প্ৰকাশ পালে আযোধ্যাত নিৰ্মাণ হ’বলগীয়া মছজিদৰ ‘নক্সা’

উচ্চতম ন্যায়ালয়ৰ ৰায়‌ দানৰ ভিত্তিত নৱ ৰূপত সজাই তোলা হৈছে ‘ৰাম জন্মভূমি’ অযোধ্যাক । কৰ’না অতিমাৰীৰ সময়তে ৰাম মন্দিৰৰ আধাৰশিলা স্থাপন কৰা হ’ল । এতিয়া মছজিদৰ ‘নক্সা’ প্ৰকাশ কৰা হ’ল আৰু ইয়াৰ পাছতেই প্ৰস্তাৱিত মাল্টি স্পেচিয়েলিটি চিকিৎসালয় প্ৰস্তুত কৰাৰো নক্সা প্ৰস্তুত কৰা হৈছে ।

বিগত বৰ্ষত অযোধ্যাৰ সমস্যা সমাধানত যায় দান কৰে উচ্চতম ন্যায়ালয়ে । অযোধ্যাত ৰাম মন্দিৰ নিৰ্মাণৰ অনুমতি দিয়াৰ লগতে মছজিদ নিৰ্মাণৰ বাবে ভূমি প্ৰদানৰো ব্যৱস্থা কৰে ।

শনিবাৰে মছজিদ নিৰ্মাণৰ দায়িত্বত থকা ছুন্নি ৱাকফ ব’ৰ্ড দ্বাৰা গঠিত ইন্দো-ইছলামিক কালচাৰেল ফাউণ্ডেছন (আইআইইছিএফ)এই মছজিদ নিৰ্মাণৰ নক্সা প্ৰকাশ কৰে । ঐতিহাসিক নিয়ম মতেই মছজিদৰ ওপৰত বিশাল গম্বুজ থাকিলেও, আদিৰ পৰা অন্ত লৈকে পাশ্চাত্য স্থাপত্যবিদ্যাৰ অনুসৰিয়ে নিৰ্মাণ কৰা হৈছে । মছজিদৰ মূল ভৱনটো আধুনিকতাৰ আভাস পোৱা যায় । মছজিদৰ চৌহদত পাৰ্কিংৰ ব্যৱস্থাও কৰা হ’ব ।

মছজিদ প্ৰকল্পৰ দায়িত্বত থকা মুখ্য স্থাপত্যবিদ এছ এম আখটাৰে কয়, ‘চিকিৎসালয়ত তিনিশ বিছনাৰ ব্যৱস্থা থাকিব । বিশেষজ্ঞ চিকিৎসকসকল ইয়াত উপস্থিত থাকিব । মছজিদত সমান্তৰালকৈ নামাজ পঢ়িব পৰা যাব । মছজিদটো সৌৰশক্তিৰ সহায়ত চালিত হ’ব । মছজিদৰ ভিতৰৰ তাপমাত্ৰা বৃদ্ধি আৰু কম কৰাৰো ব্যৱস্থা থাকিব ।’

ইয়াৰ বাহিৰেও মছজিদৰ বাবে প্ৰদান কৰা পাঁচ একৰ ভূমিত সামূহিক ৰান্ধনীশাল আৰু গ্ৰন্থাগাৰ নিৰ্মাণ কৰা হ’ব বুলিও কয় তেওঁ ।

আগন্তুক বৰ্ষৰ ২৬ জানুৱাৰীত ‌প্ৰস্তাৱিত মছজিদৰ আধাৰশিলা স্থাপন কৰা হ’ব বুলি জনায় আখটাৰে । তেওঁ কয় যে, সাত দশক পূৰ্বে সেই দিনটোতে ভাৰতৰ সংবিধান কাৰ্যকৰী হৈছিল । সেয়েহে সেই দিনাই মছজিদৰ আধাৰশিলা স্থাপন কৰা হ’ব । চিকিৎসালয় নিৰ্মাণ কাৰ্য দ্বিতীয় পৰ্যায়ত আৰম্ভ হ’ব ।