Web Portal:
ৰাজ্য চৰকাৰৰ তথ্য আৰু জনসংযোগ বিভাগৰ স্বীকৃতিপ্রাপ্ত সাংবাদিকসকলে এতিয়াৰে পৰা কোনো ৱেব প’র্টেল সংবাদ মাধ্যমৰ সৈতে জড়িত হ’ব নোৱাৰিব। যদিহে চৰকাৰী স্বীকৃতিপ্রাপ্ত কোনো সাংবাদিকে ‘বেৱ পৰ্টেল’ সংবাদ মাধ্যমত জড়িত থকাৰ প্ৰমাণ পোৱা যায়, তেন্তে সেই সাংবাদিক গৰাকীৰ চৰকাৰী স্বীকৃতি বাতিল হ’ব পাৰে। অর্থাৎ তথ্য আৰু জনসংযোগ বিভাগে তেওঁক প্ৰদান কৰা স্বীকৃতিপ্রাপ্ত সাংবাদিকৰ পৰিচয় পত্ৰখন বাতিল কৰা হ’ব।
বৃহস্পতিবাৰে নগাঁও জিলা আযুক্ত কাৰ্যালয়ৰ সভাগৃহত নৱবৰ্ষ উপলক্ষে চৰকাৰী স্বীকৃতিপ্রাপ্ত সাংবাদিকসকললৈ প্ৰেৰণ কৰা মুখ্যমন্ত্ৰীৰ শুভেচ্ছামূলক উপহাৰ বিতৰণ অনুষ্ঠানত ভাৰপ্ৰাপ্ত জিলা তথ্য আৰু জনসম্পৰ্কৰক্ষী বিষয়া অৰুণাভ চৌধুৰীয়ে এইদৰে ঘোষণা কৰি কয় যে, অলপতে ৰাজ্য চৰকাৰৰ বিভাগীয় আয়ুক্ত সচিব আৰু ৰাজ্যিক জনসংযোগ বিভাগৰ সঞ্চালকৰ সৈতে হোৱা এক বৈঠকত জনসংযোগ বিভাগৰ স্বীকৃতিপ্রাপ্ত সাংবাদিকসকলে কোনো প’র্টেল সংবাদ মাধ্যমত জড়িত হ’ব নোৱাৰাৰ সিদ্ধান্ত লোৱা হৈছিল। স্বাভাৱিকতে এই ঘোষণাই একাংশ সাংবাদিকৰ মাজত মিশ্রিত প্রতিক্ৰিয়াৰ সৃষ্টি কৰাৰ লগতে একাংশ সাংবাদিকক চিন্তিত কৰি তুলিছে। কাৰণ সাম্প্রতিক সময়ত ডিজিটেল তথা বৈদ্যুতিন মাধ্যমৰ জনপ্রিয়তা বৃদ্ধি পোৱাৰ লগে লগে ছপা মাধ্যমৰ প্রচলন বহুলাংশে হ্রাস পোৱাৰ সমান্তৰালকৈ সাংবাদিকসকলৰ গুৰুত্ব ক’ৰবাত ম্লান পৰা বিষয়টো সৰ্বত্ৰ চৰ্চা লাভ কৰিছে। যাৰ ফলত ছপা মাধ্যমৰ একাংশ সাংবাদিকো ৱেব প’র্টেল সাংবাদিকতাত জৰিত হৈ নিজৰ স্বকীয়তা অক্ষুন্ন ৰখাৰ চেষ্টা অব্যাহত ৰাখিছে। আনকি, শেহতীয়াকৈ ৰাজ্যখনৰ প্ৰায় প্ৰতিটো দৈনিক বাতৰি কাকত গোষ্ঠীয়ে নিজৰ নিজৰ ডিজিটেল সংস্কৰণৰ লগতে প’ৰ্টেল মুকলি কৰি নিয়মীয়াকৈ বাতৰি প্ৰকাশৰ ব্যৱস্থা কৰিছে।
উল্লেখ্য যে বাতৰি কাকতসমূহৰ এই প’ৰ্টেলত স্থানীয় সাংবাদিকলেই বাতৰি পৰিৱেশন কৰে। যিসকলৰ ভিতৰত অধিকাংশৰেই জনসংযোগৰ বিভাগৰ পৰিচয়-পত্ৰ আছে। তেনেক্ষেত্রত এতিয়া সেই সকল সাংবাদিকেও নিজৰ নিজৰ কাকত গোষ্ঠীৰ ৱেব প’ৰ্টেলত সংবাদ সেৱা আগবঢ়োৱাত প্রতিবন্ধকতা আহি পৰিছে। এই সমগ্র বিষয় সন্দর্ভত লিখিত নীতি নির্দেশনা আহিলে, বিষয়টো পৰৱৰ্তী সময়ত অধিক স্পষ্ট হৈ পৰিব।
