ভৱানীপুৰ বিধানসভা সমষ্টিৰ ভিন্ন প্ৰান্তত আজি তিনিটা পকী পথ, বিদ্যালয়,সত্ৰ, নামঘৰৰ উন্নয়নৰ পৃথকে পৃথকে আনুষ্ঠানিকভাৱে আধাৰশিলা স্থাপন কৰে সমষ্টিটোৰ বিধায়ক ফনীধৰ তালুকদাৰে।
উল্লেখ্য যে ভৱানীপুৰ বিধানসভা সমষ্টিৰ মাজেৰে অতিক্ৰম কৰা কলবাৰী – গেৰুৱাপাৰাৰ ঐতিহাসিক গোসাই কমল আলি,ভাৰেগাঁৱৰ ৰাষ্ট্ৰীয় শ্বহীদ দিলীপ কুমাৰ দাসৰ বাসগৃহৰ সন্মুখেৰে অতিক্ৰম কৰা পথ,বৰভিঠা – বৰকুৰ পথৰ আনুষ্ঠানিকভাৱে আধাৰশিলা স্থাপন কৰে বিধায়ক ফনীধৰ তালুকদাৰে।
অসম চৰকাৰৰ লোক নিৰ্মাণ বিভাগৰ এছঅ’পিডি – জি আঁচনিৰ ধন মুঠ তিনি কোটি ৯৬ লাখ ৬৪ হেজাৰ টকা ব্যয় সাপেক্ষে তিনিওটা পথ পকীকৰণেৰে নিৰ্মাণ কাৰ্য সম্পন্ন হ’ব।
উল্লেখনীয় যে ভৱানীপুৰ বিধানসভা সমষ্টিৰ দুগৰাকী ৰাষ্ট্ৰীয় শ্বহীদ দিলীপ কুমাৰ দাস আৰু দিগন্ত বায়নৰ স্মৃতিত ভাৰেগাওঁ আৰু কলবাৰী – গেৰুৱাপাৰাত পথ দুটা নিৰ্মিত হ’ব। আনহাতে আজি ভৱানীপুৰৰ ঐতিহাসিক শ্ৰী শ্ৰী গোপালদেৱ আতা সত্ৰ চৌহদত ড্ৰেইনেজ পদ্ধতি, ভৱানীপুৰৰ শান্তিপুৰৰ প্ৰাথমিক বিদ্যালয়ৰ চৌহদত পকী বেৰ আৰু শান্তিপুৰ নামঘৰৰ জিৰণি গৃহৰ নিৰ্মাণ কাৰ্যৰ পৃথকে পৃথকে আনুষ্ঠানিকভাৱে আধাৰশিলা স্থাপন কৰে বিধায়ক ফনীধৰ তালুকদাৰে।
পঞ্চায়ত আৰু গ্ৰামোন্নয়নৰ আঁচনিৰ ধন ব্যয়েৰে আধাৰশিলা স্থাপন কৰা বিদ্যালয়ৰ চৌহদত পকী বেৰ,নামঘৰৰ জিৰণি গৃহ,সত্ৰ চৌহদৰ ড্ৰেইনেজ পদ্ধতিৰ নিৰ্মাণ কাৰ্য সম্পন্ন কৰা হ’ব বুলি বিধায়ক গৰাকীয়ে ঘোষণা কৰে।
ঐতিহাসিক গোসাই কমল আলিৰ নিৰ্মাণ কাৰ্যৰ আধাৰশিলা স্থাপন কৰি দিয়া ভাষণত বিধায়ক ফনীধৰ তালুকদাৰে কয় যে , ” সমগ্ৰ অসমতেই মুখ্যমন্ত্ৰী ড° হিমন্ত বিশ্ব শৰ্মাৰ নেতৃত্বত নৱ নিৰ্মাণ কাৰ্যক্ৰমণিকা আৰম্ভ হৈছে। ঐতিহাসিক ভৱানীপুৰ বিধানসভা সমষ্টিতো আৰম্ভ হৈছে নৱ নিৰ্মাণ কাৰ্যক্ৰমণিকা।অসমৰ লগতে ভৱানীপুৰ বিধানসভা সমষ্টিকো একাধিক উন্নয়নেৰে নতুন ৰূপত সজাই তোলাৰ আঁচনি গ্ৰহণ কৰিছে অসমৰ মুখ্যমন্ত্ৰীয়ে ।”
আটাইকেইটা আধাৰশিলা স্থাপন অনুষ্ঠানত বিধায়ক ফনীধৰ তালুকদাৰৰ লগতে ভৱানীপুৰৰ খণ্ড উন্নয়ন বিষয়া ভৱানী পেগু,লোক নিৰ্মাণ বিভাগৰ সহকাৰী অভিযন্তা ৰাজেন কাকতি, ভৱানীপুৰ আঞ্চলিক পঞ্চায়তৰ সদস্য বুদ্ধদেৱ পাটগিৰিৰ লগতে কেবাগৰাকীও বিশিষ্ট ব্যক্তিয়ে উপস্থিত থাকে।