কাজিৰঙা ৰাষ্ট্ৰীয় উদ্যানত সোনালী বাঘৰ প্ৰসংগতো বিভিন্ন মাধ্যমত প্ৰচাৰ হোৱাৰ পিছত বন বিষয়া প্ৰবীণ কাচোৱানে প্ৰকাশ কৰা মতে এইয়া ভাৰতত থকা একমাত্ৰ সোনালী বাঘ । কাজিৰঙা ৰাষ্ট্ৰীয় উদ্যানৰ অন্তঃভাগৰ ঘন অৰণ্যত এই বাঘৰ ফ’টো তুলিছিল ময়ুৰেশ হেন্দ্ৰে নামৰ ৱাইল্ড লাইফ ফটোগ্ৰাফাৰজনে ৷ আৰু এই সোনালী বাঘৰ দূৰ্লভ ছবিখন ছ’চিয়েল মিডিয়াত প্ৰকাশ পোৱাৰ পিছত স্পষ্টীকৰণ দিছে কাজিৰঙা ৰাষ্ট্ৰীয় উদ্যান কৰ্তৃপক্ষই ।
ঐতিহ্যক্ষেত্ৰ কাজিৰঙা ৰাষ্ট্ৰীয় উদ্যানৰ ব্ৰাঘ্য প্ৰকল্পৰ বন্য প্ৰাণীৰ গৱেষক বিষয়া ৰবীন্দ্ৰ নাথ শৰ্মাই এক তথ্যত প্ৰকাশ কৰা মতে, জেনেটিক বৈষম্যৰ কাৰণেই বাঘৰ ছালৰ বৰণ এনেকুৱা হ’ব পাৰে । এয়া কোনো নতুন প্ৰজাতি নহয় । ৰাষ্ট্ৰীয় উদ্যানখনত ২০১৪ ত ব্ৰাঘ্য গণনাৰ বাবে স্থাপন কৰা স্বয়ংক্ৰিয় কেমেৰাত প্ৰথমবাৰ এই বাঘৰ উপস্থিতি ধৰা পৰিছিল । আৰু সেই সময়তে কেমেৰাত ধৰা দিয়া মাইকী বাঘজনীক কাজি ১০৬(এফ)হিচাপে চিহ্নিত কৰিছিল ।
গৱেষক বিষয়াগৰাকীৰ তথ্য মতে কাজিৰঙাত এনে ধৰণৰ ছালৰ বৰণ সলনি হোৱা আৰু তিনিটা বাঘৰ ফটোৰ লগতে তথ্য পোৱা গৈছে ৷ ২০১৫ৰ পৰা ২০১৭-১৮ ৰ ভিতৰত লাভ কৰা হৈছে আন তিনিটা সোনালী বাঘৰ তথ্য ৷ ইফালে উদ্যানত বৰ্তমান যথেষ্ট সংখ্যক মতা আৰু প্ৰায় মাইকী বাঘ থকাৰ পাছত বংশবৃদ্ধিৰ সম্ভৱনাৰ কথা নাকচ কৰিছে শৰ্মাই ৷ বিষয়া গৰাকীৰ মতে যদি হৈছে সেয়া ভাল কথা ৷ কিন্তু প্ৰকৃততে ঢেকীয়াপতীয়া বাঘৰ বিচৰণ ভূমি ইহঁতৰ সংখ্যাৰ বিপৰীতে সংকুচিত হোৱাৰ বাবেই এনে একপ্ৰকাৰ পৰিঘটনা সংঘটিত হোৱাটো এক উৎকণ্ঠাৰ বিষয় ৷
এয়া সাধাৰণতে চিৰিয়াখানাত দেখিবলৈ পোৱা বগা বাঘৰ দৰেই এক পৰিঘটনা বুলি উল্লেখ কৰে গৱেষক গৰাকীয়ে৷ সাধাৰণতে বাঘৰ শৰীৰত থকা জিনৰ প্ৰভাৱতে শৰীৰৰ বৰণ নিয়ন্ত্ৰিত হয় ৷ শৰীৰৰ হালধীয়া বৰণো এই জিনেই নিয়ন্ত্ৰণ কৰে ৷ কিন্তু কেতিয়াবা বাঘৰ শৰীৰত ইয়াৰ বৈষম্যৰ বাবেই সোণালী বৰণৰ লগতে বগাকে ধৰি আন বহু বৰণৰ সৃষ্টি হ’ব পাৰে ৷
বংশগতি বা স্বাভাৱিক আন যিয়েই কাৰণ নহওক, এতিয়া বানৰ সময়তো কাজিৰঙা ৰাষ্ট্ৰীয় উদ্যানত সোনালী বাঘৰ বিষয়টোৱে বিশেষ চৰ্চা লাভ কৰাৰ লগতে এক নতুন আশাৰো সৃষ্টি কৰিছে ৷ ইয়াৰ মাজতে আকৌ কাজিৰঙাৰ অন্যতম গৌৰৱ ঢেকীয়াপতীয়া বাঘৰ এনে জীন পৰিবৰ্তনে শংকিতও কৰি তুলিছে বহুজনক ৷ ইয়াৰ মাজতে প্ৰকৃতি প্ৰেমীৰ আশা, কাজিৰঙাৰ ব্ৰাঘ্য প্ৰকল্পৰ বাঘজাক জীয়াই থাকক স্ব-উদ্ভাষিত ৰূপত ৷
