অনলাইন পাঠগ্রহণত অতিষ্ঠ ছবছৰীয়া কাশ্মীৰী কন্যাৰ প্ৰধানমন্ত্রীক প্রশ্ন ‘শিশুক ইমান হেঁচা দিছে কিয় ?’

মাত্র ৪৫ ছেকেণ্ডৰ এটা ভিডিঅ’ ভাইৰেল হ’ল সামাজিক মাধ্যমত। মাত্র ছবছৰীয়া বয়সৰ এগৰাকী স্কুলীয়া কন্যাই এই ভিডিঅ’ৰ জৰিয়তে প্রধানমন্ত্রী নৰেন্দ্ৰ মােদীক নিজৰ এক অভিযােগ দাখিল কৰিলে।

কাশ্মীৰ নিবাসী কণমানি কন্যাই ভিডিঅ’ত অভিযােগ কৰা মতে, কৰ’না কালত অনলাইনযােগে পাঠ গ্ৰহণ কৰিবলৈ গৈ দেশৰ শিশুসকল চৰম নির্যাতনৰ ভুক্তভােগী হ’বলগা হৈছে।

অনলাইন পাঠগ্রহণৰ হেঁচাত অতিষ্ঠ হৈ শিশুটিয়ে দেশৰ প্ৰধানমন্ত্রীক অভিযােগ দিলে। বিগত এবছৰৰাে অধিক ধৰি দেশৰ বিভিন্ন ৰাজ্যত বিদ্যালয় বন্ধ হৈ আছে।

এনে পৰিস্থিতিত ছাত্র-ছাত্রীসকলে অনলাইনত অধ্যয়ন কৰিব লগা হৈছে। কাশ্মীৰৰ কণমানি ছাত্রীগৰাকীয়ে সংক্ষিপ্ত অভিযােগ বার্তাত দাবী কৰি কয় যে অনলাইনত অধ্যয়নৰ ক্ষেত্ৰত শিশুসকল যথেষ্ট হেঁচাৰ সন্মুখীন হৈছে।

ছবছৰীয়া কন্যা গৰাকীয়ে কয় যে পুৱা ১০টাৰ পৰা দুপৰীয়া দুটালৈ তেওঁলােকে ক্লাছ কৰিব লগা হয়। ইংৰাজী, গণিত, উর্দু, ইভিএছ আৰু অন্যান্য কিছু বিষয়ৰ প্ৰতিদিনে পাঠগ্রহণ কৰিব লাগে।

কণমানি শিশুক কিয় ইমান হেঁচা দিয়া হৈছে বুলি প্ৰশ্ন কৰি ছাত্ৰীগৰাকীয়ে কয় যে ইয়াৰ বাদেও তেওঁলােকে হােমৱৰ্ক কৰিব লগা হয়। বিষয়টোৰ সন্দৰ্ভত প্রধানমন্ত্রী হস্তক্ষেপ দাবী কৰি কণমানি কন্যাই কয়, ‘আপুনি শুনিছে নে মােদীজী ?’

Very adorable complaint. Have directed the school education department to come out with a policy within 48 hours to lighten burden of homework on school kids. Childhood innocence is gift of God and their days should be lively, full of joy and bliss. https://t.co/8H6rWEGlDa

— Office of LG J&K (@OfficeOfLGJandK) May 31, 2021

মােদী চাহাবে এই বিষয়ত গুৰুত্ব দিয়া উচিত। এতিয়ালৈকে কাশ্মীৰী কন্যাৰ পৰিচয় জ্ঞাত হােৱা নাই যদিও সামাজিক মাধ্যমত কণমানি ছাত্রীগৰাকীয়ে উত্থাপন কৰা সমস্যাৰ প্ৰসংগটোৱে ইণ্টাৰনেট ব্যৱহাৰকাৰীৰ মাজত যথেষ্ট চর্চা লাভ কৰিছে।

ভিডিঅ’টো ভাইৰেল হােৱাত সক্রিয় হ’ল জম্মু-কাশ্মীৰৰ ৰাজ্যপাল মনােজ সিনহা। ছাত্র-ছাত্রীৰ অনলাইন ক্লাছৰ এক নির্দিষ্ট নীতি নির্ধাৰণ কৰিবলৈ ৰাজ্যপালে শিক্ষা বিভাগক ৪৮ ঘণ্টা সময় প্রদান কৰিলে।