাবে শ্ৰীভূমি চিভিল হাস্পতাললৈ প্ৰেৰণ কৰিছে। আৰক্ষী কনিষ্টবলজনৰ শোকাৱহ মৃত্যুত গভীৰ শোকৰ ছাঁ পৰিছে চুৰাইবাৰী আৰক্ষী থানাত ৷
