আকৌ দুর্ঘটনাগ্রস্ত হ’ল ভাৰতীয় বায়ুসেনাৰ জাগুৱাৰ যুদ্ধবিমান। বুধবাৰে দুপৰীয়া ১-২৫ বজাত ৰাজস্থানৰ চুৰু জিলাৰ ৰতনগড় চহৰৰ ওচৰৰ ভান’দা গাঁৱত এখন দুটাইঞ্জিনযুক্ত জাগুৱাৰ যুদ্ধবিমান ভূপতিত হয়।
নিয়মীয়া অনুশীলনৰ সময়ত সংঘটিত ভয়াবহ দুর্ঘটনাটোত বায়ুসেনাৰ দুজন বৈমানিকৰ মৃত্যু হয়। বিমানখনে ৰাজস্থানৰ ছুৰটগড় বায়ুসেনা ঘাটিৰ পৰা উৰা মৰাৰ কিছু সময়ৰ পাছতে ভূপতিত হয়।
সৌভাগ্যবশতঃ বিমানখনৰ দুৰ্ঘটনাত স্থানীয় লোকৰ কোনো ক্ষয়ক্ষতি হোৱা নাই। আনহাতে, ঘটনাৰ তদন্তৰ নিৰ্দেশ দিছে ভাৰতীয় বায়ুসেনাই। বৈমানিক দুজনৰ মৃত্যুত বায়ুসেনাই শোক প্রকাশ কৰাৰ লগতে দুয়োৰে পৰিয়ালবৰ্গলৈ সমবেদনা জনাইছে।
উল্লেখ্য যে আজিলৈ চলিত বর্ষতে ভাৰতীয় বায়ুসেনাৰ তিনিখন জাগুৱাৰ যুদ্ধবিমান উৰণৰত অৱস্থাত ধ্বংস হয়। ইয়াৰে প্ৰথমটো ঘটনা যোৱা সাত মার্চত হাৰিয়ানাৰ পাঞ্চকুলাত সংঘটিত হয়।
দ্বিতীয়টো দুর্ঘটনা যোৱা দুই এপ্রিলত গুজৰাটৰ জামনগৰৰ ওচৰত সংঘটিত হয়। এই দুর্ঘটনাত সিদ্ধার্থ যাদৱ নামৰ এজন বৈমানিকৰ প্ৰাণহানি হয়। বৈমানিকজনে সহকর্মী বৈমানিকজনৰ প্ৰাণৰক্ষা কৰিবলৈ গৈ নিজৰ প্ৰাণ বিসর্জন দিয়ে।
আনজন বৈমানিকৰ দৈব্যক্রমে প্ৰাণৰক্ষা পৰে। দুর্ঘটনাটোত তেওঁ কিঞ্চিতহে আঘাত পায়। আনহাতে, দুর্ঘটনাটোত মৃত্যুবৰণ কৰা বৈমানিকজনে বিবাহৰ প্রস্তুতিও চলিছিল। তেওঁ ঘৰৰ একমাত্র পুত্ৰ আছিল।
পুত্রই সহকর্মী বৈমানিকজনৰ প্ৰাণৰক্ষা কৰিবলৈ গৈ নিজৰে প্ৰাণ বিসর্জন দিয়া সম্পর্কত তেওঁৰ পিতৃ সুশীল যাদবে সাংবাদিকৰ আগত কয়, ‘মই অতি গর্বিত। আনজনৰ প্ৰাণৰক্ষা কৰিবলৈ গৈ তেওঁ নিজৰ জীৱন হেৰুৱালে। কিন্তু তেওঁক হেৰুওৱাটো আমাৰ বাবে দুখদায়ক। কাৰণ তেওঁ মোৰ একমাত্র পুত্র আছিল।’
ইপিনে, যোৱা সাত মার্চত সংঘটিত জাগুৱাৰ শ্ৰেণীৰ এখন যুদ্ধবিমানৰ দুর্ঘটনাত সৌভাগ্যবশতঃ বৈমানিকৰ কোনো ক্ষতি নহ’ল। ধ্বংসপ্রাপ্ত বিমানখনৰ পৰা বৈমানিকজনক নিৰাপদে উদ্ধাৰ কৰা হয়।
উল্লেখ্য যে সম্প্রতি ভাৰতীয় বায়ুসেনাৰ ওচৰত কমেও ১২০ খন জাগুৱাৰ যুদ্ধবিমান আছে। এনে বিমান এটা বা দুটা ইঞ্জিনযুক্ত হয়। একেদৰে এনে এখন বিমানৰ আসন এখন বা দুখন হয়।
অৱশ্যে জাগুৱাৰ বিমান পুৰণি বিমান বুলিও চর্চিত হয়। তৎসত্ত্বেও ভাৰতীয় বায়ুসেনাই এই শ্ৰেণীৰ বিমান ব্যৱহাৰ কৰি আছে। অৱশ্যে এই শ্ৰেণীৰ বিমানৰ ব্যাপক উত্তৰণ সাধন কৰা হৈছে বুলি সূত্রই জনায়।