Narikali Murder Incident Update:
ছিপাঝাৰৰ নাৰিকলিৰ দীপক নাথৰ তিনিজনীয়া পৰিয়ালৰ হত্যাকাণ্ডৰ ৰহস্য উন্মোচন হোৱা নাই। লোমহর্ষক কাণ্ডটোৰ তদন্ত অব্যাহত থকা বুলি আৰক্ষীয়ে জানিবলৈ দিছে। শুকুৰবাৰে আৰক্ষীয়ে নাথৰ ঘৰৰ চতুৰ্থ মহলাৰ পৰা হত্যাকাণ্ডত ব্যৱহৃত এখন খুকুৰি উদ্ধাৰ কৰে। লগতে নাথৰ ম’বাইল ফোন আৰু তেওঁৰ এযোৰ ছেণ্ডেল আৰু তদন্তকাৰী আৰক্ষীয়ে উদ্ধাৰ কৰি নিয়ে। উল্লেখ্য যে কালি ঘৰতে নাথ, তেওঁৰ পত্নী প্রতিমা নাথ আৰু তেওঁলোকৰ পুত্র দীপক নাথক দুর্বৃত্তই হত্যা কৰে। আৰক্ষী সূত্রই প্ৰকাশ কৰা অনুসৰি, নাথৰ মৃতদেহ চোতালত পৰি থকা অৱস্থাত আৰু তেওঁৰ পত্নী-পুত্ৰৰ মৃতদেহ ঘৰৰ ভিতৰত ক্ষত-বিক্ষত অৱস্থাত উদ্ধাৰ হয়। নাথৰ শৰীৰত আঘাতৰ চিন নাছিল যদিও তেওঁৰ মুখৰে তেজ নিগৰি আছিল।
কালি ঘটনাস্থলীত দণ্ডাধীশসহ আৰক্ষী উপস্থিত হৈ তদন্ত আৰম্ভ কৰে যদিও হত্যাকাণ্ডত ব্যৱহৃত কোনো সামগ্ৰী উদ্ধাৰ হোৱা নাছিল। ঘটনাস্থলীত উপস্থিত হৈ অসম আৰক্ষীৰ মহা-পৰিদৰ্শক ইন্দ্ৰাণী বৰুৱাই ঘটনাটো হত্যাকাণ্ড বুলি সন্দেহ প্রকাশ কৰে। ঘটনাটোক হত্যাকাণ্ড বুলিয়ে ধৰি লৈ আৰক্ষীয়ে তদন্ত অব্যাহত ৰাখিছে বুলিও বৰুৱাই জনায়। উল্লেখ্য যে কালি আৰক্ষীয়ে প্রশিক্ষিত কুকুৰ লৈও ঘটনাস্থলীত তদন্ত কৰে যদিও হত্যাত ব্যৱহৃত সামগ্রী উদ্ধাৰ হোৱা নাছিল।
পাছত আজিহে হত্যাত ব্যৱহৃত খুকুৰিখন আৰক্ষীয়ে উদ্ধাৰ কৰে। আৰক্ষী সূত্ৰই জনোৱা মতে, জব্দকৃত সামগ্ৰীসমূহ ফৰেনচিক পৰীক্ষাৰ বাবে প্ৰেৰণ কৰা হ’ব। স্থানীয় ৰাইজে এই ঘটনাৰ উচিত তদন্ত দাবী কৰিছে। উল্লেখ্য যে ৫৫ বছৰীয়া দীপক নাথ ৰাজ্যিক ৰাজহ বিভাগৰ কৰ্মচাৰী (মণ্ডল) আছিল। তেওঁৰ প্ৰকৃত ঘৰ নাৰিকলিৰ নিকটৱৰ্তী পুনিয়া গাঁৱত আছিল। কিছু বছৰ পূৰ্বে তেওঁ নাৰিকলিলৈ আহি গাঁওখনত এটা প্রাসাদোপম ঘৰ নিৰ্মাণ কৰি স্থায়ীভাৱে বাস কৰিবলৈ লয়।
ইপিনে, পৰহি তিনিওৰে মৃতদেহ আৰক্ষীয়ে মৰণোত্তৰ পৰীক্ষাৰ বাবে মঙলদৈ অসামৰিক চিকিৎসালয়লৈ প্ৰেৰণ কৰে যদিও পাছত দীপক নাথৰ মৃতদেহ গুৱাহাটী চিকিৎসা মহাবিদ্যালয়লৈ প্ৰেৰণ কৰা হয় বুলি সূত্রই জনায়। তেওঁৰ পত্নী-পুত্ৰৰ মৃতদেহ মৰণোত্তৰ পৰীক্ষাৰ বাবে মঙলদৈ অসামৰিক চিকিৎসালয়তে ৰখা হৈছে।