তালিবান শাসনত ফুটবল খেলাতো বাদেই, নিজৰ প্রাণক লৈয়ে সংশয়ত আছিল আফগানিস্তানৰ মহিলা ফুটবল দলৰ সদস্যসকল । সেয়ে নিজক ৰক্ষা কৰিবলৈ লুকাই ফ্রান্সলৈ গ’ল ফানুছ বছিৰ । ফুটবলৰ বিষয়ে ভাবিলেই তেওঁৰ মন গধুৰ হৈ পৰে । নতুন দেশত শূন্যৰ পৰা জীৱন আৰম্ভ কৰিব বিচাৰে ফানুছে ।
আফগানিস্তানৰ ফুটবলক লৈ অনিশ্চয়তাৰ বিষয়ে ফানুছে কয়, ‘‘আফগানিস্তানৰ মহিলাসকলক লৈ বহু সপোন আছিল । সকলো শেষ হৈ গ’ল । সকলো সপোন দুঃস্বপ্নত পৰিণত হ’ল । আফগানিস্তানত মহিলাসকলৰ কোনো ভৱিষ্যৎ নাই । সকলো তালিবানে দখল কৰিব ।’’
তালিবানে আফগানিস্তান দখল কৰাৰ পাছৰ পৰাই ঘৰৰ পৰা বাহিৰত ওলোৱা বন্ধ হৈ পৰিছে ফানুছৰ । সেয়ে আশংকাত তেওঁ পিতৃ-মাতৃৰ স’তে দেশ ত্যাগ কৰাৰ সিদ্ধান্ত গ্ৰহণ কৰে । কিন্তু তাতো বিপত্তি । কাবুল বিমানবন্দৰৰ বাহিৰত তিনদিন আৱদ্ধ হৈ থাকিবলগীয়া হয় তেওঁলোকে । মানুহৰ ভিৰৰ মাজতেই গুলি চালনা কৰে তালিবানে । তাত তেওঁলোকৰ এজন প্রতিনিধিৰ স’তে কথা পাতিবলৈ গৈছিল ফানুছ । মহিলা হোৱাৰ বাবে তেওঁৰ স’তে কথা পাতিব নিবিচাৰে আফগানিস্তানৰ বর্তমান শাসক গোষ্ঠীৰ সেই প্রতিনিধিয়ে ।
বিমানবন্দৰৰ বাহিৰত থাকোতে থাকোতে এটা সময়ত দেশ ত্যাগ কৰাৰ আশা প্রায় বাদেই দিছিল ফানুছে । সেই সময়ত ফৰাচী দূতাবাসৰ পৰা ঘোষণা কৰা হয়, বিমানবন্দৰত যাবৰ বাবে বাছৰ ব্যৱস্থা কৰা হ’ব । তাৰ পৰা ফ্রান্সৰ বিমান এৰা হ’ব । এই সুযোগ হেৰুৱাব নিবিচাৰে ফানুছে । পিতৃ-মাতৃক লৈ ফ্রান্সত গুচি যায় আফগান ফুটবলাৰ ।
স্বদেশত চিভিল ইঞ্জিনিয়াৰ আছিল ফানুছ । ফ্রান্সলৈ গৈ নতুন চাকৰিৰ সন্ধান কৰাৰ ইচ্ছা প্ৰকাশ কৰিছে ফানুছে । কিন্তু এতিয়াও স্বদেশৰ ভয়াবহ অৱস্থাৰ কথা মনত পৰিলেই তেওঁৰ গা কঁপি উঠে । এই পৰ্যন্ত তেওঁ আতংকিত হৈ আছে । শূন্যৰ পৰা সকলো আৰম্ভ কৰিব বিচাৰে আফগান ফুটবলাৰগৰাকীয়ে । তেওঁ কয়, ‘‘আমাৰ দেশ, আমাৰ সপোন সকলো পাহৰি যোৱা অতি কঠিন । এতিয়া শূন্যৰ পৰা সকলো আৰম্ভ কৰিম ।’’
