Rafale Jet :
বিগত ভাৰত-পাকিস্তান যুদ্ধৰ সময়ত মাজ আকাশত যান্ত্রিক বিজুতি ঘটি এখন অত্যাধুনিক ৰাফেল বিমান ভাঙি পৰিছিল। পাকিস্তানৰ আক্ৰমণত ভাৰতৰ তিনিখন ৰাফেল যুদ্ধবিমান ধ্বংস হোৱাৰ কথা অস্বীকাৰ কৰি এই মন্তব্য কৰিছে এই অত্যাধুনিক বিমান তৈয়াৰকাৰী ফৰাচী প্রতিষ্ঠান ডাছাউ এভিয়েছনৰ মুৰব্বী এবিক টাপিয়াৰে। সংবাদ মাধ্যমৰ আগত টাপিয়াৰে কয় যে অপাৰেছন সিন্দুৰ চলি থকাৰ সময়ত মাজ আকাশত উৰি থকা অৱস্থাত এখন ৰাফেল যুদ্ধবিমানৰ যান্ত্রিক বিজুতি ঘটাত বিমানখন ভাঙি পৰে।
উল্লেখ্য যে বিশ্বৰ অতি উন্নতমানৰ যুদ্ধবিমানসমূহৰ প্ৰথম শাৰীতে আছে ৰাফেল যুদ্ধবিমান। এনে যুদ্ধবিমানৰ গৰাকী হোৱা বাবে ভাৰতে গৰ্ব কৰি আহিছে। নৰেন্দ্ৰ মোদী চৰকাৰে কিছু বছৰ পূৰ্বে ৩৬ খন ৰাফেল যুদ্ধবিমান ক্রয় কৰি আনে। সম্প্রতি ৬৩ হেজাৰ কোটি টকাত আৰু ২৬ খন ৰাফেল যুদ্ধবিমান ক্ৰয়ৰ প্ৰস্তুতি চলাই আছে ভাৰতে।
উল্লেখ্য যে মোদী চৰকাৰে ৰাফেল যুদ্ধ বিমান ক্ৰয় কৰাক লৈ দেশত তুমুল বিতৰ্কৰ সৃষ্টি হৈছিল। আনকি এই বিতর্কই উচ্চতম ন্যায়ালয়ৰ মজিয়াও স্পর্শ কৰিছিল। অৱশ্যে ন্যায়ালয়ে চৰকাৰৰ পক্ষে ৰায় দিয়াত বিতর্কটো পৰৱৰ্তী সময়ত নিশকতীয়া হয়। কিন্তু যোৱা মে’ত পাক-ভাৰত যুদ্ধৰ সময়ত পাকিস্তানে ভাৰতৰ ৰাফেলসহ ছখনকৈ যুদ্ধবিমান ধ্বংস কৰা বুলি দাবী কৰাত বিতর্কই পুনৰ প্ৰাণ পাই উঠে।
আনকি ৰাফেল যুদ্ধবিমান ক্রয়ত ব্যাপক দুর্নীতি-অনিয়ম সংঘটিত হোৱা বুলি সৰৱ হৈ উঠে বিজেপি নেতা ড: সুব্রমণিয়াম স্বামী। ইয়াৰ পাছতে দেশৰ সামৰিক বাহিনীসমূহৰ মুৰব্বী (চিডিএছ) অনিল চৌহানে এটা মার্কিন সংবাদ মাধ্যমৰে হোৱা সাক্ষাৎকাৰত অপাৰেছন সিন্দূৰত ভাৰতৰ যুদ্ধবিমান ধ্বংস হোৱাৰ কথা প্রকাশ কৰে।
অৱশ্যে তেওঁৰ ভাষ্যত ৰাফেল যুদ্ধবিমান ধ্বংস হোৱাৰ কথা স্পষ্ট হোৱা নাছিল। সেনা মুৰব্বী চৌহানৰ এই সাক্ষাৎকাৰৰ পাছতে ডাছাউ এভিয়েছনৰ মুখ্য কাৰ্যবাহী বিষয়া নাগৰি টাপিয়েৰে দাবী কৰে যে পাকিস্তানে ৰাফেল যুদ্ধবিমান ধ্বংস কৰা বুলি দাবী উত্থাপন কৰাটো সঠিক হোৱা নাই। তেতিয়া তেওঁ লগতে কয়, ‘এই সম্পর্কত ভাৰতে একো জনোৱা নাই। তথাপি তিনিখন ৰাফেল বিমান গুলীয়াই ভূপতিত কৰাৰ দাবী সঠিক নহয়।’ ডাছাউ এভিয়েছনৰ মুৰব্বীজনে দাবী কৰে যে পাকিস্তানী সেনাৰ গুলিত নহয়, যান্ত্রিক বিজুতিৰ ফলতহে এখন ৰাফেল যুদ্ধবিমান ভাঙি পৰে ৷