মুম্বাইত কৰ্মৰত তথা তলাবন্ধৰ সময়ত আৱদ্ধ হৈ পৰা লোকসকলক নিজ ৰাজ্যত উপস্থিত হোৱাত সহায় কৰা বলীউডৰ অভিনেতা চনু সুড এইকেইদিন চৰ্চাত আছে । চনুৱে এদিনত প্ৰায় এক হাজাৰ লোকক নিজৰ গৃহত উপস্থিত হোৱাত সহায় কৰিছে । অভিনেতা চনুৱে এক সাক্ষাৎকাৰত আৱদ্ধ হৈ পৰা লোকসকলক নিজ গৃহ উপস্থিত কৰোৱা সন্দৰ্ভত কয় যে, “১৫ মে’ৰ আশে পাশে মই আৱদ্ধ প্ৰবাসী লোকসকলক ফল মূল আৰু আন কিছুমান সাহাৰ্য দিছিলো । সেইসময়ত তেওঁলোকে মোক খোজ কাঢ়ি কৰ্ণাটক আৰু বিহাৰলৈ যোৱাৰ কথা কয় ৷ সেই কথা শুনি মোৰ উশাহ বন্ধ হৈ গৈছিল ৷ কাৰণ বয়োজ্যেষ্ঠ লোক, শিশু এইসকলোবোৰ কিদৰে খোজ কাঢ়ি যাত্ৰা কৰিব । ইয়াৰ পিছত মই তেওঁলোকক ক’লো যে অন্তত দুদিন ৰওঁক আপোনালোক ৷ মই যোৱাৰ ব্যৱস্থা কৰোঁ। যদি অপেক্ষা কৰিব নোৱাৰে তেনেহ’লে নিশ্চয় যাব পাৰে ৷” আৰু এনেদৰেই বলীউডৰ প্ৰায় সমূহ ছবিত ভিলেইনৰ চৰিত্ৰত অভিনয় কৰা চনু সুডে প্ৰবাসীসকলক নিজ গৃহত উপস্থিত কৰোৱাৰ ব্যৱস্থা আৰম্ভ কৰিলে ৷
ইফালে, দুদিনতে চনুৱে কৰ্ণাটক, বিহাৰ আৰু মহাৰাষ্ট্ৰ চৰকাৰৰ তথা প্ৰশাসনৰ অনুমতি লৈ প্ৰথমবাৰতে ৩৫০ জন লোকক উত্তৰ প্ৰদেশলৈ পঠায় ৷ এই প্ৰসংগত চনুৱে কয় “মই কাম কৰি গ’লো আৰু সংখ্যা বাঢ়ি গ’ল ৷ প্ৰথমতে ইয়াৰ কাৰণে মই ১০ ঘন্টা কাম কৰিছিলো যদিও এতিয়া ২০ ঘন্টা কাম কৰিছো ৷ পুৱা ৬ টা বজাৰ পৰা ফোন বাজে ৷ মোৰ সম্পূৰ্ণ কৰ্মচাৰীৰ লগতে সহকৰ্মী নীতি গোয়েলেও মোক সহায় কৰিছে ৷ চেষ্টা কৰিছো যাতে কোনো বাকী ৰৈ নাযায় ৷” চনুৱে নিজৰ টুইটাৰত প্ৰকাশ কৰিছে যে দৈনিক ১০০০ ৰ পৰা ১২০০ লোক উত্তৰপ্ৰদেশ,বিহাৰ,তেলেংগনা আৰু কৰ্নাটকত উপস্থিত হৈছে ৷
উল্লেখযোগ্য যে চনুৱে এই লোকসকলক কিয় সহায় কৰিলে এই প্ৰশ্নৰ উত্তৰত অভিনেতাজনে কয় “যেতিয়া এই লোকসকলৰ শিশুসকলে পিতৃ বা ঘৰৰ কোনো বা বৃদ্ধৰ লগত খোজকাঢ়ি যাত্ৰা কৰিব ৷ তেতিয়া ক’ৰবাত আৰক্ষীৰ প্ৰহাৰ বা বৃদ্ধ লোকসকলৰ মৃত্যু হ’ব পাৰে । গতিকে সেইসময়ত সেই শিশুসকলৰ মনত ক্ৰিয়া কৰিব যে মোৰ দেউতাক পুলিচে প্ৰহাৰ কৰিছে বা মোৰ ককা আইতা অথবা পৰিয়ালৰ কোনো লোকৰ এই যাত্ৰাত মৃত্যু হৈছে ৷ এই সকলোবোৰ স্মৃতি সেই শিশুবোৰে সমগ্ৰ জীৱন লগতে কঢ়িয়াই লৈ ফুৰিব ৷ গতিকে মই নিবিচাৰো যে শিশুবোৰ স্মৃতি তিতা হওক ৷”
আনহাতে দৰিদ্ৰক সহায় কৰা প্ৰেৰণা বা সংস্কাৰ নিজৰ ঘৰতেই লাভ কৰিছিল চনু সুডে ৷ আৰ্তজনক সহায় কৰাতো জীৱনৰ একমাত্ৰ সফলতা বুলি পিতৃ-মাতৃয়ে শিক্ষা দিছিল চনুক ৷ চনু সুডৰ ঘৰ পঞ্জাবৰ মোগাত ৷ পেছাত চনু এজন অভিযন্তা ৷ মাতৃ এগৰাকী অধ্যাপিকা ৷ চনুৰ মাতৃয়ে পুৱা গধূলি দুখীয়া দৰিদ্ৰৰ ল’ৰা ছোৱালীক পঢ়াইছিল ৷ পিতৃ কাপোৰৰ ব্যৱসায়ী ৷ সম্প্ৰতি পিতৃৰ কাপোৰৰ ব্যৱসায়ৰ দায়িত্বত আছে চনু সুড ৷ কিন্তু যিয়েই নহওক চিনেমাত ভিলেইনৰ চৰিত্ৰত অভিনয় কৰা অভিনেতাজনৰ এই মহানুভৱতাক সকলো দেশবাসীয়ে আদৰি লৈছে ৷
