নুমলীগড় উচ্চতৰ মাধ্যমিক বিদ্যালয়ৰ অধ্যক্ষ, ৰাজ্যিক কৃতী শিক্ষক সন্মানেৰে সন্মানিত তথা লেখক মহেন শইকীয়াৰ ‘গুৰু প্ৰণাম দুৰ্বানন্দ গগৈ’ আৰু ‘মহিমা মণ্ডিত খনিকৰ পুথি আৰু অন্যান্য’ শীৰ্ষক দুয়োখন গ্ৰন্থ আজি উন্মোচন কৰা হয়।
কমাৰগাঁও আঞ্চলিক সাংবাদিক সংস্থাৰ উদ্যোগত সংস্থাৰ সভাগৃহত আয়োজিত এক গাম্ভীৰ্যপূৰ্ণ অনুষ্ঠানত বিশিষ্ট লেখিকা, সদৌ অসম লেখিকা সমাৰোহ সমিতিৰ কাৰ্যকৰী সভানেত্রী তথা অৱসৰ প্ৰাপ্ত শিক্ষয়িত্ৰী সুবৰ্ণ শইকীয়া বৰদলৈ আৰু বিশিষ্ট লেখক- শিক্ষক জিতেন হাজৰিকাই গোলাঘাটৰ সৰস্বতী প্ৰকাশনে প্ৰকাশ কৰি উলিওৱা উল্লিখিত গ্ৰন্থ দুখন উন্মোচন কৰে।
দুয়োগৰাকী উন্মোচকে নিজৰ ভাষণত কয় যে কমাৰগাঁও অঞ্চলত প্ৰাথমিক শিক্ষাৰ প্ৰচাৰ আৰু প্ৰসাৰত গুৰুত্ব ভূমিকা গ্ৰহণ কৰা তথা ৰাষ্ট্ৰপতি পুৰস্কাৰ প্ৰাপ্ত প্ৰয়াত দুৰ্বানন্দ গগৈৰ জীৱন পৰিক্ৰমাক লৈ ৰচনা কৰা ‘গুৰু প্ৰণাম দুৰ্বানন্দ গগৈ’ গ্ৰন্থখনে বৃহত্তৰ অঞ্চলটোৰ শৈক্ষিক ক্ষেত্ৰখনকো নতুনকৈ চোৱাৰ অৱকাশ দিব।
এই মহান শিক্ষকগৰাকীৰ প্ৰতি ছাত্ৰ মহেন শইকীয়াই যি গুৰুপ্ৰণাম যাচিছে সেয়া সকলোৰে বাবে অনুকৰণীয়। উন্মোচকদ্বয়ে দুয়োখন গ্ৰন্থ পঢ়ুৱৈয়ে আদৰি ল’ব বুলিও আশা প্ৰকাশ কৰে।
অনুষ্ঠানত দুৰ্বানন্দ গগৈৰ সহধৰ্মীনী কুঞ্জ গগৈয়ে প্ৰয়াত স্বামীক লৈ ৰচিত গ্ৰন্থখনৰ লেখক মহেন শইকীয়াক কৃতজ্ঞতা জনায়। কমাৰগাঁও আঞ্চলিক সাংবাদিক সংস্থাৰ সম্পাদক পৱন কামানে আঁত ধৰা গ্ৰন্থ উন্মোচনী অনুষ্ঠানত বিশিষ্ট অতিথি হিচাপে অৱসৰপ্ৰাপ্ত প্ৰধান শিক্ষক ধৰ্মেশ্বৰ হাজৰিকা,জ্যেষ্ঠ সাংবাদিকদ্বয় বুবুল দত্ত, প্ৰদীপ বৰা, সাংবাদিক-নাট্যকাৰ অমৰ শৰ্মাকে ধৰি বহুকেইগৰাকী গণ্যমান্য ব্যক্তি উপস্থিত থাকে।
ইপিনে উক্ত অনুষ্ঠানতে সদৌ অসম লেখিকা সমাৰোহ সমিতিৰ তৰফৰ পৰা গ্ৰন্থ, জাতীয় বস্ত্ৰ আৰু পৰম হিতৈষী সদস্য বৰণ-পত্ৰ লেখক মহেন শইকীয়াক প্ৰদান কৰে।অনুষ্ঠানত অশ্লেষা শইকীয়া আৰু নীল হাজৰিকাই গীত পৰিৱেশনেৰে সকলোকে আপ্লুত কৰে।
