Majuli:
বিহাৰত কুখ্যাতি আর্জি থৈ অহা এছ পি সিংলা কোম্পানীয়ে নিৰ্মাণ কৰা মাজুলীৰ চেলেক-ধূনাগুৰিৰ চেলেং অংশৰ দলং মুখ্যমন্ত্রী ড:হিমন্ত বিশ্ব শৰ্মাই উদ্বোধন কৰাৰ ছদিনৰ পাছতে দলংখনৰ গার্ড ৱালত বৃহৎ ফাট মেলিছে। উল্লেখ্য যে লোহিত নৈৰ ওপৰত নিৰ্মাণ কৰা সাতশ মিটাৰ দৈৰ্ঘ্যৰ এই দলং ১২ ফেব্ৰুৱাৰীত মুখ্যমন্ত্রীয়ে উদ্বোধন কৰে। ইয়াকে লৈ স্থানীয় ৰাইজে সন্তুষ্টি প্রকাশ কৰে যদিও ৰাইজৰ এই সন্তুষ্টি ক্ষোভত পৰিণত হ’বলৈ অধিক দিন নালাগিল।
বহু কোটি টকা ব্যয় সাপেক্ষে নির্মাণ কৰা দলংখন মুকলিৰ মাথোঁ ছটা দিন পাছতে ফাট মেলাত ৰাইজে প্রচণ্ড ক্ষোভ প্রকাশ কৰিছে। স্থানীয় ৰাইজে অভিযোগ উত্থাপন কৰিছে যে দলংখন নির্মাণ কৰোতে নিৰ্মাণকাৰী সংস্থাই লুণ্ঠনৰ স্বাৰ্থত নিম্নমানৰ চিমেণ্ট-বালি ব্যৱহাৰ কৰাত দলংখনৰ এনে অৱস্থা হ’বলৈ পালে। এই ঘটনাৰ উচ্চ পৰ্যায়ৰ তদন্ত দাবী কৰিছে ছাত্ৰ সন্থাই। ঘটনাৰ তদন্তৰ বাবে সদৌ অসম ছাত্ৰ সন্থাৰ কেন্দ্ৰীয় কার্যনির্বাহক সদস্য ৰংগৰস মহন্তই তাৎক্ষণিকভাৱে এখন উচ্চ পৰ্যায়ৰ সমিতি গঠনৰ দাবী উত্থাপন কৰিছে।
উল্লেখ্য যে মাজুলী আৰু লখিমপুৰক পথেৰে সংযোগৰ উদ্দেশ্যে সোৱণশিৰি আৰু লোহিত নৈৰ ওপৰত দুখন দলং নিৰ্মাণৰ লক্ষ্য লয় চৰকাৰে। ইয়াৰে সোৱণশিৰি দলংখনৰ মুঠ দৈর্ঘ্য প্রায় ২,৮৮০ মিটাৰ আৰু লোহিত নৈৰ দলংখনৰ মুঠ দৈর্ঘ্য প্রায় সাতশ মিটাৰ। মুঠ ৬৯৪ কোটি টকাৰে ‘অসম মালা’ আঁচনিৰ অধীনত মাজুলীৰ বালিচাপৰিৰ পৰা লখিমপুৰৰ বঙালমৰালৈকে দুয়োখন দলংসহ মুঠ ১৯ কিলোমিটাৰ চাৰিশাৰীযুক্ত পথৰ নিৰ্মাণ কাৰ্য আৰম্ভ হয় ২০২২ৰ ১১ ডিচেম্বৰত। এই নিৰ্মাণ কাৰ্যৰ আধাৰশিলা স্থাপন কৰিছিল মুখ্যমন্ত্রী ড° শৰ্মাই। সোৱণশিৰি নদীৰ অংশত মুঠ ৬১টা আৰু লোহিত নৈৰ অংশত মুঠ ২১টা খুঁটাৰে নিৰ্মাণ কৰা দলঙৰ ঠিকা লাভ কৰে কুখ্যাত এই পি সিংলা কোম্পানীয়ে।
অৱশেষত যোৱা ১২ ফেব্ৰুৱাৰীত মুখ্যমন্ত্রীয়ে মাজুলী ভ্রমণকালত চেলেক-ধূনাগুৰি চেলেং অংশত থকা ৭৫০ মিটাৰ দৈৰ্ঘ্যৰ দলঙৰ উদ্বোধন কৰে। দলংখন মুকলিৰ পাছতে স্থানীয় ৰাইজে দলঙেৰে অহা-যোৱা আৰম্ভ কৰে। এনে অৱস্থাতে দলঙৰ সুন্দৰকৈ ৰং দিয়া গার্ড ৱালত স্থানীয় লোকে প্রত্যক্ষ কৰে বহু বৃহৎ ফাট। স্বাভাৱিকতে এই নতুন দলঙৰ এনে অৱস্থা প্রত্যক্ষ কৰা ৰাইজৰ চকু কপালত উঠে।
উল্লেখ্য যে কিছু বছৰ পূৰ্বে বিহাৰত এছ পি সিংলা কোম্পানীয়ে নিৰ্মাণ কৰা দলং মুকলিৰ পাছতে ভাঙি পৰাৰ ঘটনা সংঘটিত হৈছিল। এনে এটা কুখ্যাতি থকা নিৰ্মাণকাৰী প্ৰতিষ্ঠানকে অসমত বৃহৎ বৃহৎ দলঙৰ নিৰ্মাণৰ দায়িত্ব চৰকাৰে প্ৰদান কৰা কাৰ্যক বহুতে সহজভাৱে ল’ব পৰা নাই। লক্ষ্যণীয় যে কিছুদিন পূর্বে স্বয়ং প্রধানমন্ত্রীয়ে উদ্বোধন কৰা গুৱাহাটী-উত্তৰ গুৱাহাটী সংযোগী দলঙতো উদ্বোধনৰ পাছতে ফাট মেলে। অথচ এই দলং নির্মাণত তিনি হেজাৰ কোটিৰো অধিক টকা ব্যয় হয়।
উল্লেখ্য যে এছ পি সিংলা কোম্পানীয়ে মাজুলী-যোৰহাট সংযোগী দলং নিৰ্মাণৰ ঠিকাও লাভ কৰিছে। কুখ্যাত প্ৰতিষ্ঠানটোৰ প্ৰতি চৰকাৰী এনে দৰদৰ কি ৰহস্য আছে সেয়া অৱশ্যে স্পষ্ট হোৱা নাই। উল্লেখ্য যে বিগত কিছু দিনত ৰাজ্যত কে’বাখনো পকী দলং ভাঙি পৰাৰ ঘটনা সংঘটিত হয়। বৰাক উপত্যকাতো এখন দলং ভাঙি পৰি বহুসংখ্যক চলন্ত বাহন নৈত সোমাই পৰাৰ ঘটনা সংঘটিত হয়। তাৰ পাছতে কালি মৰিগাঁও-লাহৰীঘাট সংযোগী গড়কাপ্টানী পথত থকা মাথোঁ পাঁচ বছৰ পুৰণি এখন পকী দলং ভাঙি পৰি চাৰিজনকৈ শ্রমিক গুৰুতৰভাৱে আহত হয়।
এই দলংখন নিৰ্মাণৰ তিনি বছৰ পাছতে ছিৰাল ফাট দিছিল। পাছত লোক নির্মাণ বিভাগে দলংখনৰ মেৰামতিৰ কাম কৰাই থকা অৱস্থাত বুধবাৰে শোকাৱহ ঘটনাটো সংঘটিত হয়। দলংখন ভাঙি পৰাৰ ফলত দলংখনৰ মেৰামতি কাম কৰি থকা চাৰিজনকৈ শ্রমিক গুৰুতৰভাৱে আহত হৈ চিকিৎসাধীন হ’ব লগা হয়।
