কৰ’না ভাইৰাছৰ সংক্ৰমণ প্ৰতিৰোধৰ স্বাৰ্থত স্পেনিছ গাৰ্ডেন চৌহদৰ তলাবন্ধৰ ম্যাদ পুনৰ ১৪ দিনলৈ বৃদ্ধি কৰিছে কামৰূপ মহানগৰ জিলা প্ৰশাসন ৷ ক’ভিড১৯ ৰ সংশোধিত গাইড লাইন অনুসৰি আজিৰে পৰা কাৰ্যকৰী হোৱাকৈ যোৱা চাৰি এপ্ৰিলত ডি ডি এম এ কে নম্বৰযোগে জাৰি কৰাৰ নিৰ্দেশনাৰ ম্যাদ পুনৰ ১৪ দিনৰ বাবে জিলা প্ৰশাসনে বৃদ্ধি কৰে । পৰৱৰ্তী নিৰ্দেশনা জাৰি নকৰা পৰ্যন্ত পুনৰ ১৪ দিনলৈ স্পেনিছ গাৰ্ডেন এপাৰ্টমেণ্টৰ চৌহদত কোনো বাহিৰা লোকে প্ৰবেশ কৰিব নোৱাৰিব। স্পেনিছ গাৰ্ডেন এপাৰ্টমেণ্ট চৌহদৰ আৱাসীসকলৰ ক্ষেত্ৰতো সমানে প্ৰযোজ্য হ’ব এই নিৰ্দেশনা ৷ জিলা প্ৰশাসনৰ এক শীৰ্ষ সূত্ৰই সদৰি কোৱা অনুসৰি স্পেনিছ গাৰ্ডেন চৌহদৰ ডি ব্লকৰ ৭০৪ নম্বৰ এপাৰ্টমেণ্টৰ নিবাসী মণীষ তিব্ৰেৱাল কৰ’না ভাইৰাছত আক্ৰান্ত হোৱাৰ পিছত প্ৰথমবাৰৰ কাৰণে চাৰি এপ্ৰিলত প্ৰশাসনে ১৪ দিনৰ কাৰণে তলাবন্ধ কৰে ৷
পৰৱৰ্তী সময়ত কামৰূপ মহানগৰ জিলাৰ স্বাস্থ্য বিভাগে মহানগৰীৰ আৰ জি বৰুৱা পথস্থিত স্পেনিছ গাৰ্ডেন চৌহদটো কনটেইনমেন্ট জ’ন হিচাপে চিহ্নিত কৰে । ইয়াৰ পৰিপ্ৰেক্ষিতত ২০২০ দ্য আছাম ক’ভিড১৯ ৰ সংশোধিত গাইড লাইন অনুসৰি আজিৰে পৰা কাৰ্যকৰী হোৱাকৈ যোৱা চাৰি এপ্ৰিলত জাৰি কৰা তলাবন্ধ সম্পৰ্কীয় নিৰ্দেশনা ম্যাদ পুনৰ ১৪ দিনৰ বাবে বৃদ্ধি কৰা হয়। জিলা দুৰ্যোগ ব্যৱস্থাপনা বিভাগৰ অধ্যক্ষ তথা কামৰূপ মহানগৰ জিলাৰ উপায়ুক্ত বিশ্বজিত পেগুৱে আজি জাৰি কৰা এই নিৰ্দেশনা উলংঘা কৰাসকলৰ বিৰুদ্ধে ২০২০ ৰ দ্য আছাম ক’ভিড ১৯ বিধি,২০০৫ ৰ দুৰ্যোগ ব্যৱস্থাপনা আইন আৰু ১৮৯৭ ৰ দ্য এপিডেমিক ডিজিজ আইনৰ অধীনত ব্যৱস্থা গ্ৰহণ কৰিব বুলি সূত্ৰটোৱে জনায়। লগতে পূৰ্বৰ দৰে স্পেনিছ গাৰ্ডেনক সকলো সেৱা আগবঢ়াব বুলিও জনায় সূত্ৰটোৱে ৷ আনহাতে মহানগৰীত সুৰা গুটখাৰ বিক্ৰীৰ লগতে ৰাজহুৱা স্থানত থু পিক পেলোৱাটো নিষিদ্ধ কৰিছে গুৱাহাটী পৌৰ নিগমে ৷ লগতে পৰৱৰ্তী নিৰ্দেশনা জাৰি নকৰা পৰ্যন্ত এই নিৰ্দেশনা মহানগৰীত কঠোৰভাৱে বলৱৎ হ’ব বুলিও একেটা নিৰ্দেশনাত উল্লেখ আছে ৷
