ধৰ্ষণৰ মিছা অভিযোগ জাপি দি অৱশেষত ভুক্তভোগীক ১৫ লাখ টকা দিবলগীয়া হ’ল চেন্নাইৰ এগৰাকী মহিলাই । দোষ নকৰাকৈয়ে অভিযোগৰ কালিমা ল’বলগীয়া হৈছিল চেন্নাইৰ সন্তোষ নামৰ যুৱকজনে । সমাজ-পৰিয়াল-আত্মীয়ই ছিঃ ছিঃ কৰিছিল সন্তোষক । ফলত অকলশৰীয়া হৈ পৰিবলগীয়া হৈছিল; কিন্তু নিজকে অভিযোগমুক্ত কৰাৰ বাবে আৰম্ভ কৰা যোঁজখনৰ পৰা আঁতৰি অহাৰ নাছিল সন্তোষ । অৱশেষত ১০ বছৰৰ মূৰত সম্পূৰ্ণভাৱে সুবিচাৰ লাভ কৰিলে ।
২০১০ত ধৰ্ষণৰ অভিযোগ উত্থাপন কৰা হৈছিল সন্তোষৰ বিৰুদ্ধে । তৎকালীন ভাৱে গ্ৰেপ্তাৰ হোৱা সন্তোষে ইয়াৰ পাছত ৯৫ দিনলৈ কাৰাগাৰত থাকিবলগীয়া হৈছিল । উক্ত সময়ত সন্তোষ এজন ছাত্ৰ হিচাপে এখন মহাবিদ্যালয়ত অধ্যয়ন কৰি আছিল । ৯৫ দিন পাছত আদালতৰ পৰা জামিন লাভ কৰি মুক্ত আকাশৰ তললৈ আহিলেও অভিযোগৰ দাগ থাকি গৈছিল গাত । শেষ হৈ গৈছিল উজ্বল ভৱিষ্যত গঢ়াৰ সপোন । অৱশেষত ১৫ লাখ টকাৰ ক্ষতিপূৰণ লাভ কৰাৰ লগতে সম্পূৰ্ণভাৱে কলংকমুক্ত হৈ পৰিল সন্তোষ ।
পৰিয়ালৰ এজন বন্ধুৰ কন্যাৰ স’তে বিয়া ঠিক কৰা হৈছিল সন্তোষৰ; কিন্তু সম্পত্তিক লৈ দুয়োটা পৰিয়ালৰ মাজত বিবাদ সৃষ্টি হয় । লগে লগে সম্পৰ্কৰো অৱনতি হ’বলৈ ধৰে । ইয়াৰ পাছত স্বাভাৱিকতে বিয়াখন ভাঙি যায়। এখন বেচৰকাৰী মহাবিদ্যালয়ত অভিযান্ত্ৰিক বিষয়ত অধ্যয়ণ কৰি থকা সন্তোষৰ বিৰুদ্ধে সেই সময়তে ধৰ্ষণৰ অভিযোগ অনা হয় ।
বিয়াৰ কথা-বতৰা আগবঢ়োৱা পৰিয়ালটোৰ পৰা কোৱা হয় তেওঁলোকৰ ছোৱালী অন্তঃসত্ত্বা হৈছে । গৰ্ভত থকা সন্তানটোৰ পিতৃ হিচাপে সন্তোষ তথা সন্তোষৰ পৰিয়াল । স্পষ্ট কৰি দিয়ে যে বিয়াৰ কথা-বতৰা চলিলেও ছোৱালীগৰাকীৰে সন্তোষৰ কোনো ধৰণৰ সম্পৰ্ক স্থাপন হোৱা নাই । সমগ্ৰ বিষয়তো গৈ পায় আদালতৰ মজিয়া । ইয়াৰ মাজতে অভিযোগকাৰীয়ে এটি কন্যা সন্তান জন্ম দিয়ে । ডি এন এ পৰীক্ষাৰ পাছত সন্তানটোৰ পিতৃ যে সন্তোষ নহয় সেই কথা নিশ্চিত হয়; কিন্তু ইয়াৰ পাছতো ছবছৰ চলে আদালতত ।
২০১৬ত চেন্নাইৰ আদালতে সন্তোষক অভিযোগমুক্ত হোৱাৰ পাছত মানহানিৰ গোচৰ তৰে সন্তোষে । মিছা অভিযোগ তৰি মানহানি কৰাৰ অভিযোগেৰে ৩০ লাখ টকাৰ ক্ষতিপূৰণ দাবী কৰা হয় । শেষ পৰ্যন্ত আদালতে সন্তোষক ১৫ লাখ টকা দিবলৈ নিৰ্দেশ দি গোচৰৰ ৰায়দান কৰে ।
