বিশ্বৰ পৰ্যটকসকলৰ বাবে অন্যতম আকৰ্ষতণীয় স্থান হৈছে ইণ্ডোনেছিয়াৰ চহৰ বালি । ছবিৰ দৰে অপূৰ্ব তথা মনোমোহা সাগৰৰ উপকূল, বিভিন্ন ধৰণৰ সুস্বাদু খাদ্যৰ বাবেই বিখ্যাত বালি চহৰ । অৱশ্যে বালিৰ আন এক আকৰ্ষণো আছে । চহৰখনত থকা একাধিক পৰিত্যক্ত বিমানসমূহৰ ৰহস্য আজি পৰ্যন্ত কোনেও ভেদ কৰিব পৰা নাই ।
ইয়াৰে কোনোবা বিমান যদি আছে সাগৰৰ উপকূলত, আন কোনোবাখন আকৌ আছে জনাঞ্চলত । কোনে, কেতিয়া বা কেনেকৈ এই বিমান চাৰিখন আনি সংশ্লিষ্ট স্থানসমূহলৈ আনিলে, কিয়নো বিমানসমূহ এইদৰে এৰি থৈ গ’ল; সেইবোৰ প্ৰশ্নৰ উত্তৰ আনকি স্থানীয় বাসিন্দাসকলৰ হাততো নাই । ইয়াৰ পৰিপ্ৰেক্ষিততে আকৰ্ষণ বাঢ়িছে এই বিমান কেইখনৰ ।
স্থানীয় লোকৰ মাজত বিমানসমূহক কেন্দ্ৰ কৰি বিভিন্ন কথা প্ৰচলিত আছে । যিবোৰ কথাই সৃষ্টি কৰিছে গভীৰ ৰহস্য । লক্ষ্যণীয়ভাৱে বালি প্ৰশাসনেও এই বিমানসমূহ আঁতৰাই নিয়াৰ ব্যৱস্থা কৰা নাই । ফলত দৈনিক বহু পৰ্যটকেই এই পৰিত্যক্ত বিমান চাৰিখন চাবলৈ ভিৰ কৰে ।
বালিৰ দক্ষিণ কুটাত জনাঞ্চলতে থিয় হৈ আছে এখন পৰিত্যক্ত ব’য়িং ৭৩৭ বিমান । বিমানখনৰ পাছতে আছে এটা বৃহৎ ৰাস্তা । কেতিয়া আৰু কেনেকৈ বিমানখন জনাঞ্চললৈ আহিল সেই কথা স্থানীয় লোকসকলে নাজানে । কাৰোবাৰ মতে, এজন স্থানীয় ব্যৱসায়ীয়ে বিমানখনতে বাসস্থান নিৰ্মাণৰ বাবে উক্ত স্থানলৈ আনিছিল ।
আন কোনো লোকৰ মতে, এই বিমানঘৰত যাদুঘৰ বা চিনেমাঘৰ নিৰ্মাণ কৰাৰ কথা আছিল । একাংশ স্থানীয় লোকে দাবী কৰে যে শীঘ্ৰেই বিমানান ৰেস্তোৰাঁলৈ পৰিৱৰ্তিত হ’ব । বিমানখন সম্প্ৰতি স্থানীয় লোকৰ তত্ত্বাৱধানতে আছে । কিছু টকাৰ বিনিময়ত পৰ্যটকে বিমানৰ ভিতৰত প্ৰৱেশ কৰি চাব পাৰে । আন এখন পৰিত্যক্ত বিমান আছে বালিৰ এটা উপদ্বীপত । সেই উপদ্বীপৰ পাণ্ডায়া উপকূলৰ একেবাৰে কাষতে বিমানখন ৰাখি থোৱা আছে । উপকূলৰ একেবাৰে কাষতে থকা বাবে এইখন হৈছে বালিৰ সবাতোকৈ জনপ্ৰিয় পৰিত্যক্ত বিমান । এনে এক স্থানত বিমানখন উক্ত স্থানলৈ আহিল, সেয়া বিস্ময়কৰ ।
বহুতে ধাৰণা কৰে যে বিমানৰ বিভিন্ন অংশ পৃথকভাৱে আনি পাছত উক্ত স্থানত জোৰা লগোৱা হৈছে । কোনো কোনো লোকে দাবী কৰে যে বিমানখনৰ গৰাকী অষ্ট্ৰেলিয়াৰ নাগৰিক । তেওঁৰ উদ্দেশ্য আছিল বিমানখনক উপকূলৰ ৰেস্তোৰাঁত পৰিণত কৰাৰ । কিন্তু প্ৰশাসনে অনুমতি নিদিয়াত ৰেস্তোৰাঁৰ কাম এতিয়াও আৰম্ভ হোৱা নাই । বহুতে আকৌ দাবী কৰে যে টকা লুট কৰি চালকে বিমানখন তাতেই এৰি পলায়ন কৰে । এই বিমানখনত অৱশ্যে ভিতৰত প্ৰৱেশ কৰি চোৱাৰ অনুমতি নাই ।
তৃতীয়খন পৰিত্যক্ত বিমান হৈছে মেকড’নেল ডগলাছ ডিচি১০ । এই বামানখন খন আছে বালিৰ গেট ৮৮ মলৰ ছাদত । এই মলৰ ছাদলৈ যোৱাৰ বাবে এলিভেটৰত উঠিব লাগিব । এলিভেটৰত উঠি পৰ্যটকে বিমানখনৰ কাষত উপস্থিত হ’ব পাৰে । এই বিমাখন প্ৰথমে ক্ৰয় কৰিছিল ব্ৰিটিছ কেলেড’নিয়ান এয়াৰৱেজে । পাছত তেওঁলোক আমেৰিকাৰ এটা কোম্পানীক বিমানখন বিক্ৰী কৰে । কোম্পানীটোৱে পণ্যবাহী বিমানৰূপে ব্যৱহাৰ কৰিছিল । তাৰ পাছত বিমানখন জিম্বাব’ৱেৰ এটা কোম্পানীক বিক্ৰী কৰা হয় । বহুদিন সেই কোম্পানীৰ কামত ব্যৱহাৰ কৰাৰ পাছত বিমানখন বাতিল কৰে । তাৰ পাছতে পৰিত্যক্ত বিমানখনৰ ঠাই হয় উক্ত মলৰ ছাদত ।
আন এখন পৰিত্যক্ত ব’য়িং ৭৩৭-২০০ বিমান আছে পশ্চিম বালিত । এইখন ভৌতিক বিমানৰূপেই অধিক পৰিচিত । জেমব্ৰানা অঞ্চলৰ এখন মুকলি পথাৰত এই বিমানখন ৰাখি থোৱা আছে । এই বিশাল মুকলি পথাৰত সম্প্ৰতি বহু বাসগৃহ গঢ়ি উঠিছে । হয়তো এই বিমানখনকো ভিলাত পৰিণত কৰাৰ পৰিকল্পনা আছিল । বিমানখনৰ ভিতৰত প্ৰৱেশ কৰি চোৱাৰ বাবে ধন নালাগে কিন্তু কেবিনত প্ৰৱেশৰ অনুমতি নাই ।