Horrific murder in Sipajhar :
ৰাজ্যত ইটোৰ পিছত সিটোকৈ সংঘটিত হৈ থকা অপৰাধমূলক ঘটনাৱলীক লৈ ৰাইজ উদ্বিগ্ন হৈ থকাৰ মাজতে বৃহস্পতিবাৰে নিশা দৰং জিলাৰ ছিপাঝাৰৰ নাৰিকলিত সংঘটিত হোৱা এক লোমহৰ্ষক হত্যাকাণ্ড জোকাৰি যায় সমগ্ৰ ছিপাঝাৰ ৷অচিনাক্ত দুর্বৃত্তই ঘৰতে এটা তিনিজনীয়া পৰিয়ালক নিঃশেষ কৰে। নাৰিকলি গাঁৱৰ নিৱাসী তথা লাটমণ্ডল দীপক নাথ (৫২), তেওঁৰ পত্নী প্রতিমা নাথ (৪০) আৰু তেওঁলোকৰ পুত্ৰ ধৃতিৰাজ নাথ (১২)ক চোকা অস্ত্ৰৰে আক্ৰমণ কৰি হত্যা কৰি দুর্বৃত্তই নির্বিঘ্নে আঁতৰি যায়। মাতৃ-পুত্ৰৰ ক্ষত-বিক্ষত মৃতদেহ শোৱনি কোঠাত উদ্ধাৰ হোৱাৰ বিপৰীতে নাথৰ নিথৰ দেহ চোতালত উদ্ধাৰ হয়। মৃত ধৃতিমান বাইহাটা চাৰিআলি ডিপিএছৰ সপ্তম শ্ৰেণীৰ ছাত্ৰ আছিল।
নিশাই দণ্ডাধীশসহ আৰক্ষী ঘটনাস্থলীত উপস্থিত হৈ মৃতদেহ তিনিটা উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰিছে। তিনিজনীয়া পৰিয়ালটোক তেজেৰে লুতুৰি-পুতুৰি হৈ নিথৰ হৈ পৰি থকা অৱস্থাত প্রথমে প্রত্যক্ষ কৰে দীপক নাথৰ এজন ভ্রাতৃয়ে। তেতিয়া সন্ধিয়া হৈছিল। তেওঁ জনোৱা মতে, ককায়েকৰ ঘৰলৈ গাখীৰ আৰু কিছু পৰিমাণৰ মাহ-প্ৰসাদ দিবলৈ আহি ককায়েকৰ ঘৰত উপস্থিত হৈ তেওঁ ককায়েক-বৌৱেক আৰু ভতিজাকক মৃত অৱস্থাত উদ্ধাৰ কৰে। এই সম্পর্কত লোকজনে আৰু কয়, ‘দিনৰ দুই বজাত মই বৌলৈ ফোন কৰো। তেওঁ ফোন নধৰিলে। তেওঁ শুই থকা বুলি ভাবিলো।
ককাইদেউ কর্মস্থলীত থকা আৰু ভতিজা স্কুলত থকা বুলি ভাবিলো। গতিকে মই গাখীৰ দিবলৈ ককাইদেউৰ ঘৰলৈ যাবলৈ সিদ্ধান্ত লওঁ। ঘৰৰ ওচৰৰ এক মাংগলিক অনুষ্ঠানৰ পৰা অনা কিছু পৰিমাণৰ তেওঁলোকলৈ বুলি লগত লওঁ।’ জ্যেষ্ঠ ভ্রাতৃৰ ঘৰৰ সন্মুখত উপস্থিত হোৱাৰ পাছত মটৰ চাইকেলৰ হৰ্ণ বজোৱাৰ পাছতো ভিতৰৰ পৰা কোনো ওলাই নহাত চৌহদত প্ৰৱেশ কৰি তেওঁ প্রথমে চোতালত ককায়েকৰ নিথৰ দেহ প্রত্যক্ষ কৰে।
পাছত ঘৰৰ ভিতৰত প্ৰৱেশ কৰি তেওঁ বৌৱেক আৰু ভতিজাকৰ নিথৰ দেহ দেখে বুলি জানিবলৈ দিয়ে। পাঁচ বছৰ পূর্বে ককায়েকে এই ঘৰ নিৰ্মাণ কৰে বুলি লোকজনে জনায়। ঘটনাটো হত্যাকাণ্ড বুলিয়ে তেওঁ সন্দেহ কৰিছে। ককায়েকৰ ঘৰৰ চিচি টিভি বিকল হৈ থকা বুলিও তেওঁ জানিবলৈ দিয়ে। সূত্ৰৰ মতে, বৃহস্পতিবাৰে নাথৰ পুত্ৰ ধৃতিৰাজ স্কুললৈ যোৱা নাছিল। গতিকে ঘটনাটো দিনতে সংঘটিত হ’ব পাৰে বুলিও আৰক্ষীয়ে সন্দেহ কৰিছে। আৰক্ষীয়ে ঘটনাটো হত্যাকাণ্ড বুলি সন্দেহ কৰিছে। একেদৰে স্থানীয় লোকেও তিনিজনীয়া পৰিয়ালটোক দুর্বৃত্তই হত্যা কৰি নিৰ্বিঘ্নে উধাও হয় বুলি সন্দেহ কৰিছে।
আনহাতে, একাংশই ঘটনাটো পাৰিবাৰিক অশান্তিৰ ফল হ’ব পাৰে বুলিও সন্দেহ কৰিছে। অৱশ্যে নাথৰ ভ্ৰাতৃয়ে জনোৱা মতে, তেওঁৰ ককায়েকৰ পৰিয়ালত বিশেষ কোনো কাজিয়া-পেচাল নাছিল। ককায়েকে অৱসৰ গ্ৰহণ কৰিবলৈ পাঁচ বছৰ আছিল বুলি তেওঁ জনায়। দীপক নাথ তেওঁলোকৰ তিনি ভাই-ককাইৰ জ্যেষ্ঠ আছিল। উল্লেখ্য যে দীপক নাথৰ প্ৰকৃত ঘৰ নাৰিকলিৰ নিকটৱৰ্তী পূর্ণিয়া গাঁৱত। পাছত তেওঁ পৰিয়ালসহ নাৰিকলিলৈ আহি গাঁওখনত এটা তিনি মহলীয়া বাসগৃহ নিৰ্মাণ কৰি স্থায়ীভাৱে বাস কৰিবলৈ লয়।
# আৰক্ষীৰ প্ৰাৰম্ভিক তদন্ত আহিছে ন ন তথ্য
নিশা চাঞ্চল্যকৰ হত্যাকাণ্ড পিছতে ঘটনাস্থলীত আৰক্ষী- দণ্ডাধীশ উপস্থিতিৰ পিছত শুকুৰবাৰে ফৰেনছিকৰ তদন্তকাৰী দলে ঘৰৰ চৌহদ আৰু কোঠালিত তন্নতন্নকৈ পৰীক্ষা আৰম্ভ কৰে ৷ আনহাতে তদন্তত আৰক্ষীয়ে ঘৰটোৰ চাদত উদ্ধাৰ কৰে হত্যাকাণ্ডত ব্যৱহ্ত দা’ খন ৷ সমগ্ৰ ঘটনাটো ৰহস্যৰ আৱৰ্তত যদিও আৰক্ষীৰ সন্দেহ পত্নী-পুত্রক হত্যা কৰি স্বামী দীপক নাথে চৰমপন্থা লৈছিল ৷ অৱশ্যে মৰনোত্তৰ পৰীক্ষাৰ সমান্তৰালভাৱে আৰক্ষীৰ ক্ষীপ্ৰ তদন্ততহে উদ্ঘাটন হ’ব সমগ্ৰ ঘটনাৱলী ৷
