Lonka:
কৃষি বিভাগ আৰু জলসিঞ্চন বিভাগৰ আঁচনিৰ সফল ব্যৱহাৰৰে কিদৰে স্বনিৰ্ভৰ আৰু সফল কৃষক হিচাপে গঢ়ি তুলিব পাৰে, তাৰেই এক জ্বলন্ত দৃষ্টান্ত লংকাৰ দুই নং কাকীৰ যুৱ কৃষক সত্যেন বৰা I আধুনিক কৃষি পদ্ধতি, পৰিকল্পিত খেতি আৰু চৰকাৰী সহায়ৰ সঠিক ব্যৱহাৰে তেওঁ প্ৰমাণ কৰি দেখুৱাইছে যে কৃষিকাজো হ’ব পাৰে লাভজনক, সন্মানজনক আৰু স্থায়ী জীৱিকাৰ পথ।
“পথাৰ আমাৰ, বজাৰ আমাৰ”—এই কথাষাৰ কেৱল শ্ল’গানত সীমাবদ্ধ নাথাকি বাস্তৱত ৰূপ দিছে সত্যেন বৰাই। কৃষি বিভাগ আৰু জলসিঞ্চন বিভাগৰ বিভিন্ন আঁচনি গ্ৰহণ কৰি তেওঁ শালিধান খেতিৰ জৰিয়তে ইতিমধ্যে প্ৰায় ২৭ লাখ টকা উৰ্পাজন কৰিবলৈ সক্ষম হৈছে। সঠিক সময়ত সুবিধা, উন্নত বীজ আৰু পৰিকল্পিত খেতিৰ ফলতেই এই সাফল্য সম্ভৱ হৈছে বুলি তেওঁ কয়।
ধানৰ খেতিৰ লগতে সত্যেন বৰাই কল, নেমু আদি উদ্যানশস্যৰ খেতি আৰু পুখুৰীত মাছ পালন আৰম্ভ কৰিছে। এই সকলোবোৰ মিলাই তেওঁ বছৰি প্ৰায় ৩৫ লক্ষাধিক টকা আয় কৰিবলৈ সক্ষম হৈছে। নিজৰ উৎপাদিত সামগ্ৰী নিজেই বজাৰত বিক্ৰী কৰি তেওঁ মধ্যস্থতাবিহীন ব্যৱস্থা গঢ়ি তুলিছে, যাৰ ফলত কৃষকৰ ন্যায্য মূল্য নিশ্চিত হৈছে।
শেহতীয়াকৈ, জলসিঞ্চন সুবিধাৰ পূৰ্ণ সদ্ব্যৱহাৰেৰে সত্যেন বৰাই ২০ বিঘা মাটিত বৰো ধানৰ খেতি আৰম্ভ কৰিছে। এই বৰো ধানৰ খেতিৰ পৰা আগন্তুক সময়ছোৱাত ছয়ৰ পৰা সাত লক্ষাধিক টকা উৰ্পাজন কৰাৰ লক্ষ্য আগত ৰাখিছে তেওঁ।
বৰো ধানৰ খেতিত পানীৰ নিশ্চিত যোগান থকাৰ ফলত উৎপাদন বৃদ্ধি পাব বুলি তেওঁ আশাবাদী। সত্যেন বৰাই কয় যে, আজিৰ যুৱপ্ৰজন্মে যদি চৰকাৰী আঁচনিৰ বিষয়ে সঠিক তথ্য লৈ আগবাঢ়ে আৰু কৃষিক বিজ্ঞানসংগত দৃষ্টিভংগীৰে গ্ৰহণ কৰে, তেন্তে চাকৰিৰ পাছত নুঘূৰি নিজ অঞ্চলতেই স্বাৱলম্বী জীৱন গঢ়ি তুলিব পাৰে। কৃষিকাজে কেৱল অৰ্থনৈতিক লাভেই নহয়, সমাজত সন্মান আৰু আত্মবিশ্বাসো বৃদ্ধি কৰে বুলি তেওঁ উল্লেখ কৰে।
তেওঁ নিজৰ এই সাফল্যৰ আঁৰত কৃষি বিভাগ আৰু জলসিঞ্চন বিভাগৰ ভূমিকা বিশেষভাৱে উল্লেখ কৰাৰ লগতে চৰকাৰী সা-সুবিধা আৰু আঁচনি সঠিকভাৱে ৰূপায়ণ কৰাৰ বাবে বৰ্তমান চৰকাৰ আৰু মাননীয় মুখ্যমন্ত্ৰীলৈ কৃতজ্ঞতা জ্ঞাপন কৰে।
উল্লেখযোগ্য যে, সত্যেন বৰাৰ এই সফলতাৰ কাহিনী আজিৰ যুৱপ্ৰজন্মৰ বাবে এক স্পষ্ট বাৰ্তা—কৃষিকাজ অৱহেলা কৰিবলগীয়া ক্ষেত্ৰ নহয়, বৰঞ্চ ই স্বাৱলম্বিতাৰ এক শক্তিশালী মাধ্যম। তেওঁৰ এই উদ্যোগ আৰু অধ্যৱসায়ে কাকী অঞ্চলৰ বহু যুৱকক কৃষিকৰ্মৰ প্ৰতি আগ্ৰহী কৰি তুলিব বুলি আশা কৰা হৈছে।
শেষত ক’ব পাৰি যে, চৰকাৰী আঁচনিৰ সঠিক ব্যৱহাৰ, কঠোৰ পৰিশ্ৰম আৰু দৃঢ় মনোবল থাকিলে গ্ৰামাঞ্চলতেই সফল জীৱন গঢ়ি তুলিব পাৰি—এই কথাই পুনৰ এবাৰ প্ৰমাণ কৰিছে যুৱ কৃষক সত্যেন বৰাই।
