Ghagrapar:✒️নলবাৰী জিলাৰ ঘগ্ৰাপাৰৰ বড়িগোগ বনভাগ শিক্ষাখণ্ডৰ অন্তৰ্গত গলিয়া প্ৰাথমিক বিদ্যালয়ত আজি মুল জপনামুখৰ আৰম্ভণি আৰু শৈক্ষিক সভা অনুষ্ঠিত কৰা হয়।
জপনামুখৰ আৰম্ভণি কৰে বিদ্যালয়ৰ প্ৰাক্তন ছাত্ৰ তথা বিশিষ্ট চিকিৎসক ডাঃ পুতুল মহন্তই। আৰম্ভণি পাছত তেওঁ বিদ্যালয়ৰ প্ৰতি নিজৰ গভীৰ স্নেহ আৰু আবেগ প্ৰকাশ কৰি কয়, “এই বিদ্যালয়েই মোৰ জীৱনৰ আৰম্ভণি স্থান। এতিয়া মই য’ত আহিছোঁ, সেই যাত্ৰাৰ আৰম্ভণি হৈছিল এই বিদ্যালয়ৰ বেঞ্চ-ডেক্সৰ পৰা। সেয়েহে মোৰ এই বিদ্যালয়ৰ উন্নয়নলৈ নিজৰ পৰা যিমান পাৰোঁ সহায় কৰিবলৈ সংকল্প লৈছোঁ। এই মুল জপনামুখখনো মোৰ নিজ ধনেৰে নিৰ্মাণ কৰিম, যাতে ভবিষ্যতৰ ছাত্ৰ-ছাত্ৰীসকলে এক সুন্দৰ পৰিৱেশত শিক্ষা লাভ কৰিব পাৰে।”
বিদ্যালয়ৰ প্ৰধান শিক্ষক তথা কৃতী শিক্ষক গিৰিন্দ্ৰ কাশ্যপে আতধৰা এই শৈক্ষিক সভাত উপস্থিত থাকি লন্ডনস্হিত বিশিষ্ট চিকিৎসক তথা শিক্ষাবিদ ডা: জয়ন্ত বিশ্ব শৰ্মাই ভাষণত কয় ,“বিদ্যালয় কোনো এটা ভবন নহয়, ই হৈছে চিন্তা আৰু জ্ঞানৰ ক্ষেত্ৰ। আজিৰ দিনত পুৰণি ছাত্ৰসকলে নিজৰ বিদ্যালয়লৈ ঘূৰি আহি উন্নয়নত অংশগ্ৰহণ কৰাটো সত্যই অনুকৰণীয়।”
গুৱাহাটীৰ মুখ্য কাৰ্যালয়ৰ কৰ অধিক্ষক ৰাতুল মহন্তই তেওঁৰ ভাষণত বিদ্যালয় পৰিচালনা আৰু শিক্ষকসকলৰ ভূমিকা প্ৰশংসা কৰি কয় ,”বিদ্যালয়ৰ শৃংখলা, পৰিচালনা আৰু শিক্ষকৰ একতাই শিক্ষাৰ মূল আধাৰ। গলিয়া বিদ্যালয়ে সেই দিশত এক উদাহৰণ স্থাপন কৰিছে।”
আনহাতে বনভাগ মহাবিদ্যালয়ৰ প্ৰাক্তন অধ্যক্ষ যোগেন্দ্ৰ কলিতা,বেংক বিষয়া মন্মী দাস মহন্ত উপস্থিত থাকি ছাত্ৰ ছাত্ৰীক উদ্দেশ্যি অনুপ্ৰেৰণা মূলক ভাষণ ৰাখে।
বিদ্যালয় পৰিচালনা সমিতিৰ সভাপতি কুসুম তালুকদাৰে আদৰণি ভাষণত অতিথিসকলক ধন্যবাদ জনায়।লগতে গাও উন্নয়ন সমিতিৰ পৰা জেষ্ঠ নাগৰিক অৰবিন্দ কলিতাই বিদ্যালয়খনৰ অভাব-অভিয়োগ সন্দৰ্ভত অতিথিসকলৰ দৃষ্টি নিক্ষেপ কৰে। সভাখনত বিদ্যালয়ৰ শিক্ষক, ছাত্ৰ-ছাত্ৰী, অভিভাৱক অভিভাৱিকা আৰু স্থানীয় জেষ্ঠ ব্যক্তিসকল উপস্থিত থাকে।