Mid Day Meal Scheme:✒️দেশত উদ্বেগজনকভাবে হ্রাস পাবলৈ ধৰিছে চৰকাৰী আৰু চৰকাৰী সাহায্যপ্রাপ্ত স্কুলৰ সংখ্যা। বিগত পাঁচটা শিক্ষাবর্ষত অসমতে বন্ধ হ’ল ৯,৩২১খন চৰকাৰী আৰু চৰকাৰী সাহায্যপ্রাপ্ত স্কুল। কেৱল অসমতে নহয়, সমগ্ৰ দেশৰ ভিতৰত সৰ্বাধিক চৰকাৰী আৰু চৰকাৰী সাহায্যপ্রাপ্ত স্কুল বন্ধ হৈছে বিজেপিশাসিত ৰাজ্যসমূহত।
দেশৰ চৌদিশে চৰকাৰী স্কুলৰ সংখ্যা হ্রাস পোৱাৰ তথ্য ফাদিল হৈছে স্বয়ং কেন্দ্রীয় চৰকাৰে প্রকাশ কৰা তথ্যত। কেন্দ্রীয় ৰাজ্যিক শিক্ষামন্ত্রী জয়ন্ত চৌধুৰীয়ে ৰাজ্যসভাত দাখিল কৰা তথ্য অনুসৰি, ২০২০-২১ত সমগ্র দেশত ১১.১৯ লাখ স্কুলত মধ্যাহ্ন ভোজন বিতৰণ কৰা হয়। ২০২৪-২৫ত ইয়াৰ সংখ্যা ১০.৩৫ লাখলৈ হ্রাস পায়। অর্থাৎ মাথোঁ পাঁচ বছৰতে দেশত ৮৪,৪৩৫ খন চৰকাৰী স্কুল বন্ধ হয়। শতকৰা হিচাপত এই সংখ্যা ৭.৫ শতাংশ হয়।
কেন্দ্ৰৰ তথ্য অনুসৰি, বিজেপিশাসিত ৰাজ্যসমূহতে উক্ত পাঁচ বছৰত অধিকসংখ্যক স্কুলৰ সংখ্যা হ্রাস পায়। বিজেপিশাসিত ৰাজ্যসমূহৰ অন্যতম উত্তৰ প্ৰদেশত এই পাঁচ বছৰত ২৬ হেজাৰ চৰকাৰী স্কুল হ্রাস পায়। একেদৰে মধ্য প্রদেশত উক্ত পাঁচটা বছৰত চৰকাৰী আৰু চৰকাৰী সাহায্যপ্রাপ্ত স্কুলৰ সংখ্যা ২৪,৭০৪ খন হ্রাস পায়।এনে উদ্বেগজনক পৰিস্থিতি আন বিজেপিশাসিত ৰাজ্যসমূহৰ ক্ষেত্ৰতো দেখা গৈছে।
সদনত মন্ত্রী চৌধুৰীয়ে প্রকাশ কৰা অনুসৰি, ২০২০-২১ শিক্ষাবর্ষৰ পৰা ২০২১-২২লৈ ৩৫,৫৭৪খন স্কুলৰ সংখ্যা হ্রাস পায়। ২০২০-২১ত মধ্যাহ্ন ভোজন বিতৰণ কৰা স্কুলৰ সংখ্যা আছিল ১১.১৯ লাখ। ইয়াৰ পাছৰ শিক্ষাবর্ষ অর্থাৎ ২০২১-২২ত এনে স্কুলৰ সংখ্যা ১০.৮৪ লাখ হয়।
অর্থাৎ মাথোঁ এটা শিক্ষা বৰ্ষৰ ভিতৰতে চৰকাৰী আৰু চৰকাৰী সাহায্যপ্রাপ্ত স্কুলৰ সংখ্যা ৩.১৮ শতাংশ হ্রাস পায়। উল্লেখ্য যে ২০২০-২১ শিক্ষাবৰ্ষত দেশত কৰ’না মহামাৰীৰ প্রাদুর্ভাব আছিল। এই মহামাৰীৰ সময়ছোৱাত কেৱল উত্তৰ প্রদেশতে বন্ধ হয় ২৫,১৯৭খন স্কুল।
লক্ষ্যণীয়ভাবে উক্ত বছৰ পশ্চিমবংগত এখনো স্কুল বন্ধ হোৱা নাছিল। ইয়াৰ পাছৰ বছৰ অৰ্থাৎ ২০২২-২৩ত সমগ্র দেশত স্কুলৰ সংখ্যা ৭,৬০৪খন হ্রাস পায়। ২০২৩-= ২৪৩ এনে স্কুলৰ সংখ্যা ৯,৫০৯খন হ্রাস পায়। ফলত ২০২০ৰ পৰা ২০২৫ৰ সময়ছোৱাত দেশত চৰকাৰী আৰু চৰকাৰী সাহায্যপ্রাপ্ত স্কুলৰ – সংখ্যা ৩১,৭৬৬খন হ্রাস পায়।
অৱশ্যে এনেদৰে উদ্বেগজনকভাৱে চৰকাৰী আৰু চৰকাৰী সাহায্যপ্রাপ্ত স্কুলৰ সংখ্যা হ্রাস পোৱাৰ কাৰণ স্পষ্টভাৱে ব্যাখ্যা কৰাৰ পৰা বিৰত থাকে কেন্দ্ৰীয় ৰাজ্যিক শিক্ষামন্ত্রী। আনহাতে তেওঁ কয় যে দেশৰ ১০.৩৫ লাখ স্কুলত ১১ কোটি ছাত্র-ছাত্রীয়ে নাম লগাইছে। চৰকাৰী আৰু চৰকাৰী সাহায্যপ্রাপ্ত স্কুলসমূহত বছৰৰ ২২০ দিনত মধ্যাহ্ন ভোজন যোগান ধৰা হয়।
নিতৌ আঠ কোটি ছাত্র-ছাত্রীয়ে মধ্যাহ্ন ভোজন গ্ৰহণ কৰে। উল্লেখ্য যে যোৱা এপ্ৰিলৰ পৰা কেন্দ্ৰীয় চৰকাৰে মধ্যাহ্ন ভোজনৰ ক্ষেত্ৰত প্ৰতি সাঁজৰ ব্যয় বৃদ্ধি কৰিছে। সেই অনুসৰি, ইয়াৰ বাবদ প্ৰাকপ্রাথমিকৰ পৰা পঞ্চম শ্রেণীলৈ প্রত্যেক ছাত্ৰ-ছাত্ৰীৰ বিপৰীতে নিতৌ ৬.৭৮ টকা ব্যয় কৰা হয়। পূর্বে ইয়াৰ পৰিমাণ ৬.১৯ টকা আছিল।
একেদৰে ষষ্ঠ শ্ৰেণীৰ পৰা অষ্টম শ্ৰেণীৰ প্ৰত্যেক ছাত্ৰ-ছাত্ৰীৰ বিপৰীতে পূৰ্বৰ ৯.২৯ টকাৰ পৰা ১০.১৭ টকা ব্যয় কৰা হৈ আহিছে। আনহাতে, মধ্যাহ্ন ভোজনৰ বাবদ ২০২৪-২৫ বিত্তীয় বৰ্ষত চৰকাৰে ১২,৪৬৭.৩৯ কোটি টকা ব্যয় কৰে। ২০২৫-২৬ বিত্তীয় বর্ষত মধ্যাহ্ন ভোজনৰ বাবদ কেন্দ্রই ১২,৫০০ কোটি টকা বাজেটত ধাৰ্য কৰিছে।