Andhra Pradesh:✒️অন্ধ্ৰ প্ৰদেশৰ বাপটলা অঞ্চলৰ গ্ৰেনাইট কুৱেৰীত সংঘটিত হৈছে এই চাঞ্চল্যকৰ ঘটনা। শিল কুৱেৰীত সংঘটিত ভয়ংকৰ দুৰ্ঘটনাত ছজন শ্ৰমিকৰ মৃত্যু হোৱাৰ বিপৰীতে দহজন লোক আহত ।
দুৰ্ঘটনাত মৃত্যু হোৱা আটাইকেইজন শ্ৰমিক ওড়িশাৰ বাসিন্দা। আহতসকলৰ বহুতৰে অৱস্থা সংকটজনক।
এই মৰ্মান্তিক দুৰ্ঘটনা পোহৰলৈ অহাৰ পাছতে অন্ধ্ৰপ্ৰদেশৰ মুখ্যমন্ত্ৰী চন্দ্ৰবাবু নাইডুৱে ব্যৱস্থা গ্ৰহণ কৰে।তেওঁ সমগ্ৰ ঘটনাৰ তদন্তৰ নিৰ্দেশ দিছে ।
আৰক্ষীয়ে জনোৱা মতে, দেওবাৰে পুৱা বাপটলা জিলাৰ বালিকুৰবৰ সত্যকৃষ্ণ শিলাখণ্ডত সংঘটিত হয় এই দুৰ্ঘটনা ।
খননৰ সময়ত এটা বৃহৎ শিল স্থানান্তৰিত হোৱাৰ ফলত ভূমিস্খলনৰ ফলত শ্ৰমিকসকল শিলৰ তলত আবদ্ধ হৈ পৰে।
ঘটনাৰ সময়ত ১৬ জন শ্ৰমিক উপস্থিত আছিল।তাত ছজনৰ লোক থিতাতে মৃত্যু হয়। বাকীসকল গুৰুতৰভাৱে আহত হয়। উদ্ধাৰ অভিযানত উপস্থিত হয় প্ৰশাসন।
আহত ১০ জন লোকক উদ্ধাৰ কৰি তাৎক্ষণিক চিকিৎসাৰ বাবে চিকিৎসালয়লৈ প্ৰেৰণ কৰা হয়। এই তথ্য লাভ কৰি ঘটনাস্থলীত উপস্থিত হয় বাপটলা জিলাৰ আৰক্ষী অধীক্ষক তুষাৰ দুডী।
প্ৰাৰম্ভিক তদন্তত দেখা গ’ল যে খনিটোত পৰ্যাপ্ত সুৰক্ষাৰ নিয়ম মানি চলা হোৱা নাছিল। ইয়াৰ বাবেই দুৰ্ঘটনা সংঘটিত হোৱাৰ সম্ভাৱনা ।
অন্ধ্ৰ প্ৰদেশৰ মুখ্যমন্ত্ৰী চন্দ্ৰবাবু নাইডুৱে এই শোকাৱহ দুৰ্ঘটনাটোৰ বিষয়ে জানিব পাৰি উদ্বেগ প্ৰকাশ কৰি ইতিমধ্যে দুৰ্ঘটনাটো কিয় সংঘটিত হয় সেই বিষয়ে জানিবলৈ তদন্তৰ নিৰ্দেশ দিছে।
আহতসকলে যাতে পৰ্যাপ্ত চিকিৎসা লাভ কৰে তাৰ বাবে প্ৰশাসনক নিৰ্দেশ দিয়া হৈছে। আহত আটাইকেইজনকে চিকিৎসালয়ত ভৰ্তি কৰোৱা হৈছে ।