Guwahati:
ৰাজ্যসভাৰ নিৰ্বাচনৰ বাবে এনডিএ প্ৰাৰ্থী হিচাপে ইউপিপিএলৰ পৰা প্ৰক্ষেপিত প্ৰমোদ বড়োৰ মনোনয়নপত্ৰত স্বাক্ষৰ দান কৰে এআইইউডিএফ তিনি বিধায়ক কৰিমুদ্দিন বৰভূঞা, নিজামুদ্দিন চৌধুৰী আৰু জাকিৰ হুছেইন লস্কৰে ৷
উল্লেখ্য যে ৰাজ্যসভাৰ মনোনয়নপত্ৰ ১০ জন বিধায়কৰ স্বাক্ষৰ থকাটো বাঞ্ছনীয় ৷ এনেক্ষেত্ৰত ইউপিপিএলৰ ৭ বিধায়কৰ স’তে স্বাক্ষৰদান কৰে এআইইউডিএফ তিনি বিধায়কে ৷
মনকৰিবলগীয়া যে ৰাজ্যসভাৰ নিৰ্বাচনৰ বাবে বিৰোধী প্ৰাৰ্থী হিচাপে প্ৰতিদ্বন্দ্বিতা কৰিবলৈ আগ্ৰহ প্ৰকাশ কৰিছিল এআইইউডিএফ মুৰব্বী বদৰুদ্দিন আজমলে ৷ এই সন্দৰ্ভত এপিচিচিলৈ দলটোৰ ফালৰ পৰা পত্ৰও প্ৰেৰণ কৰিছিল ৷ কিন্ত কোনো সহাৰী নিদিলে কংগ্ৰেছে ৷
এনে ঘটনাক্ৰমৰ মাজতে এআইইউডিএফ নীতিৰ বিপৰীতে গৈ এনডিএ প্ৰক্ষেপিত প্ৰাৰ্থী প্ৰমোদ বড়োৰ মনোনয়নপত্ৰত স্বাক্ষৰ দান কৰিলে দলটোৰ তিনি বিধায়কে ৷
দিছপুৰৰ এক ঘনিষ্ঠ সূত্ৰই জানিব দিয়া মতে এআইইউডিএফ তিনি বিধায়ক কৰিমুদ্দিন বৰভূঞা, নিজামুদ্দিন চৌধুৰী আৰু জাকিৰ হুছেইন লস্কৰে দুই এদিনৰ ভিতৰতে অগপত যোগদান কৰাৰ সম্ভাৱনা আছে ৷ ইতিমধ্যে আজি এআইইউডিএফৰ পৰা পদত্যাগ কৰিছে কৰিমুদ্দিন বৰভূঞা আৰু জাকিৰ হুছেইন লস্কৰে ৷