Attack On CM’s Convoy:
কঠোৰ নিৰাপত্তা ব্যৱস্থাৰ মাজতো গোলাঘাটত সোমবাৰে মুখ্যমন্ত্রী ড: হিমন্ত বিশ্ব শৰ্মাৰ কনভয়লৈ দুষ্কৃতিকাৰীয়ে শীতল পানীয়ৰ বটল নিক্ষেপ কৰে। আৰক্ষীৰ সন্মুখতে সংঘটিত এই ঘটনাত দলিয়াই দিয়া বটলটোরে কনভয়ৰ এখন বাহনত খুন্দা মাৰি ওফৰি পৰে।
সেই সময়তে প্রতিবাদকাৰীসকলৰ মাজৰ পৰা কোনোৱে কনভয়ক লক্ষ্য কৰি পানীয়ৰ বটলটো দলিয়াই দিয়ে। এই ঘটনাত জড়িতৰ অভিযোগত গোলাঘাট আৰক্ষীয়ে অসম প্রদেশ যুৱ কংগ্ৰেছ কমিটীৰ সাধাৰণ সম্পাদক তথা গোলাঘাট জিলা যুৱ কংগ্ৰেছৰ তত্ত্বাৱধায়ক পাৰ্থ সাৰথি বৰা, গোলাঘাট জিলা যুৱ কংগ্ৰেছৰ সভাপতি ৰূপান্তৰ তাঁতীৰ লগতে কৃষ্ণা চুতীয়া আৰু ৰাহুল শইকীয়া নামৰ দুজনকো আটক কৰে। আৰক্ষীয়ে সৰুপথাৰৰ পৰা পুনৰ আৰু এজনক আটক কৰে। আটকাধীন কংগ্ৰেছ কৰ্মীজনৰ নাম ৰাহুল ফুকন ৷
আনহাতে, গোলাঘাট জিলা কংগ্রেছে বটল দলিওৱা কাৰ্যক গৰিহণা দি এয়া কোনো তৃতীয় পক্ষৰ কাম বুলি দাবী কৰে। ইপিনে, প্রতিবাদকাৰীসকলে মুখ্যমন্ত্ৰী আৰু মন্ত্রী জয়ন্ত মল্ল বৰুৱাৰ পুত্তলিকা দাহ কৰে। তেওঁলোকে চৰকাৰ বিৰোধী আৰু চৰকাৰৰ বিৰুদ্ধে কেলেংকাৰিৰ অভিযোগ তুলি বিভিন্ন ধ্বনি দিয়ে। প্রতিবাদকাৰীসকলে দলীয় কাৰ্যালয়ৰ চৌহদৰ পৰা ৰাজপথলৈ ওলাই অহাৰো চেষ্টা চলায়। আৰক্ষীয়ে ইয়াত বাধা প্ৰদান কৰাত দুয়োপক্ষৰ মাজত খণ্ড যুদ্ধও লাগে।
