প্ৰধানমন্ত্ৰী নৰেন্দ্ৰ মোদী চৰকাৰ দ্বিতীয়বাৰৰ বাবে ক্ষমতাত অহাৰ পাছতেই দেশজুৰি বিভিন্ন ৰুটত ১৫১খন ৰে’ল ব্যক্তিগতকৰণ কৰা হ’ল । ৰেল’ৰ অব্যৱহৃত ভূমি সংস্কাৰ সাধনৰ উদ্দেশ্যে নতুন দিল্লী, মধ্যপ্ৰদেশৰ হবিবগঞ্জ ষ্টেচনো ব্যক্তিগত কৰা হৈছে । লগতে, আইআৰচিটিচি-ৰ অধীনস্থ সংস্থাৰ শ্বেয়াৰ বজাৰত মুক্ত কৰা হৈছে ।
কংগ্ৰেছসহ বিৰোধী দলসমূহৰ অভিযোগ, ৰে’লক ব্যক্তিগতকৰণৰ প্ৰচেষ্টা চলাইছে মোদী চৰকাৰে । কালিৰ পৰা লোকসভাত আৰম্ভ হোৱা ৰে’ল মন্ত্ৰণালয়ৰ বাজেট আৱন্তন সংক্ৰান্ত বিতৰ্ক, চৰকাৰৰ ৰে’লক ব্যক্তিগতকৰণৰ কৌশলৰ বিৰুদ্ধে সৰৱ হৈছে বিভিন্ন দলৰ সাংসদসকল ।
কংগ্ৰেছ সাংসদ ৰবনীত সিং বেংকৰ পৰা ৰে’ল লৈকে চৰকাৰৰ সকলো ক্ষেত্ৰৰ ব্যক্তিগতকৰণৰ নীতিৰ সমালোচনাত সৰৱ হয় । তেওঁ ব্যক্তিগতকৰণৰ ফলত চৰকাৰী সম্পত্তি মুক্ত হোৱাৰ লগতে লক্ষাধিক লোক নিবনুৱা হ’ব বুলি মত প্ৰকাশ কৰে ।
আজি বিতৰ্কৰ সন্দৰ্ভত ৰে’লমন্ত্ৰী পীযুষ গয়ালে স্পষ্টভাৱে কয় যে, তেওঁ বা তেওঁৰ চৰকাৰ কোনোৱে ৰে’ল ব্যক্তিগতকৰণৰ সমৰ্থনত নাই । কিন্তু দক্ষতাৰ স্বাৰ্থত ৰে’লত ব্যক্তিগত বিনিয়োগ অহা উচিত বুলি মত প্ৰকাশ কৰে তেওঁ । গয়ালে কয়, ‘ৰে’ল প্ৰত্যেক ভাৰতীয়ৰ সম্পত্তি । সেয়ে ৰে’লৰ কেতিয়াও ব্যক্তিগতকৰণ নহ’ব । অনাগত দিনটো ৰে’ল চৰকাৰৰ দখলতে থাকিব ।’
লগতে, ৰে’লৰ সাৰ্বজনীন সংস্কাৰ আৰু পৰিকাঠামো উন্নয়নৰ বাবে চৰকাৰী আৰু ব্যক্তিগত ক্ষেত্ৰৰ স’তে একজোট হৈ চলা প্ৰয়োজন বুলি সৰৱ হয় ৰে’ল মন্ত্ৰীগৰাকী । তেওঁ কয়, চৰকাৰী আৰু ব্যক্তিগত ক্ষেত্ৰ পৰস্পৰে একজোট হৈ চলিলে দেশৰ বৃদ্ধিৰ লেখচিত্ৰ ঊৰ্ধ্বমুখী হয় । কৰ্মসংস্থাপনৰ মানো বৃদ্ধি হ’ব ।’
চৰকাৰে ৰে’লৰ বিষয়ত কিমান গুৰুত্ব আৰোপ কৰে সেই বিষয়ত ৰে’লমন্ত্ৰী গয়ালে কয়, ‘২০১৯-২০ আৰ্থিক বৰ্ষত ৰে’লৰ আৱন্তন আছিল ১.৫ লাখ কোটি টকা । এই বছৰ বৃদ্ধি কৰি কৰা হৈছে ২.১৫ লাখ কোটি টকা । ইয়াৰ দ্বাৰাই বুজিব পাৰি যে, চৰকাৰৰ বাবে গুৰুত্বপূৰ্ণ মন্ত্ৰণালয় হৈছে ৰে’ল । ভাৰতীয় ৰে’লৰ সামগ্ৰিক উন্নতিৰ বাবে চৰকাৰ দায়বদ্ধ ।’
