Nanda Devi:✒️উত্তৰাখণ্ডৰ বিভিন্ন অংশত পুনৰ সৃষ্টি হৈছে দাবানলৰ আতংক। ধোঁৱাৰে ঢাকি পৰিছে অনেক অৰণ্য। স্বাভাৱিকভাবেই উদ্বেগ বৃদ্ধি পাইছে বন বিভাগৰ। যিসমূহ অঞ্চলৰ জংঘলত জুইৰ প্ৰকোপ দেখা গৈছে, তাৰ ভিতৰত অন্যতম হৈছে নন্দাদেৱী ৰাষ্ট্ৰীয় উদ্যানৰ সংলগ্ন বিস্তীর্ণ বনাঞ্চল।
হিমালয়ৰ ওপৰৰ ফালে অৱস্থিত পৰিৱেশগতভাৱে অত্যন্ত সমৃদ্ধ এই সংৰক্ষিত অঞ্চলটোৰ এক বিশাল অংশৰ সেউজ প্রকৃতি ইতিমধ্যে জুইত ছাৰখাৰ হৈছে। মহাকাশৰ পৰাও দৃষ্টিগোচৰ হৈছে জুইৰ লেলিহান শিখা। যদিও হিমালয়ৰ এই ৰাজ্যত দাবানলৰ বাৰম্বাৰ পুনৰাবৃত্তি ঘটে, তথাপি এই বছৰ এই পৰিস্থিতি বহু আগতেই তথা ব্যাপক আকাৰত ঘটিবলৈ আৰম্ভ কৰিছে। যাৰ বাবেই উদ্বেগ যথেষ্ট পৰিমাণে বৃদ্ধি পাইছে। কিয় এই পৰিস্থিতিৰ সৃষ্টি হোৱা বুলিও প্রশ্ন উঠিছে।
আচলতে এই বছৰৰ শীত অতিৰিক্ত শুকান। কাৰণ এই বছৰৰ শীতত বৰষুণৰ কোনো উমঘাম নাই। শীত শুকান হোৱাৰ বাবেই বিপত্তি ঘটিছে। উত্তৰাখণ্ডৰ মানুহে সততে শীতকালীন বৰষুণ আৰু তুষাৰপাতৰ বাবে অপেক্ষা কৰি থাকে; যাতে গ্ৰীষ্মৰ পূৰ্বে পৰিৱেশ আৰ্দ্ৰ হৈ থাকে। অথচ এইবাৰ বৰষুণ আৰু তুষাৰপাতৰ পৰিমাণ একেবাৰে কম। তাৰ ফলতেই জংঘলসমূহ শুকান হৈ পৰিছে।
ফলত সহজেই ঘটিছে দাবানলৰ বিপৰ্যয়। যিবোৰ ঠাই বৰফে আবৰি থাকে, সেইবোৰত এতিয়া বৰফ দেখিবলৈ নাই; বৰঞ্চ সেইবোৰ অঞ্চলতো দাবানল দেখা গৈছে। বিশেষকৈ পূৰ্বৰ তুলনাত এইবাৰ ৰাজ্যখনত দাবানলে সময়ৰ আগতেই আৰু ব্যাপক আকাৰত ভয়ানক ৰূপ লোৱাৰ বাবেই পৰিৱেশবিদসকলৰ উদ্বেগ বৃদ্ধি পাইছে। স্বাভাৱিকতে বিশেষজ্ঞসকল চিন্তিত হৈ পৰিছে।
এই প্রসংগত পৰিৱেশবিদ অনিল যোশীয়ে কয়, ‘এই বিষয়টো নিয়ন্ত্রণলৈ আনিবই লাগিব আৰু সেয়া কেৱল তেতিয়াহে সম্ভৱ হ’ব, যেতিয়া আমি বনৰ ওপৰভাগৰ মাটিৰ আৰ্দ্ৰতা বৃদ্ধি কৰিব পাৰিম।’ সেইবাবেই এই অঞ্চলত বেছিকৈ জলাশয় আৰু পুখুৰী খনন পৰামৰ্শ দিছে তেওঁ। যোশীৰ মতে, ইয়াৰ ফলত বৰষুণ আৰু তুষাৰপাত কম হ’লেও অঞ্চলটোৰ পৰিৱেশ আৰ্দ্ৰই থাকিব।
একাংশ জলবায়ু বিজ্ঞানীয়ে মন্তব্য কৰিছে যে ক্রমবর্ধমান তাপমাত্রা আৰু পৰিৱৰ্তিত বতৰৰ ধৰণে হিমালয়ত অগ্নিকাণ্ডৰ আশংকা বৃদ্ধি কৰিছে। ‘উষ্ণ’ শীতৰ কাৰণে তুষাৰপাত কম হয়, বৰফ দ্রুতগতিৰে গলি যায় আৰু শুকান সময়কাল দীর্ঘ হয়। ইয়াৰ ফলত দাবানলৰ বতৰ দীঘলীয়া হৈছে। অতীতৰ তুলনাত কিছু সপ্তাহৰ পূৰ্বেই জুই বিয়পি পৰিবলৈ আৰম্ভ কৰে। সহজ ভাষাত ক’বলৈ হ’লে, জলবায়ু পৰিৱৰ্তনে হিমালয় পর্বতমালাৰ ছন্দকে সলনি কৰি পেলাইছে। ফলত বৃদ্ধি পাইছে চিন্তা, উদ্বেগ। অবিলম্বে সতর্ক হোৱাৰো পৰামৰ্শ দিছে জলবায়ু বিজ্ঞানীসকলে।