China:✒️সমগ্র দক্ষিণ-পূব এছিয়াত প্ৰভাৱ অধিক বৃদ্ধিৰ উদ্দেশ্যে চীনে আন এক কৌশল গ্রহণ কৰিলে। ইয়াৰ আধাৰত বেইজিঙে দেশখনৰ অভ্যন্তৰৰ বিভিন্ন নদ-নদীৰ পৰা সাগৰলৈ জাহাজ চলাচল কৰিব পৰাকৈ ১৩৪ কিলোমিটাৰ দৈৰ্ঘ্যৰ এক নলাৰ খনন অব্যাহত ৰাখিছে।
এই নলা খনন সম্পন্ন হৈ উঠিলে বয়-বস্তুবাহী জাহাজে সাগৰলৈ যাত্ৰা কৰিব পাৰিব। ইয়াৰ জৰিয়তে চীনে দক্ষিণ-পূব এছিয়াৰ স’তে ব্যৱসায়-বাণিজ্য অধিক বৃদ্ধিৰ লক্ষ্য লৈছে। এই বৃহৎ নলাৰ নাম হৈছে পিংগলু কেনেল।
এই নলা খননৰ স’তে জড়িতসকলে ধাৰণা কৰা অনুসৰি চলিত বর্ষতে এই নলা খনন সম্পূৰ্ণ হ’ব। ইয়াৰ লগে লগে দেশখনৰ নানিঙৰ দৰে চহৰসমূহৰ পৰা অনায়াসে বয়-বস্তু লৈ জাহাজে সাগৰলৈ চলাচল কৰিব পাৰিব।
এই নলা পথে নানিং চহৰক টনকিং উপসাগৰৰ স’তে সংযোগ কৰিছে। নানিং হৈছে গুৱাংক্সি অঞ্চলৰ ৰাজধানী। সাগৰত মিলিত হোৱাৰ পূৰ্বে এই নলাৰ অধিকাংশ কিনজিয়াং নৈৰে পাৰ হৈছে। সহজ অর্থত ক’বলৈ গ’লে এই নলা খননৰ উদ্দেশ্য হৈছে দেশখনৰ ভূখণ্ডৰ নদ-নদীসমূহৰ স’তে সাগৰক সংযোগ কৰা।
গতিকে যেতিয়াই এই নলা খনন সম্পূর্ণ হ’ব, তেতিয়াৰ পৰা ইলেক্ট্র’নিক সেৱা সঁজুলিকে ধৰি খাদ্য সামগ্রী আদি জাহাজে পৰিবহণ কৰিব পাৰিব। সেয়েহে চীন চৰকাৰে এই নলা খননত অপর্যাপ্ত ধন ব্যয় কৰিছে।
অৱশ্যে এই নলা খননৰ ফলত বিভিন্ন নদ-নদীৰ মাছ-কাছকে ধৰি সমগ্ৰ জৈৱ বৈচিত্র্যলৈ ভাবুকি সৃষ্টিৰ আশংকা কৰিছে প্রকৃতিবিদসকলে। একাংশ প্রকৃতিবিদৰ মতে এই নলা খননৰ ফলত ৩৬ টা পৰিৱেশতন্ত্রগত সংৰক্ষণ মণ্ডললৈ প্ৰচণ্ড ভাবুকিৰ সৃষ্টি হৈছে।
অৱশ্যে প্রকৃতিবিদসকলৰ এই আশংকা অমূলক আখ্যা দি চীন চৰকাৰে দাবী কৰিছে যে এই নলাৰে জাহাজ চলাচলৰ ফলত মাছ-কাছ আদিলৈ বিপদ নহাৰ ব্যৱস্থা কৰা হৈছে। এই উদ্দেশ্যে স্মার্ট নিৰীক্ষণ ব্যৱস্থা গঢ়ি তোলা হৈছে বুলিও চৰকাৰে দাবী কৰিছে।
তৎসত্ত্বেও একাংশ গৱেষকে আঙুলিয়াই দিছে যে সাগৰৰ স’তে সংযুক্ত এই নলাৰে সাগৰৰ লুণীয়া পানী সোমাই আহি বিভিন্ন নদীৰ মৎস্যকুল ধ্বংস কৰিব। এটা সময়ত দেশখনৰ আভ্যন্তৰীণ জলভাগৰ সমষ্ট জৈৱ বৈচিত্র্যকে ধ্বংস কৰিব বুলিও গৱেষকসকলে আশংকা কৰিছে; কিন্তু এনে আশংকালৈ চৰকাৰে মুঠেও কর্ণপাত কৰা নাই।
সেই অনুসৰি ইতিমধ্যে এই নলাৰ নিৰ্মাণ কাম বহুখিনি আগুৱাই নিয়া হৈছে। নিৰ্ধাৰিত সময়ৰ ভিতৰত কাম শেষ কৰিবলৈ সংশ্লিষ্টসকলে চেষ্টা অব্যাহত ৰাখিছে।
