Nagaon shocking robbery Incident update:
দৈনিক অগ্ৰদূত ডিজিটেল ডেক্স:-নগাঁৱৰ মৰিকলঙ নিবাসী ডা: ৰঞ্জিত শইকীয়াৰ ঘৰত সংঘটিত কৰা লোমহৰ্ষক ডকাইতি কাণ্ডৰ মাষ্টাৰমাইণ্ড অৱশেষত আৰক্ষীৰ জালত পৰিছে । ধৃত ডকাইতটোৰ নাম উমৰ আলী ৷ একেদৰে আৰক্ষীয়ে আটক কৰে দুৰ্ধৰ্ষ ডকাইত মিন্টু হুছেইনক ৷ উমৰ আলীৰ ঘৰ নগাঁৱৰ ৰূপহীত ৷ আৰক্ষীয়ে জব্দ কৰিছে ডা: ৰঞ্জিত শইকীয়াৰ ঘৰৰ পৰা লুটি নিয়া নগদ ধন সহ কেতবোৰ সা- সামগ্ৰী
আজি নগাঁৱত অনুষ্ঠিত এক সংবাদমেলত জিলা জ্যেষ্ঠ আৰক্ষী অধীক্ষক পাৰ্থ প্ৰতিম দাসে মৰিকলঙৰ লোমহৰ্ষক ডকাইতি কাণ্ডৰ দুই মাষ্টাৰমাইণ্ড গ্ৰেপ্তাৰ হোৱাৰ কথা সদৰি কৰে ৷ ৷ শীৰ্ঘেই আন তিনি ডকাইত আৰক্ষীৰ জালত পৰিব বুলি উল্লেখ কৰি কয় যে,ডকাইতৰ ৰ’ডৰ আক্ৰমণত আহত হোৱা ডা:ৰনজিৎ শইকীয়াৰ পত্নী ৰূপৰেখা শইকীয়াৰ অৱস্থা সংকটজনক হৈ আছে ৷ বৃহস্পতিবাৰৰ মাজনিশাৰ পৰা গুৱাহাটী এ’পল’ হাস্পতালৰ আইচিইউত ৰখা হৈছিল যদিও শনিবাৰে চুপাৰ মাৰ্কেটস্থিত জিএনআৰচিৰ আইচিইউলৈ স্থানান্তৰিত কৰিছে চিকিৎসকে ৷ বৰ্তমানেও অৱস্থা অপৰিৱৰ্তিত হৈ আছে ৷
উল্লেখ্য যে , মৰিকলং আৰক্ষী চকীৰ নিচেই কাষতে ৰাষ্ট্ৰীয় ঘাইপথৰ দাঁতিতে থকা চিকিৎসক ডাঃ ৰঞ্জিত শইকীয়াৰ বাসগৃহত বৃহস্পতিবাৰে মাজনিশা ডকাইতৰ দলে প্ৰৱেশ কৰি আ- অলংকাৰ সহ নগদ ধন লুট কৰি নিয়াৰ লগতে ডা:শইকীয়া আৰু পত্নী ৰূপৰেখা শইকীয়াৰ চোকা জাতীয় অস্ত্ৰৰে উপযুপৰি উধাও হয় ৷
ডকাইতৰ আক্ৰমণত তেজেৰে তুমৰলি হৈ মজিয়াত পৰি থকা দম্পতী হালক পিচত স্থানীয় লোকে ততাতৈয়াকৈ চিকিৎসালয়লৈ প্ৰেৰণ কৰে যদিও দুয়োৰে অৱস্থা সংকটজনক বাবে গুৱাহাটীলৈ প্ৰেৰণ কৰা হৈছিল ৷ ডা:শইকীয়া আৰু তেওঁৰ পত্নী ৰূপৰেখা শইকীয়াক নিশাই গুৱাহাটী এপল’ হাস্পতালত ভৰ্তি কৰা হয় ৷ ডা:শইকীয়া বৰ্তমান সংকটমুক্ত যদিও পত্নী আইচিইউত জীৱন- মৃত্যুৰে যুঁজিছে ৷
ডকাইতৰ দলটোৱে প্ৰথমে ডা:শইকীয়াৰ শোৱনি কোঠালৈ সোমাই আহি কোনো কথাৰ অৱতাৰণা নকৰি ডা:শইকীয়াৰ ডিঙিত ধৰি উপযুপৰি প্ৰহাৰ কৰাৰ লগতে পত্নী ৰূপৰেখাৰ মুৰত লোহাৰ ৰ’ডৰে প্ৰহাৰ কৰি ঘৰৰ গডৰেজ আদি ভাঙি আ- অলংকাৰ সহ নগদ ধন লুট কৰি উধাও হয় ৷ অৱশ্যে ডকাইতৰ দলৰ আক্ৰমণৰ পৰা তেওঁলোকৰ ছয়বছৰীয়া পুত্ৰ সন্তানটি কথমপি ৰক্ষা পৰে ৷ ডকাইতৰ আক্ৰমণত লেবেজান হৈ পৰা ডা:শইকীয়াৰ চিঞৰ- বাখৰত স্থানীয় প্ৰতিবেশী ঘটনাস্থলীত উপস্থিত হয় |
আনহাতে নিশাই ডা:শইকীয়াৰ বাসগৃহত সমীপতে থকা মৰিকলং আৰক্ষী দল উপস্থিত হৈ সকলো নিৰীক্ষণ কৰি ডকাইতৰ সন্ধানত অভিযান আৰম্ভ কৰে ৷উল্লেখ কৰিব পাৰি যে ডাঃ ৰঞ্জিত শইকীয়াৰ বাসগৃহৰ নিচেই কাষতে মৰিকলং আৰক্ষী চকী থকাৰ পিছতো সশস্ত্ৰ ডকাইতৰ দলে নিশা সংঘটিত কৰা লোমহৰ্ষক ডকাইতি কাণ্ডই কেতবোৰ প্ৰশ্ন উদ্থাপিত হৈছিল ৷