ৰাজ্যৰ চহৰবোৰৰ লগতে গ্ৰাম্যঞ্চলতো ক’ভিডে সংহাৰী ৰূপ ধাৰণ কৰিছে । তাৰ পৰিপ্ৰেক্ষিততে ৰাজ্য চৰকাৰে গ্ৰাম্যঞ্চলত ক’ভিড ভেকচিন প্ৰদান কৰাৰ লগতে ক’ভিড পৰীক্ষা কৰাৰ ব্যৱস্থা হাতত লৈছে । সেইমৰ্মে গোসাঁইগাঁৱৰ ভিন্ন গ্ৰাম্যঞ্চলত ক’ভিড পৰীক্ষা কৰা পৰিলক্ষিত হৈছে ।
সমান্তৰালকৈ বৰোবাদা প্ৰাথমিক স্বাস্থ্য কেন্দ্ৰত আজি পুৱাৰ পৰা ছখন গাৱৰ ৰাইজক ক’ভিড পৰীক্ষণ কৰা হৈছে । ৰাইজে যেনেধৰণে সহাঁৰি জনাব লাগিছিল তাৰ তুলনাত অধিকাংশ গাঁওবাসীয়ে আতংকিত হৈ ক’ভিড পৰীক্ষাৰ পৰা বিৰত থাকে বুলি সদৰী কৰে স্বাস্থ্যকৰ্মীয়ে ।
গুৰুফেলা আৰক্ষী চকীৰ ভাৰ প্ৰাপ্ত আৰক্ষী বিষয়া অংগৰাজ চেত্ৰীয়ে বৰোবাদা অঞ্চলৰ বিভিন্ন গাঁওবোৰলৈ গৈ ৰাইজক ক’ভিড সম্পৰ্কে সজাগ কৰাৰ লগতে ক’ভিড পৰীক্ষা কৰিবলৈ আহ্বান জনায় ।
প্ৰকৃততে, যিটো সময়ত গ্ৰাম্যঞ্চলত কৰ’নাৰ সংক্ৰমণ বৃদ্ধি পাবলৈ ধৰিছে, যদি ৰাইজে স্বতঃস্ফূৰ্তভাৱে ক’ভিড পৰীক্ষা কৰিবলৈ নাহিলে দিনকদিনে কৰ’না সংক্ৰমণৰ হাৰ বৃদ্ধি পাব সেয়া নিশ্চিত ।
