নুমলীগড় শোধনাগাৰৰ সমীপৰ এখন হোটেলৰ পাছফালে আজি আবেলি সংঘটিত হোৱা এক ভয়ংকৰ অগ্নিকাণ্ডই সমগ্ৰ অঞ্চলজুৰি জোঁকাৰণিৰ সৃষ্টি কৰে। নুমলীগড় আৰক্ষী চকীৰ কাষতে থকা গণপতি হোটেলত ইতিমধ্যে চোৰাং তেলৰ ৰমৰমীয়া ব্যৱসায় চলি থকাৰ অভিযোগ উত্থাপিত হৈ অহাৰ সময়তে আজি সংঘটিত অগ্নিকাণ্ডই ৰাইজক আতংকিত কৰি তোলে।
হোটেলখনৰ পাছফালে সংঘটিত হোৱা এই অগ্নিকাণ্ডৰ ফলত ক’লা ধোঁৱাই সমগ্ৰ অঞ্চল ছানি ধৰে। জুইৰ লেলিহান শিখাই নিমিষতে হোটেলৰ পাছফালৰ এখন চালি, এখন স্কুটি, ফালিয়া তুঁহ আৰু এটা জেনেৰেটৰ চাৰখাৰ কৰি তোলে।
কেনেকৈ এই অগ্নিকাণ্ড সংঘটিত হ’ল, সেই বিষয়ত কোনো তথ্য লাভ হোৱা নাই যদিও চৰ্ট চাৰ্কিটৰ ফলত অগ্নিকাণ্ড সংঘটিত হয় বুলি হোটেল কৰ্তৃপক্ষই জনাইছে। আনহাতে, একাংশ লোকে অভিযোগ কৰে যে, হোটেলখনত বহুদিনৰ পৰা চলি থকা অবৈধ খাৰুৱা তেলৰ বেহাই এই বিপদ মাতি আনিছে।
উল্লেখ্য যে দপদপাই জুই জ্বলি উঠা অংশত তেলৰ ড্ৰাম, তেলৰ পাইপ জাতীয়, তেলৰ টিনৰ লগতে কিছু সামগ্ৰী উদ্ধাৰ হয়। ই হোটেলখনত চোৰাংভাৱে তেলৰ বেহা কৰাৰ অভিযোগক সত্য প্ৰমাণিত কৰে বুলিও একাংশই মন্তব্য প্ৰকাশ কৰে।
লগতে একাংশ লোকে চোৰাং তেলত অগ্নি সংযোগ হোৱাৰ ফলেতই জুইৰ সূত্ৰপাত হোৱা বুলিও অভিযোগ কৰিছে।
বহু পৰ ধৰি একেৰাহে জুই জ্বলাৰ পাছতহে অগ্নি নিৰ্বাপক বাহিনীৰ তিনিখন বাহন ঘটনাস্থলীত উপস্থিত হৈ জুই নিয়ন্ত্ৰণ কৰে। ইপিনে, জুই নিয়ন্ত্ৰণলৈ অহাৰ পাছতহে স্থানীয় ৰাইজে স্বস্তিৰ নিশ্বাস লয়।
উল্লেখ্য যে নুমলীগড় আৰক্ষী চকীৰ পৰা মাত্ৰ দুশ মিটাৰ দূৰত অৱস্থিত হোটেল গণপতিত কেনেকৈ চোৰাং তেলৰ ৰমৰমীয়া ব্যৱসায় চলে বুলি অঞ্চলটোৰ সচেতন মহলে প্ৰশ্ন উত্থাপন কৰিছে।
