Road and Rail connection have become dangerous between Barak and Brahmaputra:
পথ মুকলি হ’বলৈ ধৰাৰ সময়তে ভূমিস্খলনে পুনৰ গুৰুতৰ ৰূপ ধাৰণ কৰিছে লামডিং-বদৰপুৰ ৰেলপথত। সমান্তৰালভাৱে স্থলপথো অতি নিয়ন্ত্রিত ৰূপত মুকলি কৰা হৈছে যদিও পৰিস্থিতি যথেষ্ট স্পর্শকাতৰ হৈ আছে।
পাহাৰৰ বোকা-মাটিয়ে স্থলপথ আৰু ৰেলপথৰ ওপৰত বৃহৎ বৃহৎ দ’মৰ সৃষ্টি কৰিছে। বিগত দুসপ্তাহে পথ যোগাযোগ ব্যাহত হৈ থকাত ৰেল যোগাযোগৰ ওপৰতে সাধাৰণ যাত্রীয়ে অধিক নিৰ্ভৰ কৰিছিল; কিন্তু ঠায়ে ঠায়ে ৰেলপথতো ভূমিস্খলন সংঘটিত হয়। ৰেলপথৰ তেনে অংশ মোকলাই নিয়ন্ত্রিত ৰূপত দুই-এখন ৰেলৰ চলাচল উত্তৰ-পূব সীমান্ত ৰেলৱে আৰম্ভ কৰে যদিও কালি মুপা আৰু দিহাখো ষ্টেছনৰ মাজত পাহাৰীয়া অঞ্চলত ব্যাপক ৰূপত ভূমিস্খলন হয়।
পাহাৰৰ খহি পৰা বৃহৎ বৃহৎ অংশই লামডিং-বদৰপুৰ সংযোগী ৰেলপথছোৱাৰ বহু ঠাই পুতি পেলাইছে। সেইবোৰ মোকলাবলৈ ৰেল বিভাগক যথেষ্ট সময়ৰ প্ৰয়োজন হ’ব। এই ভূমিস্খলনৰ পৰিণতিত ব্ৰহ্মপুত্ৰ আৰু বৰাক উপত্যকাৰ মাজত পথ আৰু ৰেল যোগাযোগ স্থবিৰ হৈ পৰিছে। উত্তৰ-পূব সীমান্ত ৰেলৱেৰ তথ্য অনুসৰি বৃহৎ ভূমিস্খলনৰ বাবেই ব্ৰহ্মপুত্ৰ-বৰাক সংযোগী ১২ খন ৰেলৰ চলাচল সাময়িকভাৱে বন্ধ ঘোষণা কৰা হৈছে।
ছখন ৰেল আংশিকভাবে বাতিল কৰা হৈছে আৰু দুখন ৰেলৰ সময়সূচী পুনৰ নিৰ্ধাৰণ কৰা হৈছে। ৰেলেই যাতায়াতৰ মুখ্য বুলি গ্ৰহণ কৰি অহা হেজাৰ হেজাৰ যাত্ৰীৰ বাবে উত্তৰ-পূব সীমান্ত ৰেলৱে কর্তৃপক্ষই একমাত্ৰ নিৰাপত্তাজনিত কাৰণতে এনে সিদ্ধান্ত গ্রহণ কৰিবলৈ বাধ্য হোৱা বুলি সদৰী কৰে। সম্পূৰ্ণভাৱে বাতিল কৰা ৰেলকেইখন হ’ল ৰঙিয়া-শিলচৰ এক্সপ্ৰেছ, শিলচৰ-ৰঙিয়া এক্সপ্ৰেছ, শিলচৰ-গুৱাহাটী আৰু গুৱাহাটী-শিলচৰ এক্সপ্ৰেছ, দুল্লভচেৰা-গুৱাহাটী, গুৱাহাটী-বদৰপুৰ ট্যুৰিষ্ট এক্সপ্ৰেছ, শিলচৰ-কলকাতা-শিলচৰ আৰু আগৰতলা-গুৱাহাটী-আগৰতলা।
ৰেল বিভাগৰ এনে সিদ্ধান্তই কেৱল অসমৰে নহয়, বৰাকৰ গাত লাগি থকা চুবুৰীয়া ৰাজ্য কেইখনৰো যাতায়াতত প্ৰভাৱ বিস্তাৰ কৰিছে। বিশেষকৈ ত্ৰিপুৰাৰ ৰেল যোগাযোগ ব্যৱস্থা ব্যাহত হৈছে। চৰম হাৰাশাস্তিৰ সম্মুখীন হৈছে দূৰণিবটীয়া যাত্ৰীসকল। ৰেলপথছোৱাত ভূমিস্খলন পূৰ্বৰে পৰা চলি আহিছে। এনে ক্ষেত্রত ভূমিস্খলন ৰোধৰ শক্তিশালী পদক্ষেপ গ্রহণ নকৰাৰ বাবেই বাৰম্বাৰ এনে জটিলতা সৃষ্টি হৈ আহিছে।