বাগ্সা জিলাৰ মুছলপুৰ মহকুমাৰ অন্তৰ্গত শিংৰাপাৰা গাঁৱৰ তিনিগৰাকী দূৰ্ভগীয়া সন্তানক সহায়ৰ হাত আগবঢ়াবলৈ আগবাঢ়ি আহিল সদৌ অসম ছাত্ৰ সন্থা ৷ তিনি সন্তানৰ পঢ়া-শুনাৰ দায়িত্ব গ্ৰহণ কৰিব ছাত্ৰ সন্থাই ৷
উল্লেখ্য যে শিংৰাপাৰা গাঁৱৰ দূৰ্ভগীয়া তিনি সন্তানে পাঁচ মাহৰ ভিতৰত অগা পিচাকৈ হেৰুৱাইছিল নিজ পিতৃ- মাতৃক । পাঁচ মাহ পূৰ্বে সন্তান তিনিগৰাকীৰ মাতৃ কৰ্কট ৰোগত আক্ৰান্ত হৈ মৃত্যু মুখত পৰাৰ পাছত মাতৃৰ শোকৰ বেদনা পাৰ নৌহওঁতেই পিতৃও হৃদৰোগত আক্ৰান্ত হৈ আজিৰ পৰা এমাহ আগতে মৃত্যুমুখত পৰিছিল । একমাত্ৰ আইতাকগৰাকীও আক্ৰান্ত দূৰাৰোগ্য কৰ্কট ৰোগত ৷ যাৰ বাবে নি:সহায় হৈ পৰিছিল শিংৰাপাৰা গাঁৱৰ এই তিনিগৰাকী সন্তান ক্ৰমে ভাগ্যশ্ৰী দত্ত, সীমাশ্ৰী দত্ত আৰু সৌৰভ দত্ত ।
পিতৃ-মাতৃৰ আকস্মিক বিয়োগত তিনিওগৰাকীৰ ভৱিষ্যত জীৱনলৈ ঘোৰ অন্ধকাৰ নামি আহিছিল ৷ কিয়নো পিতৃৰ উপাৰ্জনেৰে পৰিয়ালটো চলিছিল ৷ ফলত পিতৃ চানক্য দত্তৰো আকস্মিক মৃত্যুত দিশহাৰা হৈ পৰে দূৰ্ভগীয়া দুই কন্যা আৰু একমাত্ৰ পুত্ৰ ৷ এই সন্দৰ্ভত বিভিন্ন সংবাদ মাধ্যমত বাতৰি প্ৰচাৰ কৰাত সন্তান তিনিগৰাকীৰ কাষ চাপিছিল বিভিন্ন দল সংগঠন ।
কালি সদৌ অসম ছাত্ৰ সন্থাৰ কেন্দ্ৰীয় সাংগঠনিক সম্পাদক ৰিয়াজুদ্দিন আহমেদে বাগ্সা জিলা ছাত্ৰ সন্থা আৰু বাগ্সা আঞ্চলিক ছাত্ৰ সন্থাৰ নেতৃবৃন্দৰ স’তে শিংৰাপাৰাৰ দূৰ্ভগীয়া পৰিয়ালটোৰ বাসগৃহত উপস্থিত হয় ৷ ছাত্ৰ সন্থাৰ কেন্দ্ৰীয় সাংগঠনিক সম্পাদকগৰাকীয়ে দূৰ্ভগীয়া সন্তান তিনিটাৰ খা-খবৰ লৈ সম্পূৰ্ণ পঢ়া-শুনাৰ খৰচৰ উপৰিও বিভিন্ন সময়ত সহায়ৰ হাত আগবঢ়াম বুলি আশ্বাস প্ৰদান কৰে ।
তেওঁ জানিব দিয়া মতে, বিভিন্ন সংবাদ মাধ্যমত ঘাটমাউৰা তিনি সন্তানৰ বিষয়ে জানিব পাৰি কালি জিলা ছাত্ৰ সন্থাৰ স’তে পৰিয়ালটোত উপস্থিত হয় ৷ বিশেষকৈ পিতৃ-মাতৃ অবিহনে ল’ৰা-ছোৱালী তিনিটাই পঢ়া-শুনা কিদৰে আগুৱাই নিব সেই বিষয়ে চিন্তা-চৰ্চা কৰা হৈছে বুলি জানিব দিয়ে ৰিয়াজুদ্দিন আহমেদে ৷ অৱশ্যে আছুৰ কেন্দ্ৰীয় নেতাগৰাকীয়ে দূৰ্ভগীয়া পৰিয়ালটোৰ বিষয়ে সংবাদ মাধ্যমত প্ৰচাৰ হোৱাৰ পাছতো আজিলৈকে প্ৰশাসনে এবাৰো খবৰ নোলোৱাতো দূৰ্ভাগ্যজনক আখ্যা দিয়ে ৷
আছু নেতাগৰাকীয়ে পৰিয়ালটোৰ জ্যেষ্ঠ কন্যা ভাগ্যশ্ৰী দত্তক যোগ্যতাৰ ভিত্তিত চৰকাৰী চাকৰিত নিয়োগ কৰিবলৈও চৰকাৰৰ ওচৰত দাবী উত্থাপন কৰে ৷ কালি আছুৰ প্ৰতিনিধি দলটোত কেন্দ্ৰীয় নেতাগৰাকীৰ উপৰিও বাগ্সা জিলা ছাত্ৰ সন্থাৰ সম্পাদক দিগন্ত ডেকা, বাগ্সা জিলা উন্নতি সভাৰ সম্পাদক অমৰেন্দ্ৰ পাঠকৰ লগতে বাগ্সা আঞ্চলিক ছাত্ৰ সন্থাৰ বিষয়ববীয়াসকল উপস্থিত থাকে ৷
