নিউয়ৰ্কত গুটৰেছৰ স’তে বৈঠকত মিলিত হ’ল জয়শংকৰ, মূল আলোচ্য বিষয় প্ৰতিষেধক

আমেৰিকা ভ্ৰমণৰ তৃতীয় দিনাখন ৰাষ্ট্ৰসংঘৰ মহাসচিব এণ্টোনিঅ’ গুটৰেছৰ স’তে বৈঠকত মিলিত হ’ল ভাৰতৰ বৈদেশিক মন্ত্ৰী এছ জয়শংকৰ । ভাৰত ৰাষ্ট্ৰসংঘৰ নিৰাপত্তা পৰিষদৰ অস্থায়ী সদস্য হোৱা হেতুকে এইয়ে প্ৰথম গুটৰেছৰ স’তে প্ৰত্যক্ষভাৱে বৈঠকত মিলিত হ’ল বৈদেশিক মন্ত্ৰীগৰাকী ।

অন্য সময়ত বৈঠক অনুষ্ঠিত হোৱা হ’লে আলোচনাৰ বাবে সন্ত্ৰাসবাদ, আন্তৰ্জাতিক নিৰাপত্তা, দক্ষিণ -পশ্চিম এছিয়াৰ ভূ-কৌশলগত পৰিস্থিতি, আফগানিস্তানৰ পৰা আমেৰিকাৰ সেনা প্ৰত্যাহাৰত ভাৰতৰ সম্ভাৱ্য ভূমিকা ইত্যাদি বিষয়ে অগ্ৰাধিকাৰ লাভ কৰিল হয় । কিন্তু কূটনৈতিক সূত্ৰ অনুসৰি, আজিৰ বৈঠকত এই বিষয়সমূহ উত্থাপন হৈছিল যদিও ক’ভিড প্ৰতিষেধকে আলোচনাৰ মূল বিষয়বস্তু আছিল ।

সম্প্ৰতি গুটৰেছে কৰ’নাৰ দ্বিতীয় ঢৌৰ পাছত ভাৰতৰ পৰিস্থিতিক লৈ গভীৰ উদ্বেগ প্ৰকাশ কৰিছে । তেওঁ কৰ’নাৰ বিৰুদ্ধে যুঁজত নৰেন্দ্ৰ মোদী চৰকাৰৰ প্ৰশাসনিক ব্যৰ্থতাৰ বিষয়েও সৰৱ হয় ।

আজিৰ বৈঠকত অতিমাৰীৰ ফলত ভাৰতে সন্মুখীন হোৱা তৎকালীন আৰু পৰৱৰ্তী প্ৰত্যাহ্বানসমূহৰ বিষয়ে আলোচনা কৰা হয় । সূত্ৰ অনুসৰি, অতিমাৰীৰ সমস্যা সমাধান কৰিবৰ বাবে মোদী চৰকাৰে ভৱিষ্যতে কি সিদ্ধান্ত গ্ৰহণ কৰিব সেই বিষয়ে জয়শংকৰৰ পৰা জানিব বিচাৰিছে গুটৰেছে ।

ঘণ্টাজুৰি হোৱা বৈঠকৰ পাছত জয়শংকৰে টুইট কৰে, ‘ৰাষ্ট্ৰসংঘৰ মহাসচিবৰ স’তে সৌহাৰ্দ্যপূৰ্ণ পৰিৱেশত সামগ্ৰিক আলোচনা হৈছে । কৰ’না পৰিস্থিতিৰ বাবে সৃষ্টি হোৱা প্ৰত্যাহ্বান, আন্তৰ্জাতিক স্তৰত প্ৰতিষেধকৰ ব্যৱস্থা, প্ৰতিষেধক সৰবৰাহ অক্ষুণ্ণ ৰখা, উৎপাদনৰ হাৰ বৃদ্ধি কৰা আৰু এইবোৰ যাতে ৰাষ্ট্ৰৰ ভিতৰত ন্যায্যভাৱে বণ্টন হয় সেই বিষয়ত আলোচনা হৈছে ।’

A warm & comprehensive meeting with UN Secretary General @antonioguterres.

Discussed the Covid challenge,underlining the importance of finding urgent&effective global vaccine solutions.Critical to ramp up the vaccine supply chain to ensure greater production&fairer distribution pic.twitter.com/fDAwTyNCRt

— Dr. S. Jaishankar (Modi Ka Parivar) (@DrSJaishankar) May 25, 2021

ভাৰতে সম্প্ৰতি প্ৰতিষেধকৰ বাবে প্ৰত্যক্ষভাৱে আমেৰিকাৰ ওপৰত নিৰ্ভৰশীল । নিউয়ৰ্কত ৰাষ্ট্ৰসংঘৰ মহাসচিবৰ স’তে প্ৰতিষেধকৰ সৰবৰাহ অক্ষুণ্ণ ৰখাৰ দাবী কৰি, বাইডেন চৰকাৰকো বাৰ্তা দিলে ভাৰতে । এই ক্ষেত্ৰত ৰাষ্ট্ৰসংঘৰ ভূমিকাক ভাৰতৰ পক্ষত ৰাখি যথাসম্ভৱ প্ৰতিষেধক আদায় কৰাটোৱে লক্ষ্য বুলি মত পোষণ কৰে কূটনৈতিক শিবিৰে ।