Opposition Protests✒️হাতে হাতে প্লেকার্ড লৈ শ্ল’গান দি অব্যাহত ৰখা বিৰোধীৰ প্ৰতিবাদত আজিও পুৱাৰে পৰা কে’বাবাৰো স্থগিত ৰাখিবলগীয়া হয় সংসদৰ বৰ্ষাকালীন অধিবেশনৰ কাৰ্যসূচী।
অপাৰেছন সিন্দুৰক লৈ আলোচনাৰ দাবীত লোকসভাত তীব্ৰ কোলাহলৰ সৃষ্টি হয়। একে সময়তে ৰাজ্যসভাত বিৰোধীয়ে উত্থাপন কৰে বিহাৰত ভোটাৰ তালিকা সংশোধনীৰ প্ৰসংগ। এই দুই বিষয়ত আলোচনাৰ দাবীত সংসদৰ উভয় সদনত প্রতিবাদমুখৰ হৈ পৰে বিৰোধী।
সোমবাৰে অধিবেশনৰ প্রথমদিনাই বিৰোধীয়ে আগ্রাসী ৰূপ লৈছিল আৰু কালিও বিৰোধীয়ে অধিবেশনৰ দ্বিতীয়দিনা চৰকাৰৰ সমালোচনাত মুখৰ হয়। মঙলবাৰে দিনৰ ১১ বজাত লোকসভাৰ অধিবেশন আৰম্ভ হোৱাৰ পাছতে কংগ্ৰেছসহ বিৰোধী সাংসদসকলে আসন ত্যাগ কৰি বাহিৰলৈ ওলাই আহে আৰু অপাৰেছন সিন্দুৰক লৈ আলোচনাৰ দাবীত সৰৱ হয়।
কেন্দ্ৰীয় কৃষিমন্ত্রী শিৱৰাজ সিং চৌহানে তেওঁলোকক সদনৰ ভিতৰলৈ যাবলৈ অনুৰোধ জনায়। সেই সময়ত হ’বলগীয়া কৃষি সংক্রান্তীয় বিষয়ত আলোচনাত অংশ ল’বলৈ মন্ত্রী চৌহানে বিৰোধীক অনুৰোধ জনায়। লোকসভাৰ অধ্যক্ষ ওম বিৰলায়ো বিৰোধীক নিজ আসন গ্ৰহণৰ বাবে অনুৰোধ জনায়।
সদনত হাতে হাতে প্লেকার্ড লৈ শ্ল’গান নিদিবলৈ তেওঁ কয় বিৰোধীক। অৱশ্যে ইয়াৰ পাছতো তীব্র হট্টগোল অব্যাহত থাকে। ফলত প্ৰথমতে দিনৰ ১২ বজা পর্যন্ত সদন স্থগিত কৰে অধ্যক্ষ বিৰলাই।
দিনৰ ১২ বজাত পুনৰ লোকসভাৰ অধিবেশন আৰম্ভ হোৱাত বিৰোধীয়ে একে দাবীতে সৰৱ হয়। অপাৰেছন সিন্দূৰক লৈ আলোচনাৰ দাবীত হুলস্থুলীয়া পৰিৱেশৰ সৃষ্টি কৰে।
সংসদীয় পৰিক্ৰমা বিভাগৰ ৰাজ্যিক মন্ত্রী অর্জুন ৰাম মেঘৱালে কয় যে অধ্যক্ষৰ অনুমতি সাপেক্ষে চৰকাৰে যিকোনো বিষয়ে আলোচনাৰ বাবে প্রস্তুত। বিৰোধী সাংসদসকলক তেওঁ আসন গ্রহণ কৰিবলৈ কয়। ইয়াৰ পাছতো হট্টগোল অব্যাহত থকাত পুনৰ দিনৰ দুই বজা পর্যন্ত সদন স্থগিত ৰখা হয়।
এই সময়ছোৱাত বিৰোধীয়ে বাহিৰলৈ ওলাই যায় আৰু বিহাৰত ভোটাৰ তালিকা সংশোধনক লৈ প্রশ্ন উত্থাপন কৰে। লোকসভাত বিৰোধী দলপতি ৰাহুল গান্ধী, সমাজবাদী পার্টিৰ নেতা অখিলেশ যাদৱসহ অন্যান্য বিৰোধী সাংসদসকলে সদনৰ বাহিৰলৈ গৈ বিক্ষোভ প্রদর্শন কৰে।
ইপিনে, ৰাজ্যসভাত দেশৰ নিৰ্বাচন আয়োগৰ ভোটাৰ তালিকাৰ বিশেষ পুনৰীক্ষণক লৈ আলোচনাৰ দাবী উত্তাপন কৰে বিৰোধী সাংসদে।
জগদীপ ধনখড়ৰ পদত্যাগ হেতুকে কালি ৰাজ্যসভাৰ কাম-কাজ পৰিচালনা কৰে উচ্চ সদনৰ উপাধ্যক্ষ হৰি বংশ নাৰায়ণ সিঙে। অধিবেশনৰ আৰম্ভণিতে ১০জন বিৰোধী সাংসদে অবিলম্বে আলোচনাৰ দাবী উত্থাপন কৰে। একে সময়তে ধনখড়ৰ পদত্যাগক লৈও এজন সাংসদে আলোচনাৰ দাবী তোলে।
বিৰোধীৰ হুলস্থূলত একেদৰে ৰাজ্যসভাৰ অধিবেশন দিনৰ ১২ বজালৈ স্থগিত ৰখা হয়। পাছত দিনৰ ১২ বজাত অধিবেশন আৰম্ভ হোৱাত ভোটাৰ তালিকা সংশোধনীৰ প্ৰসংগত আলোচনাৰ দাবীত সৰৱ হয় বিৰোধী।
পৰিস্থিতি অতি হুলস্থুলীয়া হোৱাত দিনৰ দুই বজালৈ অধিবেশন স্থগিত ৰখা হয়। এইদৰে বাৰে বাৰে অধিবেশনৰ কাম-কাজ ব্যাহত হোৱাৰ পৰিপ্ৰেক্ষিতত কাইলৈ পর্যন্ত সদন স্থগিত ৰখা হয়।
সংসদীয় পৰিক্ৰমা মন্ত্ৰী কিৰেণ ৰিজিজুৱে বিৰোধীক তীব্ৰ গৰিহণা দি কয়, ‘বিৰোধীয়ে আলোচনা বিচাৰিছে আৰু আমি সাজু। তেন্তে কিয় তেওঁলোকে সদনৰ কাম-কাজ চলিবলৈ দিয়া নাই। এই দুমুখীয়া স্থিতি ভুল কথা। আপোনালোকে যদি আলোচনা বিচাৰিছে তেন্তে হট্টগোলৰ সৃষ্টি নকৰিব। চৰকাৰে কৈছে যে আলোচনাৰ বাবে সাজু। অথচ আপোনালোকে ৰাজহুৱা ধন অপব্যয় কৰিছে।’
মঙলবাৰে দিনৰ দুই বজাতে অচল হয় সংসদৰ অধিবেশন। উল্লেখ্য যে বিহাৰত ভোটাৰ তালিকাৰ বিশেষ পুনৰীক্ষণৰ বিষয়ত সংসদৰ মকৰদ্বাৰত লোকসভাৰ বিৰোধী দলপতি ৰাহুল গান্ধী, সমাজবাদী দলৰ মুৰব্বী অখিলেশ যাদৱকে ধৰি বিৰোধীয়ে হাতে হাতে প্লেকার্ড লৈ প্রতিবাদ সাব্যস্ত কৰে।
ৰাহুল গান্ধীয়ে কয়, ‘আজি মই ইণ্ডিয়া মিত্ৰজোঁটৰ সতীৰ্থসকলৰ স’তে বিহাৰত ভোট চুৰিৰ বিৰুদ্ধে সংসদৰ চৌহদত প্রতিবাদত অংশগ্ৰহণ কৰিছো। ভোটদান হৈছে প্রতিজন নাগৰিকৰ অধিকাৰ। আমি যিকোনো মূল্যৰ বিনিময়ত ইয়াক কাঢ়ি নিবলৈ নিদিওঁ। সংবিধানবিৰোধী শক্তিৰ বিৰুদ্ধে আমি একত্রিতভাৱে যুঁজ দিম।’
ইপিনে, মঙলবাৰে বিৰোধীয়ে ৰাজ্যসভা আৰু লোকসভাত শ্ল’গান দিয়াত অধ্যক্ষ ওম বিৰলাই কয়, ‘শূন্যকালীন ঘণ্টাত আজি কৃষকৰ বিষয়ক লৈ আলোচনা কৰা হ’ব। আপোনালোকে এই আলোচনা নিবিচাৰে, এইদৰে সদন নচলে।’ আজিৰ দিনটোত সদনৰ কাম-কাজ চলিছিল মাত্র দুঘণ্টাৰ বাবে।