কান্দাহাৰত নিহত পুলিৎজাৰ জয়ী ভাৰতীয় চিত্ৰসাংবাদিক দানিশ ছিদ্দিকি । কিছুদিন পূৰ্বেই কান্দাহাৰৰ অশান্ত পৰিস্থিতিৰ ছবি তুলিবলৈ গৈছিল দানিশ । তেওঁ আফগান সেনাবাহিনীৰ স’তে থাকি কাম কৰিছিল । সোমবাৰে সংবাদ সংস্থাই জনায়, কান্দাহাৰৰ স্পিন বোলডাক জিলাত সংঘৰ্ষত পৰি নিহত হয় দানিশ ।
আন্তৰ্জাতিক সংবাদ সংস্থা ৰয়টাৰ্ছৰ প্ৰধান চিত্ৰসাংবাদিক আছিল দানিশ । টুইটাৰত এজন সাংবাদিকে দিয়া তথ্য অনুসৰি, বৃহস্পতিবাৰে নিশা গুৰুত্বৰভাৱে আঘাতপ্ৰাপ্ত হৈছিল দানিশ । তেওঁ আফগান সেনা শিবিৰতে আছিল । তেওঁক আহত অৱস্থাতে শিবিৰত এৰি থৈ আফগান সেনাবাহিনীয়ে তালিবান বিৰোধী অভিযানত যায় । কিন্তু শুকুৰবাৰে পুৱা পুনৰ তালিবানে আক্ৰমণ কৰে আফগান সেনাবাহিনীক । ঘটনাস্থলিতে মৃত্যু হয় দানিশৰ । সাংবাদিকজনে সামাজিক মাধ্যমত জনাইছে যে, দানিশৰ দেহাৱশেষৰ ছবিয়ো লাভ কৰিছে তেওঁলোকে । কিন্তু তেওঁলোকে ছবিটো প্ৰকাশ কৰা নাই ।
Afghan Sources tell me that Danish came under attack last night when he was injured with Afghan forces but they continued on mission. This morning they came under heavy attack yet again in an ambush and was killed by Taliban. Photograph of mortal remains received. Not posting it.
— Aditya Raj Kaul (@AdityaRajKaul) July 16, 2021
দানিশৰ ঘৰ মুম্বাইত । তেওঁৰ বয়স আছিল ৪০ বছৰ । তেওঁ জামিয়া মিলিয়া ইছলামিয়াৰ ছাত্ৰ আছিল । টেলিভিছন সাংবাদিক হিচাপে যাত্ৰা আৰম্ভ কৰে যদিও পৰৱৰ্তী সময়ত চিত্ৰসাংবিকতাকে কৰ্মজীৱন হিচাপে বাচি লয় । ২০১০ত ৰয়টাৰ্ছত শিক্ষানবীশ চিত্ৰ সাংবাদিক হিচাপে যোগ দিয়ে । ইয়াৰ ছবছৰৰ ভিতৰতে ইৰাকৰ মুছলৰ যুদ্ধৰ ফটো সংগ্ৰহ কৰিবলৈ যায় দানিশ । ২০১৫ৰ নেপালৰ ভূমিকম্পৰো ফটো তোলে । ২০১৯-২০ত হংকং প্ৰতিবাদ, ২০২০ত দিল্লীৰ সংঘৰ্ষৰ ছবিও তুলিছিল চিত্ৰসাংবাদিকজনে ।
তেওঁ ভাৰতৰ প্ৰথম পুলিৎজাৰ জয়ী চিত্ৰসাংবাদিক । ২০১৮ত সহকৰ্মী আদনান আবিদিৰ স’তে ফিচাৰ ফটোগ্ৰাফিত পুলিৎজাৰ পুৰস্কাৰ লাভ কৰিছিল দানিশে । তেওঁ ভাৰতৰ ৰয়টাৰ্ছৰ আলোকচিত্ৰ সংগ্ৰহকাৰী দলৰ প্ৰধান আছিল ।