Ban on visiting the Hadhadi Falls:
নগাঁও জিলাৰ চামগুৰিৰ পাশ্বৱৰ্তী হদহদী জলপ্রপাতত সাধাৰণ লোকৰ বিনোদনত নিষেধাজ্ঞা আৰোপ জিলা প্ৰশাসনৰ ৷ বনভোজ, গা ধোৱা, সাঁতোৰা, ব্যক্তিগত বাহনৰ চলাচল আদিতো নিষেধাজ্ঞা জাৰি কৰে নগাঁও প্ৰশাসনে ৷
উল্লেখ্য যে, সোমবাৰে চাৰি বন্ধু-তিনি বান্ধৱীৰে হদহদী জলপ্ৰপাতত জলকেলি কৰিবলৈ গৈ প্রাণ হেৰুৱাইছিল নগাঁও চহৰৰ সনয়ম জৈন নামৰ যুৱকজনে ৷
জলপ্রপাতটোত জলকেলি কৰি থকাৰ অৱস্থাতে নগাঁও চহৰত যুৱকজনৰ শোকাৱহ মৃত্যুৰ ঘটনাই নগাঁৱত সৃষ্টি হয় শোকাকুল পৰিৱেশৰ । চহৰৰ মাৰোৱাৰী পট্টিৰ ‘মেটচিং কৰ্ণাৰ’ নামৰ কপোৰ দোকানখনৰ গৰাকী প্রয়াত সুদর্শন জৈনৰ পুত্ৰ সনয়ম জৈনে লগৰ চাৰি বন্ধু আৰু তিনিগৰাকী বান্ধৱীৰ স’তে সোমবাৰে পুৱা জলকেলি কৰিবলৈ জলপ্রপাতটোলৈ গৈছিল
পুৱা প্রায় ন বজাত হদহদী জলপ্রপাতত নমাৰ পাছতে সনয়ম পানীত ডুব যায়। লগে লগে যুৱকজনৰ বন্ধু-বান্ধৱীৰ লগতে সেই সময়ত ঘটনাস্থলীত থকা একাংশ লোকৰ মাজত হাহাকাৰ অৱস্থাৰ সৃষ্টি হয়। ঘটনাৰ খবৰ পোৱাৰ লগে লগে ঘটনাস্থলীত আৰক্ষী আৰু এছডিআৰএফৰ দল উপস্থিত হৈ অভিযান চলাই যুৱকজনৰ মৃতদেহ উদ্ধাৰ কৰে।
উল্লেখ্য যে লুংচুং চাহ বাগিচাখন ব্ৰিটিছৰ অধীনত থকা কালত চাহ বাগিচাখনত পাছফালৰ পাহাৰৰ পৰা বৈ অহা জলপ্রপাতৰ পৰা নামি অহা পানীধাৰা ছুইমিং পুলৰ ৰূপ দিছিল। সম্প্রতি সামাজিক মাধ্যমৰ জৰিয়তে জলপ্রপাতটোৰ অপৰূপ সৌন্দর্য প্ৰচাৰ হোৱাত জলকেলিৰ কৰাৰ লগতে ‘ছেলফি’ স্থলীলৈ পৰিণত হয় হদহদী জলপ্রপাত। ফলত নগাঁও জিলাৰ উপৰি আন জিলাৰ যুৱক-যুৱতীৰো আগমন ঘটিবলৈ লয়। ইয়াৰ মাজতে পানীৰ গভীৰতা নজনাকৈ আৰু পানীৰ তলত থকা শিলৰ ফাকত সোমাই কে’বাজনো যুৱকৰ ইতিমধ্যে মৃত্যু ঘটিছে।
উল্লেখ্য যে ২০২১ৰ পৰা আজিলৈকে হদহদী জলপ্রপাতত নজন যুৱকৰ সলিল সমাধি ঘটিছে। ইয়াৰে ২০২৪ৰ ১২ মে’ত নগাঁৱৰ হয়বৰগাঁৱত মাহিন হুছেইন, ২০২৩ৰ ১৫ আগষ্টত নগাঁও চহৰৰ হয়বৰগাঁও তেলিয়াপট্টিৰ নীকি ৰজক (২২), দিনেশ শ্বাহ (২২), ধিং গেটৰ ছাদ্দাম হুছেইন (২৫), ২০২২ৰ ১৭ এপ্ৰিলত নগাঁও চহৰৰে ছাজাদুল হক (২৪) আৰু ৰাজ বৰা (২৪)ৰ সলিল সমাধি ঘটি মৃত্যু হয়। ২০২১ৰ ১৩ আগষ্টত গুৱাহাটী মহানগৰীৰ বশিষ্ঠ আৰক্ষী থানাৰ অন্তৰ্গত পাথৰকুছিৰ ৰাজেশ চাহানীৰ পুত্র পংকজ চাহানী (২৩) আৰু নগাঁও লাওখোৱা ৰোডৰ মহিন্দ্ৰ শ্বাহৰ পুত্র মিন্টু শ্বাহ (২২) নামৰ যুৱক দুজনৰ হদহদী জলপ্রপাতত মৃত্যু হয়।
হদহদী জলপ্রপাতৰ পানীৰ গভীৰতা নজনাৰ বাবে আৰু অত্যন্ত পিছল শিল আৰু পানীৰ তলৰ শিলত ফাক থকাৰ বাবে দুর্ঘটনাজনক ঘটনাসমূহ বৃদ্ধি পাই মৃত্যুৰ উপত্যকালৈ পৰিণত হৈছে বুলি স্থানীয় লোকৰ মাজত চর্চা চলিছে।