Mushrooms:✒️সমাজ সলনি হৈছে। আগতে মহিলাৰ পৰিচয় সীমাবদ্ধ আছিল ঘৰৰ দায়িত্বৰ মাজত। কিন্তু আজিৰ মহিলাই নিজৰ সামর্থ্য চিনিছে। এতিয়া মহিলাই নিজে উপার্জন কৰে, সিদ্ধান্ত লয় আৰু নিজৰ সপোন নিজেই গড়ে।
কাঠফুলা অর্থাৎ মাছৰুম খেতি এনে এক উদ্যোগ যিয়ে গাঁৱৰ অসংখ্য মহিলাক আত্মনিৰ্ভৰ জীৱনৰ পথ দেখুৱাইছে। বহুত মাটিৰ প্ৰয়োজন নাই, বৃহৎ পুঁজিৰো প্রয়োজন নাই এই খেতিৰ বাবে। এটা সৰু কোঠা আৰু অলপ ইচ্ছাশক্তিয়েই আৰম্ভকৰিব পাৰে নতুন জীৱনৰ অধ্যায়।
কাঠফুলা আচলতে পুষ্টিগুণ সমৃদ্ধ এক খাদ্য। এই খাদ্য এতিয়া স্বাস্থ্য সচেতন সমাজত অতি জনপ্রিয় হৈ উঠিছে। প্র’টিন, ভিটামিন, খনিজ পদার্থ আৰু কম চর্বিযুক্ত হোৱাৰ বাবে চিকিৎসকেও মাছৰুম খাদ্যত অন্তর্ভুক্ত কৰিবলৈ পৰামৰ্শ দিয়ে। এই কাৰণেই বজাৰত ইয়াৰ চাহিদা দিনক দিনে বৃদ্ধি পাইছে
আজিৰ বজাৰত মাছৰুম কেৱল এক খাদ্য সামগ্রী নহয় ই এক উদ্যোগ। গ্রামাঞ্চলৰ বহু মহিলা বাহিৰলৈ গৈ নিয়মীয়া কাম কৰিব নোৱাৰে। ঘৰৰ দায়িত্ব, সন্তান, বৃদ্ধ অভিভাৱক এইবোৰৰ মাজতে তেওঁলোকৰ সময় সীমিত কাঠফুলাৰ খেতিৰ বিশেষত্ব হ’ল- ঘৰৰ ভিতৰতে কৰিব পাৰি, মাটিৰ প্ৰয়োজন নাই দৈনিক কঠিন শাৰীৰিক পৰিশ্ৰম কৰিব নালাগে, অতি কম পুঁজিত আৰম্ভণি কৰিব পাৰি।
অৰ্থাৎ ঘৰৰ দায়িত্ব এৰি নিদিয়াকৈও এই ব্যৱসায়ৰ যোগেদি এগৰাকী মহিলা উপাৰ্জনকাৰী হ’ব পাৰে। এই খেতি আৰম্ভ কৰাৰ আগতে মৌলিক প্রশিক্ষণ লোৱা অতি প্রয়োজনীয়। অনেক কৃষি কার্যালয়, আত্মনিৰ্ভৰ গোট বা প্রশিক্ষণ কেন্দ্রত কাঠফুলা খেতিৰ ওপৰত প্রশিক্ষণ দিয়া হয়। অলপ শিকিলেই এই খেতি সহজে আয়ত্ত কৰিব পাৰি। এই খেতিৰ বাবে বিশেষ মাটি নালাগে; প্রয়োজন মাথোঁ সঠিক পৰিৱেশ। ঠাণ্ডা কোঠা, কম পোহৰ, পৰিষ্কাৰ পৰিৱেশ, বায়ু চলাচল কৰিব পৰা স্থান। ঘৰৰ খালী কোঠা, বাৰাণ্ডা, বাঁহৰ ঘৰ বা গুদাম সদৃশ ঠাই ব্যৱহাৰ কৰিব পাৰি।
খেতি কৰিবৰ বাবে যাবতীয় প্রস্তুতিসমূহ হ’ল উন্নত মানৰ বীজ প্লাষ্টিক বেগত ভৰোৱা হয়। পাছত বেগবোৰ ৰেকত ৰখা হয়। নিয়মীয়াকৈ পানী ছটিয়াই ৰাখিব লাগে, কোঠাটো পৰিষ্কাৰকৈ ৰাখিব লাগে। অতি প্ৰখৰ ৰ’দ বা গৰমৰ পৰা সুৰক্ষা দিব লাগে। ১৫-২০ দিনৰ ভিতৰতে প্রথম কাঠফুলা গজি উঠে। এইটোৱেই খেতিয়কৰ বাবে আটাইতকৈ আনন্দৰ মুহূৰ্ত।
কাঠফুলাৰ খেতি হৈছে সোনকালে আয় প্রদানকাৰী উদ্যোগ। এটা বেগৰ পৰা বহু বাৰ উৎপাদন, দৈনিক বিক্রীও সম্ভব, বজাৰত উচ্চ মূল্য, ৰেষ্টুৰেণ্ট আৰু হোটেলৰ স্থায়ী চাহিদা, সৰু আৰম্ভণিৰেই বহু মহিলাই মাহে উল্লেখযোগ্য আয় কৰিবলৈ সক্ষম হৈছে। মাত্র কেঁচা কাঠফুলা বিক্ৰী কৰাতেই সীমাবদ্ধ থাকিব নালাগে। ইয়াৰ সম্ভাবনা বহুত আছে। যেনে- শুকান কাঠফুলা, তাৰ গুড়ি, আচাৰ, পেকেটজাত খাদ্য, অনলাইন বিক্রী এইবোৰে মহিলাক খেতিয়কৰ পৰা উদ্যোগীলৈ ৰূপান্তৰ কৰে।
যেতিয়া কে’বাগৰাকী মহিলাই একেলগে কাম কৰে তেতিয়া উৎপাদন বৃদ্ধি পায়, বজাৰ সহজে পোৱা যায়, খৰচ ভাগ হয় লগতে সাহস বৃদ্ধি পায়। অসমৰ বহু গাঁৱত আত্মনিৰ্ভৰ মহিলা গোটে কাঠফুলা খেতিৰে আৰ্থিক বিপ্লব ঘটাইছে। স্বাবলম্বী হোৱা মানে কেবল টকা উপার্জন নহয়। ই এগৰাকী মহিলাৰ চিন্তা, আত্মবিশ্বাস আৰু জীৱনৰ দৃষ্টিভংগী সলনি কৰে।
কাঠফুলা অর্থাৎ মাছৰুম খেতি আজি বহু মহিলাৰ বাবে উপাৰ্জনৰ উৎস, আত্মসম্মানৰ শক্তি আৰু স্বাধীন জীৱনৰ পথ হৈ উঠিছে।