Azanpir Moqtab Masjid:
মহানগৰীৰ গীতানগৰৰ মঠঘৰীয়াস্থিত আজানপীৰ মোক্তাব আৰু মছজিদ উচ্ছেদক লৈ বৃহস্পতিবাৰে তীব্র প্রতিক্ৰিয়াৰ সৃষ্টি হৈছে। স্থানীয় ৰাইজে অভিযোগ কৰে যে খিলঞ্জীয়া মুছলমানৰ উপাসনাস্থলী মছজিদটো ভূমিস্খলনৰ গইনা লৈ ৰাজনীতিৰ মেৰপেছ লগাই ভাঙি পেলোৱা হৈছে। স্থানীয় ৰাইজে জনোৱা মতে, ১৯৮৪ ত স্থাপিত এই মছজিদ উচ্ছেদৰ বাবে দিছপুৰ ৰাজহ চক্ৰ বিষয়াই জাননী জাৰি কৰিছিল। আজি বুলড’জাৰ লৈ প্ৰশাসনৰ বৃহৎ দলে ৰাজহ চক্ৰ বিষয়াৰ নেতৃত্বত এই উচ্ছেদ অভিযান চলায়।
স্থানীয় বাসিন্দাই অভিযোগ কৰি কয় যে উচ্ছেদৰ জাননী লাভৰ ২৪ ঘণ্টা নৌহওঁতে উচ্ছেদ অভিযান চলিল। ষড়যন্ত্রমূলকভাৱে হিন্দু-মুছলমানৰ একতা ভংগ কৰিবলৈ এই মছজিদ ভগা বুলি ৰাইজে অভিযোগ কৰিছে। স্থানীয় লোকে কয়, ‘ইচ্ছাকৃতভাৱে ২৯ অক্টোবৰত প্ৰকাশ কৰা জাননী লুকুৱাই ৰাখি পাঁচ নৱেম্বৰত আমাৰ হাতত তুলি দিয়া হয় যাতে আমি একো ব্যৱস্থা হাতত ল’ব নোৱাৰো।
আমি প্রশাসনক কাবৌ কৰিছিলো যে এসপ্তাহ নহ’লেও আমাক অন্ততঃ ২৪ ঘণ্টা সময় দিয়ক। এই বৃহৎ অঞ্চলটো বাগানৰ মাটি। ইয়াত মন্দিৰ, মছজিদ, বাসস্থান সকলো আছে, কিন্তু একমাত্র মছজিদটো কিয় ভাঙি দিয়া হ’ল?’ ক্ষুব্ধ ৰাইজে অতি শীঘ্ৰে ক্ষতিপূৰণ আদায় অথবা আন স্থানত মছজিদ নিৰ্মাণৰ ব্যৱস্থা কৰি দিবলৈ চৰকাৰক আহ্বান জনায়। ক্ষুব্ধ ৰাইজে প্রত্যাহ্বান জনাই কয়, ‘আজি প্রমাণিত হ’ল যে আমি অবৈধ মিঞা ইয়াত আছিলো।
যদি আমি অবৈধ মিঞা ইয়াত আছিলো তেন্তে হিমন্ত বিশ্ব শর্মাই কিয় খেদিব নোৱাৰিলে। মছজিদ আছিল, মছজিদ থাকিব আৰু আমি নমৰালৈকে ইয়াত মছজিদ থাকিব। ভূমিস্খলনৰ কথা কৈ মছজিদ ভাঙিছে। আমি এতিয়া ইয়াত ছাদ ঢালি ডাঙৰকৈ মছজিদ বনাম। যেতিয়ালৈকে এই চৰকাৰী বিদ্যালয়খন ইয়াত থাকিব তেতিয়ালৈকে ইয়াত মছজিদো থাকিব।’ তেওঁলোকে কয় যে ১৯৮৩ৰ পৰাই মছজিদটো আছিল। ভূমিস্খলনৰ কথা কৈ ভঙা হৈছে।
মছজিদটো ভাঙিবলৈ ১২ ঘণ্টা সময় বান্ধি দিয়া হৈছিল। ইয়াকে লৈ স্থানীয় মুছলমান ৰাইজৰ মাজত হাহাকাৰ পৰিস্থিতিৰ সৃষ্টি হোৱাৰ সময়তে ওচৰ-চুবুৰীয়া হিন্দু ধৰ্মাৱলম্বী লোকসকলে উচ্ছেদৰ পৰা ৰক্ষা কৰিবলৈ ওলাই আহে। তেওঁলোকে কয় যে আৰু অলপ সময় দিব লাগে। তেওঁলোকে লগতে কয়, ‘মুছলমান হ’ল বুলিয়ে কাকো ভেদভাৱ নকৰিব। হিন্দু-মুছলমান সকলোৰে তেজৰ ৰং ৰঙা। ভূপেন হাজৰিকা, জুবিনদাৰ আদৰ্শৰে আমি জীয়াই থাকিব লাগিব।’ তেওঁলোকে কয়, ‘মানুহ মানুহেই। ভূপেনদাই কৈ গৈছে জুবিনদাই কৈ গৈছে। আল্লাই-ভগৱানেও কৈছে।’ স্থানীয় হিন্দু-মুছলমান লোকসকলে একেলগে কয় যে এতিয়া আৰু হিন্দু-মুছলমান কৰাৰ সময় নাই।
