Delhi Airport:
দৈনিক অগ্ৰদূত ডিজিটেল ডেক্স:-দিল্লী বিমানবন্দৰত শনিবাৰে পুৱতি নিশা সংঘটিত হয় এক ভয়ংকৰ অঘটন। দুই শতাধিক যাত্ৰী থকা বিমানত হঠাতে সংঘটিত হয় অগ্নিকাণ্ড। প্ৰাণৰ মমতাত বিমানত বহি থকা সকলো যাত্ৰী লৰাধপৰাকৈ ওলাই আহে বাহিৰলৈ ৷তৎমুহূৰ্ততে গক হাহাকাৰময় পৰিস্থিতি সৃষ্টি হয় ৷ এই লৰাধপৰাত আহত হয় ছয়গৰাকীকৈ যাত্ৰী। আনহাতে লগে লগে বিমানবন্দৰত থকা অগ্নিনিৰ্বাপক বাহিনীৰ কে’বাখনো গাড়ী উপস্থিত হৈ জুই নিৰ্বাপন কৰিবলৈ সক্ষম হয় ৷
উল্লেখ্য যে দিল্লীৰ পৰা ছুইজাৰলেণ্ডৰ জুৰিখ অভিমুখে যাত্ৰা কৰিবলগীয়া ছুইছ এয়াৰৰ বিমান SWR146ৰ উৰণৰ সময়ত বিমানখনৰ বাওঁফালৰ পৰা ধোঁৱা ওলোৱা দেখা গৈছিল I একেদৰে সোঁফালৰ লেণ্ডিং গিয়াৰৰ ওচৰত জুই লগা দেখা যায় ৷লগে লগে সম্পূৰ্ণ জৰুৰীকালীন অৱস্থা ঘোষণা কৰা হয়।
আনহাতে,দুৰ্ঘটনাৰ পিছত সতৰ্কতামূলক ব্যৱস্থা হিচাপে ২৮ নং ৰাণৱে বন্ধ কৰি দিয়া হয় ৷ যাৰ ফলত বিমানৰ কাৰ্য্যকলাপত সাময়িকভাৱে প্ৰভাৱ পৰে। বিমানবন্দৰৰ কৰ্মচাৰী আৰু উদ্ধাৰকাৰী দলৰ তৎকালীন ব্যৱস্থাৰ বাবে পৰিস্থিতি শীঘ্ৰে নিয়ন্ত্ৰণলৈ অনা হয়। দুৰ্ঘটনা সংঘটিত হোৱাৰ সময়ত বিমানখনত আছিল প্ৰায় ২৩২ জন যাত্ৰী আৰু ১৩ জন ক্ৰু মেম্বাৰ।
এই ঘটনাই যাত্ৰীসকলৰ মাজত আতংকৰ সৃষ্টি কৰে অৱশ্যে জৰুৰীকালীন স্লাইডৰ জৰিয়তে সকলো যাত্ৰীক নিৰাপদে উলিয়াই অনা হয়। জৰুৰীকালীন খালী কৰাৰ সময়ত ছয়জন যাত্ৰী সামান্য আঘাতপ্ৰাপ্ত হোৱাৰ লগতে চিকিৎসাধীন হৈ থকা বুলিও খবৰ পোৱা গৈছে। সকলো যাত্ৰী সুৰক্ষিত।
ইপিনে ছুইছ বিমান সংস্থাৰ এগৰাকী মুখপাত্ৰই জনোৱা মতে, শনিবাৰে পুৱতি নিশা প্ৰায় ১ বজাত এই ঘটনা সংঘটিত হয়। উৰণৰ সময়ত এটা ইঞ্জিন বিকল হোৱাৰ ফলত ক্ৰুৱে তৎক্ষণাত বিমানখন ৰখাই দিয়ে। সুৰক্ষাৰ কাৰণে সতৰ্কতামূলকভাৱে খালী কৰাৰ সিদ্ধান্ত লোৱা হৈছিল।
জৰুৰীকালীন স্লাইডৰ জৰিয়তে সকলো যাত্ৰী আৰু ক্ৰুক নিৰাপদে উলিয়াই অনা হয়। অৱশ্যে ৬ গৰাকী যাত্ৰীক চিকিৎসা পৰীক্ষাৰ বাবে প্ৰেৰণ কৰা হয়। বিমান সংস্থাটোৱে স্পষ্ট কৰি দিয়ে যে স্লাইড ব্যৱহাৰ কৰিব নোৱাৰা একাংশ যাত্ৰীৰ বাবে চিৰিৰ ব্যৱস্থা কৰা হৈছে।
আনহাতে এই সন্দৰ্ভত ছুইছবিমান সংস্থা আৰুদিল্লী বিমানবন্দৰ কৰ্তৃপক্ষই ক্ষীপ্ৰতাৰে তদন্ত আৰম্ভ কৰিছে। ইঞ্জিন বিকল হোৱাৰ কাৰণ আৰু অগ্নিকাণ্ডৰ তদন্ত অব্যাহত আছে। প্ৰথম অৱস্থাত ইয়াক কাৰিকৰী দোষ বুলি গণ্য কৰা হৈছে। বিমান সংস্থাটোৱে জনোৱা মতে, কাৰিকৰী বিশেষজ্ঞৰ এটা দল দিল্লীত উপস্থিত হৈ বিমানখন পৰিদৰ্শন কৰি পৰৱৰ্তী ব্যৱস্থা নিৰ্ধাৰণ কৰিব। ইয়াৰ উপৰিও যাত্ৰীসকলৰ সুবিধাৰ বাবে বিকল্প ভ্ৰমণৰ ব্যৱস্থা কৰা হৈছে।