মৰিগাঁও জিলাৰ এগৰাকী যুৱকে তলাবন্ধৰ সময়ত বহিঃৰাষ্ট্ৰৰ পৰা ঘূৰি আহি নিজ গৃহত বায়’ফলক পদ্ধতিৰে মৎস্য পালন কৰি জিলাখনৰ নিবনুৱা যুৱক-যুৱতী সকললৈ আশাৰ বতৰা কঢ়িয়াই আনিছে । এইগৰাকী যুৱক হৈছে জিলাখনৰ লাহৰীঘাটৰ তিনিচুকীয়া মহমাৰী পথাৰৰ ছামচুজ জামান। উল্লেখ্য যে চৌদি আৰৱত শ্ৰমিক হিচাপে নিয়োজিত হৈ থকাৰ সময়ত বিশ্বব্যাপি সন্ত্ৰাস সৃষ্টি কৰা মহামাৰী ক’ৰ’নাৰ বাবে তলাবন্ধৰ সময়ত বহিঃৰাষ্ট্ৰৰ পৰা ঘৰলৈ ঘূৰি আহি যুৱকজনে নতুন চিন্তা ধাৰাৰে বায়’ফলক পদ্ধতিৰে মৎস্য পালনত নামি পৰিল ।
উল্লেখ্য যে জিলাখনৰ বান-খহনীয়াগ্ৰস্থ উত্তৰাঞ্চল লাহৰীঘাটত পোন প্ৰথম বাৰৰ বাবে বায়’ফলক পদ্ধতিৰে মৎস্য পালন কৰি নিবনুৱা সকলৰ বাবে ছামচুজ জামানে কঢ়িয়াই আনিছে আশাৰ বতৰা।এসময়ত চৌদি আৰবত শ্ৰমিক হিচাপে নিয়োজিত হৈ থকা যুৱকজনে ঘৰলৈ উভতি অহাৰ পাছত ইউটিউবত বায়’ফলক পদ্ধতিৰে কম মাটিতে অধিক মৎস্য পালনৰ বিষয় জানিব পাৰি আগ্ৰহী হয়। আগ্ৰহী যুৱকজনে কলকাতাত এই সন্দৰ্ভত প্ৰশিক্ষণ লোৱাৰ পাছত ঘৰতে বায়’ফলক পদ্ধতিৰে মৎস্য পালন আৰম্ভ কৰে। চাৰি ফুট উচ্চতাৰ দহ হাজাৰ লিটাৰ পানীৰ টেংকী এটা সাজি এৰিছে সাত হাজাৰ থলুৱা প্ৰজাতিৰ কাৱৈ মাছৰ পোনা ।
যুৱকজনে জনোৱা মতে, নব্বৈ দিনত তেওঁ মাছ সমূহ বিক্ৰী কৰিব পাৰিব আৰু ইয়াৰ উপাৰ্জন হিচাপে নব্বৈ হাজাৰ টকা লাভ কৰিব । পঞ্চাশ হাজাৰ টকা খৰচ কৰি মাত্ৰ এটা টেংকীৰে পৰীক্ষামূলকভাৱে মৎস্য পালন কৰা ছামচুজ জামানে আৰু তিনিটাকৈ টেংকী স্থাপন কৰি বায়’ফলক পদ্ধতিৰে মৎস্য পালন কৰি যোৱাৰো পৰিকল্পনা কৰিছে । তেওঁৰ মতে, চাৰিটা এনে টেংকীত বিভিন্ন প্ৰজাতিৰ মাছ পালন কৰিলে প্ৰতি তিনি মাহৰ মূৰত কমেও দুই লাখ টকা উপাৰ্জন কৰিব পৰা স্থল আছে ।
সেয়েহে তেওঁ কম মাটিতে বা ঘৰৰ ভিতৰতো কম খৰচ কৰি বায়’ফলক পদ্ধতিৰে মৎস্য পালন কৰি যাবলৈয়ো নিবনুৱা যুৱক-যুৱতী সকলক আহ্বান জনাইছে । বৰ্তমান সময়ত বহিঃৰাজ্য সমূহৰ পৰা নিজ নিজ ঘৰলৈ উভতি অহা যুৱক-যুৱতী সকলক কম ভূমি তথা নিজৰ ঘৰতে বায়’ফলক পদ্ধতিৰে উন্নত প্ৰজাতিৰ মাছ পালন কৰি নিজক স্বাৱলম্বী কৰি তোলাৰ লগতে নিবনুৱা সমস্যা হ্ৰাস কৰিবলৈ সকলোকে আহ্বান জনাইছে।
