Dibrugarh University:✒️উজনি অসমৰ উচ্চ শিক্ষাৰ অন্যতম কেন্দ্ৰ ডিব্ৰুগড় বিশ্ববিদ্যালয় (Dibrugarh University)ত অনুষ্ঠিত হয় বিশ্ববিদ্যালয়খনৰ ২৪তম সমাৱর্তন। এই সমাৱর্তনত বিশিষ্ট শল্য চিকিৎসক সৰ্বেশ্বৰ ভূঞা(Sarbeswar Bhuyan)ক ডি.এচ চি. আৰু অৰুণাচল প্ৰদেশৰ প্ৰখ্যাত সাহিত্যিক মামাং দাই(Mamang Dai)ক ডি. লিট. উপাধিৰে সন্মানিত কৰে বিশ্ববিদ্যালয় কৰ্তৃপক্ষই।
ডা° সৰ্বেশ্বৰ ভূঞা এজন অভিজ্ঞ আৰু সুপৰিচিত শল্য চিকিৎসক হিচাপে চিকিৎসা জগতত সুপ্ৰতিষ্ঠিত। ডিব্ৰুগড়ৰ Assam Medical College ৰ অধ্যাপক হিচাপে কৰ্মৰত ভূঞা বিশেষকৈ দৰিদ্ৰ ৰোগীসকলৰ প্ৰতি আগবঢ়োৱা চিকিৎসা সেৱা, গভীৰ মানৱীয় দৃষ্টিভংগী আৰু সমাজমুখী মনোভাবৰ বাবে সুপৰিচিত। গ্ৰামাঞ্চল আৰু সুবিধা বঞ্চিত লোকসকলৰ বাবে সহজলভ্য চিকিৎসা সেৱা নিশ্চিত কৰাৰ ক্ষেত্ৰত তেওঁ দীৰ্ঘদিন ধৰি উল্লেখযোগ্য অৱদান আগবঢ়াই আহিছে।
চিকিৎসা-শিক্ষা আৰু সমাজসেৱাৰ ক্ষেত্ৰত থকা তেওঁৰ অৱদানৰ স্বীকৃতি স্বৰূপে বিশ্ববিদ্যালয়ে তেওঁক D.Sc. উপাধিৰে সন্মানিত কৰে।
আনহাতে অৰুণাচল প্ৰদেশৰ খ্যাতনামা কবি, ঔপন্যাসিক আৰু সাংবাদিক Mamang Daiয়ে উত্তৰ-পূব ভাৰতৰ জনজাতীয় সংস্কৃতি, লোককথা আৰু প্ৰাকৃতিক পৰিৱেশক ইংৰাজী সাহিত্যত এক স্বতন্ত্ৰ ধাৰাৰে উপস্থাপন কৰি বিশেষ খ্যাতি অৰ্জন কৰিছে। তেওঁৰ উপন্যাস The Black Hill ৰ বাবে ২০১৭ চনত তেওঁ সাহিত্য অকাডেমিৰ (Sahitya Akademi) বঁটা লাভ কৰে। সাহিত্য আৰু শিক্ষাৰ ক্ষেত্ৰত অৱদানৰ বাবে তেওঁক ২০১১ চনত পদ্মশ্ৰী(Padma Shri)সন্মানো প্ৰদান কৰা হৈছিল।
উল্লেখযোগ্য যে অৰুণাচল প্ৰদেশৰ প্ৰথম মহিলা ভাৰতীয় প্ৰশাসনিক সেৱা(Indian Administrative Service)(IAS) বিষয়া হিচাপে ১৯৭৯ চনত নিৰ্বাচিত হোৱা মামাং দাইয়ে পিছলৈ সাহিত্য আৰু সাংবাদিকতাৰ ক্ষেত্ৰখনত আত্মনিয়োগ কৰে।The Legends of Pensam,River Poems আৰু The White Shirts of Summer তেওঁৰ উল্লেখযোগ্য গ্ৰন্থ। বৰ্তমান তেওঁ অৰুণাচল প্ৰদেশৰ ইটানগৰত (Itanagar) বাস কৰে।
এই সমাৱর্তনত বিশ্ববিদ্যালয়খনৰ আচাৰ্য তথা অসমৰ ৰাজ্যপাল লক্ষ্মণ প্ৰসাদ আচার্য (Lakshman Prasad Acharya), অসম সাহিত্য সভাৰ প্ৰাক্তন সভাপতি তথা বিশিষ্ট সাহিত্যিক ধ্ৰুবজ্যোতি বৰা(Dhrubajyoti Bora), বিশ্ববিদ্যালয়ৰ উপাচাৰ্য জিতেন হাজৰিকা(Jiten Hazarika (আৰু পঞ্জীয়ক পৰমানন্দ সোণোৱাল(Parmananda Sonowal) উপস্থিত থাকে।
উল্লেখযোগ্য যে এই সমাৱর্তনত মুঠ ১২,২৬১ জন শিক্ষাৰ্থীক বিভিন্ন পাঠ্যক্ৰমৰ অন্তৰ্গত ডিগ্ৰী প্ৰদান কৰা হয়। ইয়াৰে ১,৯৬৫ জন শিক্ষাৰ্থী আনুষ্ঠানিক কাৰ্যসূচীত উপস্থিত থাকে। লগতে বিভিন্ন বিষয়ত সৰ্বোচ্চ নম্বৰ লাভ কৰা শিক্ষাৰ্থীসকলক মুঠ ৪১টা বিষয়ত ৰাজ্যপালৰ স্বৰ্ণপদকো প্ৰদান কৰা হয়।