কৰ’না ভাইৰাছ প্ৰতিৰোধ কৰিবলৈ দেশজুৰি দীঘলীয়া তলাবন্ধৰ ফলত ব্যক্তিগত প্ৰতিষ্ঠান অথবা তাত কৰ্মৰত কৰ্মচাৰীয়ে দেশৰ ঠায়ে ঠায়ে বৃহৎ আৰ্থিক সংকটৰ সন্মুখীন হৈছে । এই অৱস্থাৰ পৰা সকাহ দিবলৈ বিত্তমন্ত্ৰী নিৰ্মলা সীতাৰমণে কয় যে কেন্দ্ৰীয় চৰকাৰে কৰ্মচাৰীৰ ভৱিষ্যতনিধি (ইপিএফ) আৰু টি ডি এছৰ ধন কম পৰিমাণে কৰ্তনৰ সিদ্ধান্ত লৈছে ৷ ইয়াৰ ফলত কৰ্মচাৰীসকলে অধিক দৰমহা পাব আৰু নিয়োগকৰ্তাসকলেও সকাহ লাভ কৰিব । তিনিমাহৰ বাবে এই ধন মালিক আৰু কৰ্মচাৰী উভয়ৰে হৈ চৰকাৰে আদায় দিব বুলি সীতাৰমণে কয় ৷ তেওঁ কয় যে ভৱিষ্যতনিধিৰ নিয়ম অনুযায়ী কৰ্মচাৰীসকলৰ মূল দৰমহাৰ ১২ শতাংশ ই পি এফত কৰ্তন কৰা হয় ৷ একেদৰে নিয়োগকৰ্তাই ১২ শতাংশ ধন কৰ্মচাৰীৰ একাউণ্টত জমা দিব লাগে ।
সীতাৰমণে ঘোষণা কৰে যে আগন্তুক তিনিমাহ অৰ্থাৎ জুন,জুলাই আৰু আগষ্টৰ বাবে এই ধন ১০ শতাংশ কৰ্তন কৰা হ’ব ৷ তদুপৰি মালিকেও ১২ শতাংশৰ সলনি ১০ শতাংশ জমা দিব লাগিব ৷ অৱশ্যে চৰকাৰী আৰু চৰকাৰী সাহায্যপ্ৰাপ্ত কোম্পানীসমূহৰ ক্ষেত্ৰত নিয়ম অনুযায়ী ১২ শতাংশই কৰ্তন কৰা হ’ব আৰু চৰকাৰেও ১২ শতাংশই ধন জমা দিব ৷ সীতাৰমণে কয় যে ইয়াৰ ফলত ই পি এফে সামৰি লোৱা ৬.৫ লাখ প্ৰতিষ্ঠান তথা ৪.৩ কোটি কৰ্মচাৰীয়ে সকাহ লাভ কৰিব বুলিব সীতাৰমণে কয় ৷চৰকাৰে কয় যে কৰ্মচাৰীৰ ই পি এফৰ অংশ তেওঁলোকে আদায় দিব ।
সীতাৰমণে ঘোষণা কৰে যে কৰ আদায়ৰ ক্ষেত্ৰতো সকাহ হৈছে ৷আয়কৰ দাখিলৰ সময়ৰ চলিত বৰ্ষৰ ৩০ নবেম্বৰ পৰ্যন্ত কৰা হৈছে ৷ ইয়াৰ ফলত ৫০ হাজাৰ কোটি টকা সাধাৰণ মানুহৰ হাতলৈ যাব বুলি তেওঁ কয় ৷আজিৰে পৰা এই ব্যৱস্থা কাৰ্যকৰী কৰা হয় । টি ডি এছৰ ক্ষেত্ৰত আগন্তুক এবছৰৰ বাবে ২৫ শতাংশ কমকৈ কৰ্তন কৰা হ’ব । সীতাৰমণৰ মতে ইয়াৰ ফলত কৰ্মচাৰীসকলৰ অধিক ধন আহিব । ইপিনে মালিকপক্ষৰ হাততো কিছু নগদ ধন থাকিব । ২০২১ চনৰ ৩১ মাৰ্চ পৰ্যন্ত টি ডি এছ আৰু টি চি এচ ২৫ শতাংশ হ্ৰাস কৰা হ’ব বুলি সীতাৰমণে সদৰী কৰে ।
