‘মানুহতকৈ কাগজ বহু সহনশীল’— নাৎসি জার্মানিত হলোকাষ্টৰ বলি হোৱা কিশোৰী এনি ফ্ৰেংকৰ দিনলিপিৰ কথা প্রথম অধ্যায়ত উদ্ধৃত কৰি প্রকাশিত হ’ল আদিবা ৰিয়াজৰ প্রথম কিতাপ । বয়স ১১ বছৰ । সপ্তম শ্রেণীৰ ছাত্রী । জম্মু-কাশ্মীৰৰ প্রকাশিত-কলমচিদৰ ভিতৰত সর্বকনিষ্ঠ ।
২০১৯ত অনন্তনাগ জিলা প্রশাসনৰ দ্বাৰা আয়োজিত এটা সৃজনশীল লেখা প্রতিযোগিতাত পুৰষ্কাৰ লাভ কৰিছিল আদিবাই । তাৰ পাছৰ পৰাই স্বপ্ন দেখা আৰম্ভ হয় । ধাৰা ৩৭০ বিলোপৰ পাছত কাশ্মীৰত সান্ধ্য আইন জাৰি কৰা হয় । কৰ’নাৰ বাবে তলাবন্ধও দিয়া হয় । আদিবাই সংবাদমাধ্যমক জনাইছে, সেই সময়তেই তাই কলম হাতত লয় । সম্পূৰ্ণ কিতাপখন মাত্ৰ ১১ দিনত লিখা । আৰম্ভণিতে কোৱা হয়, ‘সকলোৱে লেখক হ’ব পাৰে, কাৰণ কাগজত তেজ বোওৱা সহজ’ ।
কিতাপখনৰ নাম ‘জিল অৱ পেন’ (কলমৰ উদ্দীপনা) । ৯৬ খন পৃষ্ঠাৰ ৩৫টা অধ্যায়ত আদিবাৰ টুকুৰা-টুকুৰা মনৰ কথা, ৯টা কবিতা আৰু ১১টা অনুচ্ছেদ । প্রচ্ছদ বগা-ক’লা; দিন-ৰাতিৰ দৰে সমানে দুভাগ কৰা । কিতাপ হাতত লৈ লেখিকা নিজে, ক’লা হিজাবৰ ভিতৰত উদ্ভাসিত মুখ— এই ছবি ভাইৰেল হৈছে সামাজিক মাধ্যমত । সম্প্ৰতি কিতাপখন ইন্টাৰনেটত উপলব্ধ । ছফ্ট-বাইণ্ডিঙৰ এটা সংস্কৰণ বজাৰত পাব পাৰে ।
আদিবাই জনাইছে, এইবাৰ লেখাত আৰু মন দিব বিচাৰে । এনেদৰে লিখিব বিচাৰে, যাৰ মাজত সকলোৱে নিজকে বিচাৰি পায় ।