ভাৰতৰ ভূমিত অনুপ্ৰৱেশকাৰী বাংলাদেশী নাগৰিকে বিএছএফৰ স’তে তুমুল বিতর্কত লিপ্ত হোৱাই নহয়, ‘জিৰ’ লাইন’ৰ সমীপত থিয় হৈ আন একাংশই ভাৰত বিৰোধী শ্ল’গান দিয়াৰ ঘটনাই চাঞ্চল্যৰ সৃষ্টি কৰিছে।বাংলাদেশী নাগৰিকৰ এটা দলে অসমৰ শ্রীভূমি জিলাৰ ভাংগা-হৰিনগৰ খণ্ডৰ সমীপত সীমান্ত সুৰক্ষা বাহিনী (বিএছএফ)ৰ স’তে মুখামুখি সংঘর্ষত লিপ্ত হয়।
এই ঘটনাৰ এক ভিডিঅ’ত দেখা গৈছে এদল বাংলাদেশী নাগবিকে চিঞৰি চিঞৰি আধাভঙা হিন্দীত ওচৰতে থকা বিএছএফক ভাবুকি দি কৈছে, ‘এয়া বাংলাদেশৰ মাটি। আপোনালোক ইয়ালৈ কি আহিছে? আপোনালোকৰ খুঁটা আগত আছে।১৯৭১তে চিনাক্ত কৰা হৈছে। আপোনালোক ইয়ালৈ অহাৰ প্রয়োজন নাই। আপোনালোক ইয়াৰ পৰা আঁতৰি যাওঁক।’
আনকি বিএছএফক বন্দুকেৰে গুলীওৱাৰ ভাবুকিও প্রদান কৰে। তাৰে একাংশই কয় যে দুদিন পাছে পাছে এইদৰে বিএছএফ সেই স্থানলৈ গৈ থাকে। বিএছএফৰ দলটোৱে ঘটনাস্থলীলৈ উচ্চ পৰ্যায়ৰ শীর্ষ বিষয়াই আহিব বুলি কোৱাত তেওঁলোকক অশ্রাব্য শব্দৰ ব্যৱহাৰ কৰি গালি গালাজ কৰে বাংলাদেশী নাগৰিকে। এইদৰে যথেষ্ট সময় ধৰি প্রচণ্ড হুলস্থুলীয়া পৰিবেশৰ সৃষ্টি হয়। তাৰ পাছত বিএছএফৰ দলটোৱে নাৱত উঠি সুৰমা নদীৰে ইটো পাৰলৈ আহে।
অভিযোগ অনুসৰি বাংলাদেশৰ ছিলেট অঞ্চলৰ পৰা অসমৰ কাছাৰ আৰু শ্রীভূমি জিলাক পৃথক কৰা সীমান্তত এই ঘটনা সংঘটিত হয়। সীমান্তত থকা সুৰমা নৈৰ পানী কমি অহাত বাংলাদেশী নাগৰিকে ভাৰতৰ ভূমিত প্ৰৱেশ কৰি কৃষিকার্য কৰাৰ বাবে চেষ্টা চলায়। বিএছএফৰ ১৭০ সংখ্যক বেটেলিয়নৰ এই অবৈধ কাৰ্যকলাপ দৃষ্টিগোচৰ হোৱাত এই ভূমি ভাৰতৰ বুলি আপত্তি দর্শায় আৰু কৃষিকার্য কৰাত বাধা দিয়ে।
প্রাপ্ত তথ্য অনুসৰি বিএছএফৰ জোৱানে বাঁহৰ বেৰা, অস্থায়ী চালি আৰু অন্যান্য অস্থায়ী নির্মাণ ভাঙি পেলায়। এই কার্যত বাংলাদেশী নাগৰিকসকল ক্ষুব্ধ হয় আৰু বৃহৎ সংখ্যকে বিএছএফৰ টহলদাৰী বাহিনীটোৰ স’তে মুখামুখি বিতৰ্কত লিপ্ত হয়। এই সম্পর্কে ভিডিঅ’ সামাজিক মাধ্যমত প্রকাশ হৈছে।
বিভিন্ন শ্ল’গান দি আৰু অশ্রাব্য ভাষা প্রয়োগ কৰি ভাৰতীয় বাহিনীক গালি-গালাজ কৰে বাংলাদেশী নাগৰিকসকলে। ইয়াকে লৈ সীমান্তত এক উত্তেজনা পৰিৱেশৰ সৃষ্টি হৈছে।
একাংশ প্রত্যক্ষদর্শীয়ে কয় যে এই মুখামুখি সংঘৰ্যময় পৰিস্থিতিৰ পাছতে বাংলাদেশৰ সীমান্তবাসীয়ে জিৰ’ লাইনৰ সমীপত থিয় হৈ ভাৰতবিৰোধী শ্ল’গান দিয়ে আৰু বিএছএফে বাংলাদেশ সীমান্ত অতিক্ৰম কৰা বুলি ওলোটাই অভিযোগ কৰে। মুহূৰ্তৰ ভিতৰতে বাংলাদেশীৰ সামাজিক মাধ্যম ভাৰতীয় সীমান্ত বাহিনীয়ে বাংলাদেশৰ ভূমিত অনুপ্ৰৱেশ কৰা বুলি ভৰি পৰে।
অৱশ্যে ভাৰতীয় কর্তৃপক্ষই এই অভিযোগ নস্যাৎ কৰিছে। সূত্ৰত প্রকাশ যে নৈৰ পানী শুকাই নতুনকৈ চৰৰ সৃষ্টি হোৱাত বাংলাদেশী নাগৰিকে তাত খেতি কৰিবলৈ আহিছিল আৰু ভাৰতৰ ভূমি বাংলাদেশৰ বুলি দাবী কৰিবলৈ চেষ্টা কৰে। এই ঘটনাৰ পাছতে বিএছএফ আৰু ব’ৰ্ডাৰ গাৰ্ড বাংলাদেশ (বিজিবি)ৰ মাজত উত্তেজনা প্রশমিত কৰিবলৈ এখন বৈঠক সম্পন্ন কৰা হয়। দুয়োপক্ষই অধিক উত্তেজনা যাতে বৃদ্ধি নহয় তাৰ প্ৰতি সচেষ্ট হ’ব বুলি মতপোষণ কৰে।