Iran-Israel-war:✒️হৰমুজ প্ৰণালীত অবৰোধ আঁতৰাই বিশ্বৰ এই গুৰুত্বপূর্ণ জলপথ পুনৰ স্বাভাৱিক কৰাৰ লক্ষ্যৰে এক বিশেষ চুক্তিত সন্মত হৈছে ইৰাণ আৰু আমেৰিকা যুক্তৰাষ্ট্ৰই ।
শেহতীয়াকৈ প্ৰকাশিত এক প্ৰতিবেদনত তেনে দাবী কৰা হৈছে। ইয়াৰ পিছতেই সকলোৰে মাজত উদয় হৈছে এটা প্ৰশ্ন— তেন্তে কি অৱশেষত মধ্যপ্ৰাচ্যত স্থায়ীভাৱে বন্ধ হ’ব নেকি যুদ্ধ?
তথ্য অনুসৰি, বৃহস্পতিবাৰে ইৰান আৰু আমেৰিকাই এই চুক্তিত স্বাক্ষৰ কৰিবলৈ সন্মত হৈছে। সেই চুক্তি অনুসৰি, দুয়ো পক্ষই শীঘ্ৰে হৰমুজ প্ৰণালীত জাৰি থকা অবৰোধ আঁতৰাই দিব। ফলত বিশ্বৰ অন্যতম গুৰুত্বপূর্ণ এই জলপথ পুনৰ আগৰ দৰে স্বাভাৱিক ছন্দলৈ উভতি যাব।
এক প্ৰতিবেদনত দাবী কৰা হৈছে যে, আগন্তুক কেইঘণ্টামানৰ ভিতৰতে এই চুক্তি স্বাক্ষৰিত হ’ব পাৰে। এই চুক্তি কার্যকৰী হোৱাৰ পাছত হৰমুজত আবদ্ধ হৈ থকা পণ্যবাহী জাহাজসমূহ পুনৰ নিৰ্বিঘ্নে নিজৰ গন্তব্যস্থানলৈ যাত্ৰা কৰিব পাৰিব।
যদিও এই বিষয়ত এতিয়ালৈকে ৱাশ্বিংটন (Washington), D.C. অথবা তেহৰাণ— কোনো পক্ষই আনুষ্ঠানিকভাৱে মুখ খোলা নাই।
বিশেষজ্ঞসকলৰ মতে, যদি সঁচাকৈয়ে দুয়ো দেশৰ মাজত এই চুক্তি স্বাক্ষৰিত হয়, তেন্তে মধ্যপ্ৰাচ্যৰ যুদ্ধ পৰিস্থিতিৰ স্থায়ী সমাধানৰ সম্ভাৱনা সৃষ্টি হ’ব পাৰে।
ইফালে, মার্কিন ৰাষ্ট্ৰপতি ড’নাল্ড ট্ৰাম্প(Donald Trump)ৰ ‘প্ৰজেক্ট ফ্ৰিডম’ক কেন্দ্ৰ কৰি আমেৰিকা আৰু ইৰানৰ মাজত নতুনকৈ উত্তেজনা বৃদ্ধি পাইছিল।
ইৰানে দাবী কৰিছিল যে, তেওঁলোকে মার্কিন যুদ্ধজাহাজ লক্ষ্য কৰি আক্ৰমণ চলাইছে। ওলোটাই আমেৰিকাই জনায়, ইৰানে আক্ৰমণৰ চেষ্টা কৰিছিল যদিও সেই আক্ৰমণ সফলভাৱে প্ৰতিহত কৰা হৈছে আৰু ইৰানৰ ৬খন নৌকা ধ্বংস কৰা হৈছে।
আনহাতে, সংযুক্ত আৰব আমিৰশ্বাহীৰ তেল ভাণ্ডাৰ লক্ষ্য কৰি ড্ৰোন আক্ৰমণ চলোৱাৰ অভিযোগো উঠিছে ইৰানৰ বিৰুদ্ধে। এই ঘটনাৰ পিছতেই মার্কিন প্ৰতিৰক্ষা সচিব পিট হেগছেথে(Pete Hegseth) কয়, “আমি যুদ্ধ কৰিব বিচৰা নাই। তেওঁলোকে কৈছে যে তেওঁলোকেই প্ৰণালী নিয়ন্ত্ৰণ কৰি আছে। কিন্তু বাস্তৱত সেয়া নহয়। আমেৰিকাই ইৰানৰ আক্ৰমণৰ পৰা জাহাজসমূহক সুৰক্ষা প্ৰদান কৰি আছে।”